મહિલાઓના ધમાકેદાર ટી-20 વર્લ્ડ કપનો દિવસ નજીક આવી ગયો, જાણો ટૂર્નામેન્ટનું એ-ટુ-ઝેડ…

દુબઈ: મહિલાઓનો ટી-20 વર્લ્ડ કપ ખૂબ નજીક આવી ગયો છે. ત્રણ જ દિવસ બાદ વિમેન્સ ક્રિકેટની આ ફૉર્મેટનો નવમો મહાંજગ યુએઇમાં શરૂ થશે. 3-20 ઑક્ટોબરની આ વિશ્ર્વ સ્પર્ધાની પ્રથમ મૅચ શારજાહમાં રમાશે અને ફાઇનલ મુકાબલો દુબઈમાં થશે.

ઑસ્ટ્રેલિયા છેલ્લા ત્રણ વર્લ્ડ કપથી ટ્રોફી ઉપાડતું આવ્યું છે અને આ વખતે પણ ચૅમ્પિયન બનવા માટે અલીઝા હિલીની ટીમ પ્રબળ દાવેદાર છે. જોકે હરમનપ્રીત કૌરની કૅપ્ટન્સીમાં અને સ્મૃતિ મંધાનાની વાઇસ-કૅપ્ટન્સીમાં ભારતીય ટીમ પણ ટાઇટલ જીતવા માટે ફેવરિટ છે.

આ વખતના વિમેન્સ ટી-20 વર્લ્ડ કપમાં 10 ટીમ ભાગ લઈ રહી છે અને તેમની વચ્ચે ફાઇનલ સહિત કુલ 23 મૅચ રમાશે. 10 ટીમને બે ગ્રૂપમાં વહેંચવામાં આવી છે. ગ્રૂપ-એમાં ભારત, પાકિસ્તાન, ઑસ્ટ્રેલિયા, ન્યૂ ઝીલૅન્ડ તથા શ્રીલંકા છે, જ્યારે ગ્રૂપ-બીમાં ઇંગ્લૅન્ડ, સાઉથ આફ્રિકા, વેસ્ટ ઇન્ડિઝ, બાંગ્લાદેશ અને સ્કૉટલૅન્ડ સામેલ છે.

ભારતવાળા ગ્રૂપમાં તમામ મજબૂત ટીમો છે, પરંતુ ખાસ કરીને ભારત અને પાકિસ્તાન વચ્ચેની ટક્કર પર સૌની નજર રહેશે. આ વર્લ્ડ કપમાં ભારતની પ્રથમ મૅચ શુક્રવાર, 4 ઑક્ટોબરે ન્યૂ ઝીલૅન્ડ સામે રમાવાની છે. જોકે રવિવાર, 6 ઑક્ટોબરના ભારત-પાકિસ્તાનના હાઈ-વૉલ્ટેજ મુકાબલા પર સૌ કોઈ ક્રિકેટપ્રેમી મીટ માંડીને બેસશે.

ગયા ટી-20 વર્લ્ડ કપમાં ભારતનો સેમિ ફાઇનલમાં ઑસ્ટ્રેલિયા સામે પાંચ રનથી પરાજય થયો હતો અને છેવટે ઑસ્ટ્રેલિયા ચૅમ્પિયન બન્યું હતું.

આ વિશ્ર્વ કપ બાંગ્લાદેશમાં રમાવાનો હતો, પરંતુ ત્યાં રાજકીય ઊથલપાથલ થતાં અને ક્રાંતિકારી દેખાવો થવાને પગલે આઇસીસીએ વર્લ્ડ કપ યુએઇમાં રાખવાનું નક્કી કર્યું હતું.

વર્લ્ડ કપમાં ભારતની લીગ મૅચ ક્યારે?

ભારતીય ટીમ:

હરમનપ્રીત કૌર (કૅપ્ટન), સ્મૃતિ મંધાના (વાઇસ-કૅપ્ટન), રિચા ઘોષ (વિકેટકીપર), યસ્તિકા ભાટિયા (વિકેટકીપર), શેફાલી વર્મા, જેમાઇમા રૉડ્રિગ્સ, દયાલન હેમલતા, દીપ્તિ શર્મા, શ્રેયંકા પાટીલ, સજીવન સજના, આશા શોભના, રેણુકા સિંહ, પૂજા વસ્ત્રાકર, રાધા યાદવ અને અરુંધતી રેડ્ડી.