મુંબઈ ઇન્ડિયન્સને મળ્યો નવો બોલિંગ-કોચ, જાણો કોને સોંપાઈ જવાબદારી

મુંબઈ: આઇપીએલની 2025ની સીઝન તો હજી ઘણી દૂર છે, પરંતુ મેગા ઑક્શન નજીક આવી રહ્યું છે અને એ પહેલાં જ મુંબઈ ઇન્ડિયન્સે મોટો નિર્ણય લીધો છે. આ ટીમના ફ્રૅન્ચાઇઝીએ નવા બોલિંગ-કોચ તરીકે પારસ મ્હામ્બ્રેને જવાબદારી સોંપી છે.

મ્હામ્બ્રે તાજેતરમાં જ ટીમ ઇન્ડિયાને કોચિંગ આપી ચૂક્યો છે. જૂનમાં ભારતની જે ટીમ ટી-20 વર્લ્ડ કપ જીતી એ ટીમનો બોલિંગ-કોચ મ્હામ્બ્રે હતો.

ઉલ્લેખનીય છે કે મ્હામ્બ્રેની નિયુક્તિ પહેલાં મુંબઈ ઇન્ડિયન્સે શ્રીલંકાના ભૂતપૂર્વ કૅપ્ટન માહેલા જયવર્દનેને હેડ-કોચ તરીકેની મહત્ત્વની જવાબદારી સોંપી હતી.

આપણ વાંચો: નીતિશ, રિન્કુ, હાર્દિકની આઇપીએલ સ્ટાઇલ-બૅટિંગ…

શ્રીલંકાનો ભૂતપૂર્વ ફાસ્ટ બોલર લસિથ મલિન્ગા મુંબઈ ઇન્ડિયન્સ સાથે જોડાયેલો જ છે અને હવે મ્હામ્બ્રેની નિયુક્તિથી આ ટીમની કોચિંગ સ્ટાફની ટીમ વધુ મજબૂત બની છે.

મ્હામ્બ્રે ડોમેસ્ટિક કરીઅર દરમ્યાન મુંબઈ વતી રાઇટ-આર્મ ફાસ્ટ બોલર તરીકેની મોટી જવાબદારી સંભાળતો હતો. તે ભારત વતી બે ટેસ્ટ અને ત્રણ વન-ડે રમ્યો હતો, પરંતુ ફર્સ્ટ-ક્લાસ ક્રિકેટની કારકિર્દી શાનદાર હતી. તેણે 105 ઇનિંગ્સમાં 284 વિકેટ લીધી હતી અને 1,665 રન બનાવ્યા હતા. તેણે લિસ્ટ-એ સ્તરની 83 મૅચમાં 111 વિકેટ લીધી હતી. ક્રિકેટ પ્લેયર તરીકેની કારકિર્દી બાદ તે ઘણા વર્ષોથી કોચિંગ આપવામાં વ્યસ્ત છે.