યશસ્વી ભવઃ રાજસ્થાન શાનથી જીત્યું

મુલ્લાંપુરઃ રાજસ્થાન રૉયલ્સે (RR) આજે અહીં પંજાબ કિંગ્સ (PBKS)ની યજમાન ટીમને 50 રનથી હરાવીને લાગલગાટ બીજી જીત મેળવી હતી. ઓપનર યશસ્વી જયસ્વાલ (67 રન, 45 બૉલ, પાંચ સિક્સર, ત્રણ ફોર) ત્રણ મૅચની નિષ્ફળતા બાદ આજે ફૉર્મમાં આવી જતાં રાજસ્થાનની ટીમ જાણે અસલ મિજાજમાં આવી ગઈ હોય એવું લાગી રહ્યું છે. રાજસ્થાને ચાર વિકેટે 205 રન બનાવ્યા બાદ શ્રેયસ ઐયરના સુકાનમાં પંજાબની ટીમ 20 ઓવરમાં નવ વિકેટે 155 રન બનાવી શકી હતી.
પંજાબે આ વખતે આઈપીએલ (IPL 2025)ની બન્ને મૅચ જીત્યા બાદ પહેલી વાર હાર જોઈ છે. હવે એકમાત્ર દિલ્હીની ટીમ ત્રણેય વિજય સાથે અપરાજિત રહી છે.
પંજાબે 206 રનનો લક્ષ્યાંક મળ્યા બાદ પહેલી જ ઓવરના બે ઝટકા સાથે શરૂઆત કરી હતી.

રાજસ્થાનના જોફ્રા આર્ચરે પ્રથમ ઓવરમાં પ્રિયાંશ આર્ય (0) અને કૅપ્ટન શ્રેયસ ઐયર (10 રન)ને આઉટ કર્યા હતા. 43 રનમાં પંજાબની ચાર વિકેટ પડી ચૂકી હતી. ત્યાર બાદ નેહલ વઢેરા (62 રન, 41 બૉલ, ત્રણ સિક્સર, ચાર ફોર) અને ગ્લેન મૅક્સવેલ (30 રન, 21 બૉલ, એક સિક્સર, ત્રણ ફોર) વચ્ચે પાંચમી વિકેટ માટે 88 રનની ભાગીદારી થઈ હતી. જોકે 131 રનના સ્કોર પર મૅક્સવેલ અને વઢેરા વિકેટ ગુમાવી બેસતાં પંજાબ માટે જીતવું અશક્ય થઈ ગયું હતું. મૅક્સવેલને થીકશાનાએ અને વઢેરાને હસરંગાએ આઉટ કર્યો હતો. આર્ચરે સૌથી વધુ ત્રણ વિકેટ તેમ જ સંદીપ શર્મા, થીકશાનાએ બે-બે વિકેટ લીધી હતી.

બે દિવસ પહેલાં ડોમેસ્ટિક ક્રિકેટમાં મુંબઈની ટીમ છોડીને ગોવાની ટીમમાં જોડાઈ ગયેલા યશસ્વીએ એક રીતે રાજસ્થાનના સુકાની અને નાનપણના મિત્ર સૅમસનનું ગઈ કાલની કથન સાચું પાડ્યું હતું. કૅપ્ટન સૅમસને કહ્યું હતું કે `યશસ્વી પ્રૅક્ટિસમાં ખૂબ મહેનત કરી રહ્યો છે, તે બહુ જલદી ફૉર્મમાં આવી જ જશે અને અમે જીતવા લાગશું.’
યશસ્વી અને સૅમસન (38 રન, 26 બૉલ, છ ફોર) વચ્ચે પ્રથમ વિકેટ માટે 89 રનની ભાગીદારી થઈ હતી. છેક 11મી ઓવરમાં સૅમસનની વિકેટ પડ્યા પછી ભૂતપૂર્વ
કાર્યવાહક સુકાની રિયાન પરાગ (43 અણનમ, પચીસ બૉલ, ત્રણ સિક્સર, ત્રણ ફોર) બૅટિંગમાં આવ્યો હતો અને યશસ્વી સાથે તેની 34 રનની ભાગીદારી થઈ હતી.

નીતીશ રાણા ફક્ત 12 રન બનાવીને ફરી સસ્તામાં આઉટ થઈ ગયો હતો, પરંતુ શિમરૉન હેટમાયરે 20 રનનું અને વિકેટકીપર ધ્રુવ જુરેલે અણનમ 13 રનનું યોગદાન આપીને રાજસ્થાનની ટીમને ટોટલ 200ની ઉપર લઈ જવામાં મદદ કરી હતી.

પંજાબના કૅપ્ટન શ્રેયસ ઐયરે કુલ છ બોલર અજમાવ્યા હતા જેમાં ન્યૂ ઝીલૅન્ડનો ફાસ્ટ બોલર લૉકી ફર્ગ્યુસનને સૌથી વધુ બે વિકેટ તેમ જ અર્શદીપ સિંહ તથા માર્કો યેનસેનને એક-એક વિકેટ મળી હતી. મૅક્સવેલ, ચહલ અને સ્ટોઇનિસ એકેય વિકેટ નહોતા લઈ શક્યા.
મૅચની શરૂઆત પહેલાં શાંદસર ઓપનિંગ સેરેમની યોજાઈ હતી. અમેરિકી સિંગર જાઝમીન સેન્ડલ્સે શાનદાર પર્ફોર્મ કર્યું હતું.