માર્શની `ફાસ્ટેસ્ટ સેન્ચુરી’એ લખનઊને 235/2નો તોતિંગ સ્કોર અપાવ્યો
અમદાવાદઃ લખનઊ સુપર જાયન્ટ્સ (LSG)એ અહીં ગુજરાત ટાઇટન્સ (GT) સામેની લીગ મૅચમાં બૅટિંગ મળ્યા પછી 20 ઓવરમાં માત્ર બે વિકેટે 235 રન બનાવ્યા હતા. પ્લે-ઑફની રેસમાંથી બહાર થઈ ગયેલા લખનઊ માટે આ મૅચનો કોઈ જ મતલબ નથી, પરંતુ ગુજરાતને ટોચના બે સ્થાનમાં રહેવા આ મૅચ ખૂબ મહત્ત્વની છે.
લખનઊની ટીમ બાકીની લીગ મૅચો જીતીને આબરૂ સાચવવા દૃઢ છે. એનો ઓપનર મિચલ માર્શ (117 રન, 64 બૉલ, આઠ સિક્સર, દસ ફોર) આઇપીએલ (IPL)ની આ સીઝનનો સાતમો અને લખનઊનો પ્રથમ સેન્ચુરિયન (CENTURION) બન્યો હતો. તેણે 56 બૉલમાં સદી ફટકારી હતી અને એલએસજી વતી સેન્ચુરી ફટકારી ચૂકેલા ખેલાડીઓમાં તેની આ સદી ફાસ્ટેસ્ટ છે.
માર્શે પહેલાં એઇડન માર્કરમ (36 રન, 24 બૉલ, બે સિક્સર, ત્રણ ફોર) સાથે 91 રનની ભાગીદારી કરી હતી અને પછી નિકોલસ પૂરન (56 અણનમ, 27 બૉલ, પાંચ સિક્સર, ચાર ફોર) સાથે બીજી વિકેટ માટે 121 રનની પાર્ટનરશિપ કરી હતી. કૅપ્ટન રિષભ પંત બે સિક્સરની મદદથી બનાવેલા 16 રને અણનમ રહ્યો હતો.
લખનઊની બેમાંથી એક વિકેટ ગુજરાતના અર્શદ ખાને અને બીજી વિકેટ સાઇ કિશોરે લીધી હતી.
લખનઊના કૅપ્ટન રિષભ પંતે ટૉસ વખતે કહ્યું હતું કે ` હું ટૉસ જીત્યો હોત તો મેં પણ ફીલ્ડિંગ જ પસંદ કરી હોત. અમે સ્પર્ધાની બહાર થઈ ગયા છીએ, પરંતુ અમે ગૌરવ જાળવવા માટે કોઈ કસર બાકી નહીં રાખીએ.’
શુભમન ગિલના ટૉસ વખતે કહ્યું હતું કે ` અમદાવાદના મેદાનની પિચ ઘણી સારી છે અને એના પર અમે લક્ષ્યાંક ચેઝ કરવાનું પસંદ કર્યું. અમે પ્લે-ઑફમાં પહોંચી ગયા છીએ, પણ બાકીની બન્ને લીગ મૅચને અમે ખૂબ મહત્ત્વની ગણીએ છીએ. અમે જીતવાના જોશ અને જુસ્સા સાથે પ્લે-ઑફમાં રમવા માગીએ છીએ.’
આ પણ વાંચો…મુંબઈ ઈન્ડિયન્સની જિત માટે Akash Ambaniએ કર્યું કંઈક એવું કે… વીડિયો થયો વાઈરલ…