હાથીજણની ઘટના બાદ AMC જાગ્યું, પાલતુ શ્વાનનું રજિસ્ટ્રેશન નહીં કરો તો થશે કડક કાર્યવાહી

અમદાવાદ: અમદાવાદમાં શ્વાનનાં આતંકની ઘટના સામે આવ્યા બાદ હવે અમદાવાદ મ્યુનિસિપલ કોર્પોરેશનનું તંત્ર જાગ્યું છે. ગઇકાલે અમદાવાદનાં હાથીજણમાં 4 મહિનાની બાળકી પર પાલતુ શ્વાને હુમલો કર્યો હતો અને સારવાર દરમિયાન બાળકીનું મૃત્યુ થયું હતું. આ બનાવ બાદ હવે એએમસીએ પાલતુ શ્વાન અંગે મહત્વનો નિર્ણય કર્યો છે.

પાલતુ શ્વાનનું રજિસ્ટ્રેશન ફરજિયાત

અમદાવાદ મહાનગર પાલિકા દ્વારા શહેરમા પાલતુ શ્વાનનું રજિસ્ટ્રેશન ફરજિયાત કરવામાં આવ્યું છે. આ અંગે AMCના સ્ટેન્ડિંગ કમિટીના ચેરમેન દેવાંગ દાણીએ વાત કરતાં જણાવ્યું હતું કે હતું કે, પાલતુ શ્વાનનું રજિસ્ટ્રેશન નહીં હોય તો કાર્યવાહી કરવામા આવશે. પાણી અને ગટરના કનેક્શન પણ કાપવામાં આવશે તે ઉપરાંત પોલીસ ફરિયાદ સહિતની કાર્યવાહી પણ કરવામાં આવશે.

આ પણ વાંચો: અમદાવાદના હાથીજણમાં ચાર મહિનાની બાળકી પર શ્વાનનો હુમલો, સારવારમાં મોત…

આ રીતે કરી શકો છો રજીસ્ટ્રેશન?

સૌપ્રથમ અમદાવાદ મનપાની ઓફિશિયલ વેબસાઈટ https://ahmedabadcity.gov.in/ પર જાઓ અને વેબસાઈટના હોમ પેજ પર નીચે Important Linksનું સેક્શનમાં આપેલા Pet Dog Registrationનાં ઓપ્શન પર ક્લિક કરો. જેમાં બે ઓપ્શન બતાવશે, તેમાં Login for Pet Dog Registration પર જઈને અરજદારનું નામ, અરજદારનો મોબાઈલ નંબર અને કેપ્ચા સબમીટ કરો. આટલું કર્યા બાદ મોબાઈલ પર OTP આવશે તે એન્ટર કરતા એક લિંક ખુલશે. જેમાં પાલતું શ્વાનના માલિકની ઓળખણના પુરાવા એન્ટર કર્યા બાદ PAY પર ક્લિક કરીને રૂ.200 રજિસ્ટ્રેશન ફીનું ઓનલાઈન પેમેન્ટ કરવાનું રહેશે.