વેસ્ટ ઈન્ડિઝના પૂર્વ કેપ્ટને કોહલી માટે આપ્યું મહત્ત્વનું નિવેદન, જાણો શું છે મામલો?

નવી દિલ્હીઃ વેસ્ટ ઈન્ડિઝના મહાન બેટ્સમેન બ્રાયન લારાએ વિરાટ કોહલીને એક આદર્શ ખેલાડી ગણાવ્યો છે. વિશ્વભરના ક્રિકેટ ખેલાડીઓની પેઢીને પ્રેરિત કરનાર લારાએ કહ્યું હતું કે તે તેના પુત્રને વિરાટ કોહલી વિશે જણાવશે, જેથી તેને પ્રેરણા મળે.

વિરાટ વિશ્વના સૌથી લોકપ્રિય ક્રિકેટરમાંથી એક છે. તે તેની સ્ટાઇલિશ બેટિંગ અને ફિટનેસ માટે જાણીતો છે. આ વર્ષે ઓક્ટોબર-નવેમ્બરમાં આયોજિત વન-ડે વર્લ્ડ કપમાં 35 વર્ષીય વિરાટ ભારતના સૌથી ફિટ ખેલાડીઓમાંથી એક હતો.
વિરાટે આ વર્લ્ડ કપમાં 11 ઇનિંગ્સમાં 765 રન કર્યા હતા અને તે ટૂર્નામેન્ટમાં સૌથી વધુ રન કરનાર બેટ્સમેન હતો. કોહલીએ આ દરમિયાન ત્રણ સદી અને છ અડધી સદી ફટકારી હતી. તેણે સૌથી વધુ વન-ડે સદી ફટકારનારા ખેલાડીઓમાં મહાન બેટ્સમેન સચિન તેંડુલકરને પણ પાછળ છોડી દીધો છે. કોહલીએ વર્લ્ડ કપમાં સૌથી વધુ સદી ફટકારવાના મામલે સચિનનો રેકોર્ડ પણ તોડ્યો હતો.

કોલકાતામાં ટાઈગર પટૌડી મેમોરિયલ લેક્ચરમાં બોલતા ભૂતપૂર્વ વેસ્ટ ઈન્ડિઝ કેપ્ટને કહ્યું હતું કે જો તેનો પુત્ર કોઈ રમત રમવા માંગે છે તો તે તેને કોહલીની પ્રખ્યાત ક્રિકેટ સફરથી પ્રેરિત કરવા માંગશે.

તેણે કહ્યું હતું કે મારો એક પુત્ર છે અને હું તમને કહી શકું છું કે જો મારો પુત્ર કોઈ સ્પોર્ટ્સ રમશે તો હું કોહલીની પ્રતિબદ્ધતા અને સમર્પણનો ઉપયોગ માત્ર તેની શક્તિ વધારવા માટે જ નહીં પરંતુ નંબર વન ખેલાડી બનવા માટે પણ કરીશ. હું તેને પ્રેરિત કરીશ.

ટીમની રમત જીતવાની છે અને એક વ્યક્તિગત ખેલાડી તરીકે તમારે તેને તમારું પ્રથમ લક્ષ્ય બનાવવું પડશે, પરંતુ ટીમની સફળતા માટે વ્યક્તિગત સફળતા ગૌણ છે અને કોહલીએ સમગ્ર વિશ્વ કપ દરમિયાન મેચ પછી ભારતની મેચનું નેતૃત્વ કર્યું છે.