હર્ષલનો ચાર વિકેટનો તરખાટ, હૈદરાબાદે પણ પહેલી ઓવરમાં વિકેટ ગુમાવી…

ચેન્નઈઃ આઈપીએલ (IPL-2025)માં અહીં સનરાઇઝર્સ હૈદરાબાદ (SRH) સામે ચેન્નઈ સુપર કિંગ્સ (CSK)ની ટીમે અહીં બૅટિંગ મળ્યા પછી 154 રન કર્યા ત્યાર બાદ હૈદરાબાદની ટીમે પણ ચેન્નઈની માફક પહેલી જ ઓવરમાં વિકેટ ગુમાવી હતી. ચેન્નઈનો ઓપનર શેખ રાશીદ ઇનિંગ્સના પહેલા જ બૉલમાં કૅચઆઉટ થયો હતો તો હૈદરાબાદનો ઓપનર અભિષેક શર્મા દાવના બીજા બૉલ પર કૅચ આપી બેઠો હતો. હૈદરાબાદ વતી પેસ બોલર હર્ષલ પટેલે (HARSHAL PATEL) સૌથી વધુ ચાર વિકેટ લઈને ચેન્નઈની ટીમને મર્યાદિત રખાવી હતી.

શેખ રાશીદની વિકેટ હૈદરાબાદના મોહમ્મદ શમીએ અને અભિષેકની વિકેટ ચેન્નઈના ખલીલ અહમદે લીધી હતી.
દરમ્યાન ચેન્નઈના 154 રનમાં ડેવાલ્ડ બ્રુવિસના 42 રન હાઇએસ્ટ હતા. તેણે પચીસ બૉલની ટૂંકી ઇનિંગ્સમાં ચાર સિક્સર અને એક ફોર ફટકારી હતી. ઓપનર આયુષ મ્હાત્રેએ છ ચોક્કાની મદદથી 30 રન, દીપક હૂડાએ એક સિક્સર, એક ફોરની મદદથી બાવીસ રન અને રવીન્દ્ર જાડેજાએ એક સિક્સર અને એક ફોરની મદદથી 21 રન કર્યા હતા.

હૈદરાબાદ વતી હર્ષલ ઉપરાંતના બોલર્સમાં પૅટ કમિન્સ તથા જયદેવ ઉનડકટે બે-બે વિકેટ અને શમી તથા કામિન્ડુ મેન્ડિસે એક-એક વિકેટ લીધી હતી. ચેન્નઈની ટીમને ચેપૉકના હોમ-ગ્રાઉન્ડ પર પ્રથમ બૅટિંગમાં સનરાઇઝર્સને મોટો લક્ષ્યાંક આપવાની તક મળી હતી જે એણે ગુમાવી હતી. હૈદરાબાદે મોહમ્મદ શમી અને કામિન્ડુ મેન્ડિસને ઇલેવનમાં સમાવ્યા, જ્યારે ચેન્નઈની ટીમમાં રચિન રવીન્દ્રના સ્થાને ડેવાલ્ડ બ્રેવિસને અને વિજય શંકરના સ્થાને દીપક હૂડાને સામેલ કરવામાં આવ્યા.