મહિલા વન-ડે વર્લ્ડ કપની ટિકિટનો ભાવ માત્ર આટલા રૂપિયા, આ સેલિબ્રિટી ઓપનિંગમાં પર્ફોર્મ કરશે

નવી દિલ્હીઃ આગામી 30મી સપ્ટેમ્બરે શરૂ થનારા મહિલાઓના વન-ડે વર્લ્ડ કપ (WORLD CUP)ના પ્રથમ તબક્કાની લીગ મૅચની પ્રત્યેક ટિકિટનો ભાવ ફક્ત 100 રૂપિયા નક્કી કરવામાં આવ્યા છે. બીજું, મહિનાના અંતે શરૂ થનારી આ સ્પર્ધાની ગુવાહાટી ખાતેની ઓપનિંગ (OPENING) સેરેમનીમાં ભારતીય સંગીતની આઇકૉનિક સિંગર શ્રેયા ઘોષલ (SHREYA GHOSAL) પર્ફોર્મ કરશે.

આઇસીસીની અગાઉ કોઈ પણ ઇવેન્ટમાં ટિકિટનો 100 રૂપિયા (અંદાજે 1.14 ડૉલર) જેટલો નીચો દર ક્યારેય નહોતો, પણ આ મહિલા વર્લ્ડ કપમાં એટલા ભાવ સાથે શરૂઆત કરીને નવું સીમાચિહ્ન નક્કી કરવામાં આવ્યું છે. આ નીચો ભાવ તમામ લીગ મૅચોને લાગુ પડશે. મહિલા ક્રિકેટને વધુ લોકપ્રિય કરવાના ધ્યેય સાથે મંગળવાર, નવમી સપ્ટેમ્બરે શરૂ થનારા ટિકિટના વેચાણમાં ગૂગલ પે ક્રિકેટચાહકો માટે સરળ અને મહત્ત્વનું માધ્યમ બની રહેશે, એવું પીટીઆઇના અહેવાલમાં જણાવાયું હતું.

આ પણ વાંચો: વન-ડે વર્લ્ડકપ અગાઉ ભારતીય મહિલા ટીમ શ્રીલંકામાં રમશે ત્રિકોણીય સીરિઝ

શ્રેયા ઘોષલના સ્વરે `બ્રિંગ ઇટ હોમ’ ટાઇટલ સાથેનું ટૂર્નામેન્ટ માટેનું ઍન્થેમ તૈયાર કરાયું છે અને હવે શ્રેયા ઓપનિંગમાં ગુવાહાટીના સ્ટેજ પર પર્ફોર્મ પણ કરશે. એ સાથે શ્રેયા, મ્યૂઝિક ટીમના કલાકારો અને શ્રેયાના ગીતોના તાલે ડાન્સ કરનાર પર્ફોર્મર્સ વિશાળ મંચ પરથી મહિલા ક્રિકેટ માટેના જોશ અને ઝનૂનને સમગ્ર ખેલજગતમાં ફેલાવશે.

આ ટૂર્નામેન્ટ 12 વર્ષે ફરી ભારતમાં યોજાવાની છે. આ વિશ્વ કપમાં આઠ ટીમ ભાગ લેશે. ચૅમ્પિયન બનનારી ટીમને 40 કરોડ રૂપિયાનું પ્રથમ ઇનામ મળશે. આ ઇનામીરકમ પુરુષ તથા મહિલા, બન્ને વર્ગની ક્રિકેટમાં નવો વિક્રમ છે.