વુશુની રમતમાં નમ્રતા બત્રાએ ભારત માટે રચ્યો ઇતિહાસ

ચેન્ગ્ડુ (ચીન): વિશ્વવિખ્યાત વુશુની રમત (ચીની માર્શલ આર્ટ)માં નમ્રતા બત્રાએ ભારત માટે નવો ઇતિહાસ (History) રચ્યો છે. તે આ રમતની વિશ્વ સ્પર્ધામાં મેડલ જીતનારી ભારતની પ્રથમ વુશુ (Wushu) પ્લેયર બની છે. તેણે મંગળવારે વર્લ્ડ ગેમ્સમાં બીજા નંબર પર રહીને સિલ્વર જીતી લીધો હતો.

નમ્રતાએ ફાઇનલ (Final)માં પહોંચીને જ ઇતિહાસ રચ્યો હતો, કારણકે આ પહેલાં વુશુની રમતની બહુરાષ્ટ્રીય સ્પર્ધામાં મેડલ પોતાને નામ કરનારી તે પહેલી ભારતીય બની હતી.

મંગળવારે સૅન્ડા બાવન કિલો વર્ગની ફાઇનલમાં નમ્રતાનો ચીનની મેન્ગ્યૂઇ ચેન સામે 0-2થી હારી ગઈ હતી. ચેનને સુવર્ણ ચંદ્રક અને નમ્રતાને રજત ચંદ્રક અપાયો હતો.

સેમિ ફાઇનલમાં નમ્રતા બત્રાએ ફિલિપીન્સની ક્રિઝાન ફેઇથ કૉલાડોને 2-0થી પરાજિત કરીને ફાઇનલમાં પ્રવેશ કર્યો હતો.

એ પહેલાં, તીરંદાજીમાં પુરુષોના વર્ગમાં રિષભ યાદવ વર્લ્ડ ગેમ્સમાં વ્યક્તિગત મેડલ જીતનારો પ્રથમ ભારતીય બન્યો હતો. તેણે મેન્સ કમ્પાઉન્ડ આર્ચરી ઇવેન્ટમાં બ્રૉન્ઝ જીતી લીધો હતો.