વડોદરા: વડોદરા શહેરને 15 વર્ષે પહેલીવાર પુરુષોની આંતરરાષ્ટ્રીય ક્રિકેટ મેચના આયોજનનો અવસર મળ્યો છે. જાન્યુઆરી, 2026માં ન્યૂ ઝીલૅન્ડની ટીમ મર્યાદિત ઓવર્સની મૅચો રમવા માટે ભારતના પ્રવાસે આવશે ત્યારે (11મી જાન્યુઆરીએ) વન-ડે સિરીઝની પ્રથમ મૅચ વડોદરા (VADODARA)માં રમાશે. એ જ શ્રેણીમાં કિવીઓ (KIWIS) સામેનો 14મી જાન્યુઆરીનો બીજો મુકાબલો રાજકોટમાં થશે.
રોહિત શર્મા અને વિરાટ કોહલી ટી-20 આંતરરાષ્ટ્રીય તથા ટેસ્ટ ક્રિકેટમાંથી નિવૃત્ત થઈ ગયા છે, પરંતુ તેમણે વન-ડે ફોર્મેટમાં રમવાનું ચાલુ રાખ્યું છે એ જોતાં તેઓ જાન્યુઆરીમાં વડોદરાની વન-ડે (ODI)માં જોવા મળશે એવી આશા છે.
આપણ વાંચો: ચૉકર્સ’ છેક 9722 દિવસે બન્યા વિનર્સ’
જાન્યુઆરીની મૅચ વડોદરામાં કોટમ્બી સ્ટેડિયમમાં રમાશે જ્યાં છ મહિના પહેલાં ભારત અને વેસ્ટ ઇન્ડીઝ વચ્ચેની મહિલાઓની વન-ડે સિરીઝ રમાઈ હતી. ત્યાર બાદ વિમેન્સ પ્રીમિયર લીગ (ડબ્લ્યૂપીએલ)ની છ મૅચ પણ આ જ સ્ટેડિયમમાં રમાઈ હતી.
છેલ્લે ડિસેમ્બર, 2010માં વડોદરામાં રિલાયન્સ સ્ટેડિયમમાં જે આંતરરાષ્ટ્રીય મૅચ રમાઈ હતી એ પણ ન્યૂ ઝીલૅન્ડ સામે જ હતી. વર્તમાન હેડ-કોચ ગૌતમ ગંભીરે એ મૅચમાં સેન્ચુરી ફટકારી હતી અને મૅન ઑફ ધ મૅચનો અવૉર્ડ જીતી લીધો હતો. વિરાટ કોહલીએ એ મૅચમાં 63 રન કર્યા હતા. ભારતે એ મૅચ જીતી લીધી હતી.
ન્યૂ ઝીલૅન્ડની ટીમ જાન્યુઆરીમાં ભારત આવશે ત્યારે ત્રણ વન-ડે અને પાંચ ટી-20 મૅચ રમાશે.
આ ટી-20 સિરીઝ પછી ફેબ્રુઆરી-માર્ચ, 2026માં ટી-20નો વર્લ્ડ કપ રમાશે. ભારત હાલમાં ટી-20 ચેમ્પિયન છે.
