સ્પોર્ટસ

ફેબ્રુઆરીમાં મહિલાઓની આઇપીએલની ફાઇનલ કેમ વીકએન્ડમાં નહીં રમાય

મુંબઈઃ આગામી નવમી જાન્યુઆરીએ મહિલાઓની આઇપીએલ એટલે કે ટી-20 વિમેન્સ પ્રીમિયર લીગ (ડબ્લ્યૂપીએલ)ની જે ચોથી સીઝન (FOURTH SEASON) શરૂ થશે એની ફાઇનલ પહેલી વખત વીકએન્ડને બદલે અઠવાડિયાની મધ્યમાં રમાશે અને એનું કારણ છે મેન્સ ટી-20 વર્લ્ડ કપ. પહેલી વાર ડબ્લ્યૂપીએલ ફેબ્રુઆરી-માર્ચને બદલે જાન્યુઆરી-ફેબ્રુઆરીમાં રમાવાની છે.

ડબ્લ્યૂપીએલ જેવી મોટી ટૂર્નામેન્ટની ફાઇનલ સામાન્ય રીતે વીકએન્ડમાં (શનિવાર અથવા રવિવારે) રાખવામાં આવતી હોય છે, પરંતુ આ વખતની ડબ્લ્યૂપીએલની ફાઇનલ ગુરુવાર, પાંચમી ફેબ્રુઆરીએ રાખવામાં આવી છે. એ જ અઠવાડિયામાં ભારત તથા શ્રીલંકામાં સંયુક્ત રીતે પુરુષોનો ટી-20 વર્લ્ડ કપ શરૂ થશે.

આપણ વાચો: મહિલાઓની આઇપીએલમાં ગુજરાતે બેન્ગલૂરુને હરાવ્યું, હવે મોખરાની ટીમો મુંબઈ-દિલ્હી વચ્ચે ટકકર

એ વિશ્વ કપની પ્રથમ મૅચ કોલંબોમાં શનિવાર, સાતમી ફેબ્રુઆરીએ પાકિસ્તાન અને નેધરલૅન્ડ્સ વચ્ચે રમાશે અને શનિવારના દિવસે એ મોટી સ્પર્ધા શરૂ થવાની હોવાથી ડબ્લ્યૂપીએલની ફાઇનલના દિવસ માટે શનિવારને બદલે ગુરુવાર પસંદ કરવામાં આવ્યો હોવાનું મનાય છે. મેન્સ વર્લ્ડ કપમાં શનિવારના પહેલા દિવસે ભારત-અમેરિકાની અને વેસ્ટ ઇન્ડિઝ-બાંગ્લાદેશની મૅચ પણ રમાશે.

મહિલા વર્લ્ડ કપવાળા મેદાન પર ડબ્લ્યૂપીએલનો આરંભ

દરમ્યાન 28 દિવસની ડબ્લ્યૂપીએલ (WPL)માં બે સ્થળે (નવી મુંબઈ અને વડોદરા) કુલ બાવીસ મૅચ રમાશે. નવી મુંબઈના ડી. વાય. પાટીલ સ્ટેડિયમમાં બીજી નવેમ્બરે મહિલાઓના વર્લ્ડ કપની ફાઇનલ રમાઈ હતી જેમાં ભારતે સાઉથ આફ્રિકાને હરાવ્યું હતું.

એ જ મેદાન પર નવમી જાન્યુઆરીથી 17મી જાન્યુઆરી સુધીની 11 મૅચ ડી. વાય. પાટીલ સ્ટેડિયમમાં રમાશે અને ત્યાર બાદ 19મી જાન્યુઆરીથી પાંચમી ફેબ્રુઆરી સુધીની બાકીની 11 મૅચ વડોદરાના કોટંબી સ્ટેડિયમમાં રમાશે.

આપણ વાચો: મહિલાઓની આઇપીએલમાં દિલ્હીની ટીમ ચોથા નંબરેથી મોખરાના સ્થાને આવી ગઈ…

મુંબઈ-બેંગ્લૂરુ મૅચથી આરંભ

ડબ્લ્યૂપીએલની આગામી સીઝનની નવમી જાન્યુઆરીની પ્રથમ મૅચ નવી મુંબઈમાં ડિફેન્ડિંગ ચૅમ્પિયન મુંબઈ ઇન્ડિયન્સ-વિમેન અને 2024ની ચૅમ્પિયન ટીમ રૉયલ ચૅલેન્જર્સ બેંગલૂરુ-વિમેન ટીમ વચ્ચે રમાશે. 10મી જાન્યુઆરી અને 17મી જાન્યુઆરીએ નવી મુંબઈમાં ડબલ હેડર થશે એટલે કે એ દિવસે બે મૅચ (એક બપોરે અને બીજી સાંજે) રમાશે.

પાંચ ટીમ માટે એ જ ફૉર્મેટ

મુંબઈ, દિલ્હી, બેંગલૂરુ, યુપી અને ગુજરાતના ફ્રૅન્ચાઇઝી વચ્ચેની આ સ્પર્ધામાં દરેક ટીમ એકમેક સાથે બે મૅચ રમશે. સર્વોચ્ચ ટીમ સીધી ફાઇનલમાં જશે અને બીજી-ત્રીજા ક્રમની ટીમ વચ્ચે એલિમિનેટર રમાશે જેમાં જીતનારી ટીમ ફાઇનલમાં જશે. ડબ્લ્યૂપીએલ પૂરી થયાના દસ દિવસ બાદ ભારતીય મહિલા ક્રિકેટરો ઑસ્ટ્રેલિયાના લાંબા પ્રવાસે જશે.

Ajay Motiwala

પત્રકારત્વ ક્ષેત્રે 35 વર્ષના અનુભવી સિનિયર પત્રકાર. 'મુંબઈ સમાચાર'માં વર્ષોથી સ્પોર્ટ્સ ક્ષેત્રે આર્ટિકલ્સ લખવા સાથે ન્યૂઝ પેપરમાં ડેઈલી સ્પોર્ટ્સ પેજ બનાવવાના અનુભવી. મુંબઈ સમાચાર સિવાય અન્ય પેપરમાં પણ કામ કર્યું છે.

સંબંધિત લેખો

Back to top button