અમદાવાદ: ગુજરાત સરકાર અને અમદાવાદ મ્યુનિસિપલ કોર્પોરેશન (AMC)ના વરિષ્ઠ અધિકારીઓનું એક પ્રતિનિધિમંડળ 2030માં યોજાનારી કોમનવેલ્થ ગેમ્સની યજમાની માટે રાજ્યની બિડ રજૂ કરવા સ્કોટલેન્ડ જવા રવાના થયું છે. ગુજરાત સરકાર અમદાવાદને આંતરરાષ્ટ્રીય મલ્ટી-સ્પોર્ટ ઇવેન્ટના યજમાન શહેર તરીકે રજૂ કરવા માટે મક્કમ છે અને આ માટે સંપૂર્ણ તૈયારીઓ સાથે બિડ રજૂ કરવામાં આવશે.
આ પ્રતિનિધિમંડળ ગ્લાસગોમાં 24 થી 27 નવેમ્બર દરમિયાન યોજાનારી કોમનવેલ્થ ગેમ્સ જનરલ એસેમ્બલીની બેઠકો દરમિયાન ગુજરાતનું પ્રેઝન્ટેશન રજૂ કરશે. રાજ્યના અધિકારીઓ AMC કમિશનર સાથે મળીને અમદાવાદની તૈયારીઓ અને આ મહાકાય રમતગમત કાર્યક્રમ માટે પ્રસ્તાવિત માળખાગત સુવિધાઓની વિસ્તૃત રૂપરેખા રજૂ કરશે. આ બિડમાં ખાસ કરીને શહેરના નવા વિકસિત આંતરરાષ્ટ્રીય કક્ષાના વીર સાવરકર સ્પોર્ટ્સ કોમ્પ્લેક્સ, નારણપુરાને મુખ્ય સ્થળ તરીકે રજૂ કરવામાં આવી રહ્યું છે, જે આ ઇવેન્ટ માટે અમદાવાદની સજ્જતા દર્શાવે છે.
જો અમદાવાદને આ પ્રતિષ્ઠિત ઇવેન્ટની યજમાની મળે છે, તો તે ગુજરાત અને સમગ્ર દેશ માટે ગૌરવની ક્ષણ હશે. આનાથી રાજ્યમાં રમતગમતનું માળખું વધુ સુદૃઢ બનશે અને આંતરરાષ્ટ્રીય સ્તરે ગુજરાતની ઓળખ ઊભી થશે. દાયકાઓથી રમતગમત અને માળખાગત વિકાસ પર કેન્દ્રિત રાજ્ય સરકારના પ્રયાસો હવે 2030 કોમનવેલ્થ ગેમ્સની યજમાની મેળવવાના આ સ્વપ્નને સાકાર કરવા તરફ આગળ વધી રહ્યા છે.
