ચેન્નઈના બે અહમદે મુંબઈને 155/9 સુધી સીમિત રાખ્યું
ચેન્નઈઃ મુંબઈ ઇન્ડિયન્સ (MI)ની ટીમે અહીં આઇપીએલ (IPL 2025)માં આજે પોતાના પહેલા જ મુકાબલામાં બૅટિંગ મળ્યા બાદ 20 ઓવરમાં નવ વિકેટે ફક્ત 155 રન બનાવ્યા હતા. ચેન્નઈ સુપર કિંગ્સ (CSK)ના અહમદ અટકવાળા બે બોલર સૂર્યકુમાર યાદવની ટીમના બૅટર્સને સૌથી ભારે પડ્યા હતા. અફઘાનિસ્તાનના લેફ્ટ-આર્મ સ્પિનર નૂર અહમદે 18 રનમાં ચાર વિકેટ અને ભારતીય લેફ્ટ-હૅન્ડ પેસ બોલર 29 રનમાં ત્રણ વિકેટ લીધી હતી.
સીએસકેના બીજા બે બોલર રવિચન્દ્રન અશ્વિન અને નૅથન એલિસે એમઆઇના એક-એક બૅટરને પૅવિલિયન ભેગા કર્યા હતા. એક તરફ બપોરથી હૈદરાબાદમાં સનરાઇઝર્સ હૈદરાબાદે પ્રથમ બૅટિંગમાં રાજસ્થાન રૉયલ્સ સામે રનનો ખડકલો કરી દીધો હતો ત્યાં એમઆઇ વતી પ્રથમ બૅટિંગ મળ્યા પછી એકેય બૅટર હાફ સેન્ચુરી નહોતો ફટકારી શક્યો. તિલક વર્માના 31 રન ટીમમાં હાઇએસ્ટ હતા.
આ પણ વાંચો: ‘જો હું વ્હીલચેરમાં હોઉં તો…’ ધોનીએ IPLમાંથી નિવૃત્તિ અંગે મૌન તોડ્યું, જાણો શું કહ્યું…
રોહિત શર્માએ મૅચના ચોથા જ બૉલમાં વિકેટ ગુમાવી દીધી હતી. ભારત વતી રમી ચૂકેલા પેસ બોલર ખલીલ અહમદે તેને કલાકે 139 કિલોમીટરની ઝડપે ફેંકેલા બૉલમાં શિવમ દુબેના હાથમાં કૅચઆઉટ કરાવ્યો હતો. રોહિતનો સાથી ઓપનર અને વિકેટકીપર રાયન રિકલ્ટન 13 રનના પોતાના સ્કોર પર ખલીલના જ બૉલમાં ક્લીન બોલ્ડ થયો હતો. 36 રનમાં એમઆઇની ત્રણ વિકેટ પડી ચૂકી હતી. કૅપ્ટન સૂર્યકુમાર (29 રન, 26 બૉલ, એક સિક્સર, બે ફોર) અને તિલક વર્મા (31 રન, પચીસ બૉલ, બે સિક્સર, બે ફોર) વચ્ચે 36 બૉલમાં 51 રનની ભાગીદારી થઈ હતી, પણ ત્યાર બાદ સૂર્યાની વિકેટ સાથે ફરી ધબડકો શરૂ થયો હતો અને ફરી પચીસ રનની પણ કોઈ પાર્ટનરશિપ નહોતી થઈ. ટીમના બીજા નિષ્ફળ બૅટર્સની વિગત આ મુજબ છેઃ વિલ જૅક્સ (11 રન), રૉબિન મિન્ઝ (ત્રણ રન), નમન ધીર (17 રન), મિચલ સૅન્ટનર (11 રન), દીપક ચાહર (બે સિક્સર, બે ફોરની મદદથી 28 અણનમ).
એમઆઇના ગાજ્યા મેઘ વરસ્યા નહીં એવું આ ઇંનિંગ્સમાં જોવા મળ્યું. જોકે વર્ષોથી એમઆઇની પરંપરા રહી છે કે શરૂઆતમાં આ ટીમ ઉપરાઉપરી મૅચો હારી ગયા બાદ સતત વિજય મેળવતા રહીને પૉઇન્ટ્સ-ટેબલમાં પ્રગતિ કરે છે.
હાર્દિક પંડ્યા ગયા વર્ષના સ્લો ઓવર-રેટના અફેન્સને પગલે એક મૅચનું સસ્પેન્શન લાગુ કરાયું હોવાથી આ મૅચમાં નહોતો રમ્યો.