કોહલીના રંગમાં ભંગઃ સદીના સેલિબ્રેશન વખતે તેનો ચાહક સલામતી કવચ ભેદીને દોડી આવ્યો અને પગે પડ્યો

રાંચીઃ ભારતમાં ક્રિકેટની રમત ધર્મની જેમ પૂજાય છે અને સચિન તેન્ડુલકર તથા મહેન્દ્રસિંહ ધોની જેવા લેજન્ડને તેમના ઘણા ચાહકો ક્રિકેટના ભગવાન માનતા હોય છે અને એમાં હવે વિરાટ કોહલીનો પણ સમાવેશ થયો છે એમ કહી શકાય, કારણકે રવિવારે રાંચીમાં છગ્ગા-ચોક્કાના વરસાદ વચ્ચે બાવનમી વન-ડે સદી ફટકારનાર કોહલીને પગે લાગવા તેનો એક ચાહક સલામતી કવચ ભેદીને તેની પાસે દોડી આવ્યો હતો.

ક્રિકેટ જગતના ફિટેસ્ટ ખેલાડી કોહલી (Kohli)એ 48મા બૉલ પર 50મો રન અને 102 નંબરના બૉલ પર ચોક્કા સાથે સેન્ચુરી (century) પૂરી કરી હતી. સદી પૂરી થતાં જ તે હવામાં ઊંચે કૂદ્યો હતો, બૅટ તથા હેલ્મેટ તેમ જ ગ્લવ્ઝ કાઢીને નીચે રાખ્યા હતા અને ગળાના ચેઇનના લૉકેટને ચૂમી લીધું હતું તેમ જ આકાશ તરફ જોઈને ઈશ્વરને તેમ જ સ્વર્ગસ્થ પિતાને યાદ કર્યા હતા.

આ પણ વાંચો : મોટેરા ઇલેવન: માહીના ચાહક જય જાનીને પકડવા 11 સિક્યૉરિટી ગાર્ડ આવી ગયા, અમદાવાદમાં છ મહિનામાં બીજી ઘટના

જોકે સ્ફૂર્તિલા કોહલીના આ સેલિબ્રેશનના રંગમાં ભંગ પાડવા તેનો જ એક ચાહક સલામતી રક્ષકોની નજર ચૂકાવીને પિચ સુધી દોડી આવ્યો હતો અને કોહલીને પગે પડ્યો હતો. કોહલીએ જાતે તેને ઊભા કરવાની કોશિશ કરી હતી ત્યાં જ સિક્યૉરિટી ગાર્ડસ દોડી આવ્યા હતા.

કોહલીને તેનો કોઈ ચાહક મેદાન પર મળવા આવે કે ભેટવા આવે એવું વારંવાર બને છે. એ જોતાં, કોહલીની તેમ જ ક્રિકેટરોની સલામતી બાબતમાં ઘણા સ્ટેડિયમોમાં મોટી કચાશ છે. રાંચી કોહલીનું ફેવરિટ સ્થળ છે અને ત્યાં તેણે આ શહેરમાં ત્રીજી સદી પૂરી કર્યા બાદ જાણે કોઈ પ્રકારના સંતોષનો અહેસાસ કર્યો હોય એવો ભાવ તેના ચહેરા પર જોવા મળ્યો હતો. ઉલ્લેખનીય છે કે તેનો ગુરુ અને ક્રિકેટ-લેજન્ડ એમએસ ધોની રાંચીનો જ રહેવાસી છે. બે દિવસ પહેલાં કોહલી ઉપરાંત રિષભ પંત અને ઋતુરાજ ગાયકવાડ જ્યારે ધોનીના ઘરે ડિનર પર ગયા હતા ત્યારની તસવીરો અને વીડિયો વાઇરલ થયા છે.

કોહલીએ રવિવારે રોહિત શર્મા (51 બૉલમાં 57 રન) સાથે બીજી વિકેટ માટે 109 બૉલમાં 136 રનની બહુમૂલ્ય ભાગીદારી કરી હતી.