નવી દિલ્હીઃ IPL 2025માં દમદાર પ્રદર્શન બાદ 21 વર્ષીય ક્રિકેટર વિપરાજ નિગમ વિવાદોના વંટોળમાં ફસાયા છે. એક અજાણી મહિલા તેને આંતરરાષ્ટ્રીય નંબર પરથી બ્લેકમેલ કરી રહી છે અને જાનથી મારી નાખવાની ધમકી આપી રહી છે. આ ઘટનાએ ક્રિકેટ જગતમાં ચકચાર મચાવી દીધી છે.
સૂત્રો પાસેથી મળતી જાણકારી પ્રમાણે 9 નવેમ્બરના રોજ વિપરાજને વિદેશી નંબરો પરથી સતત કૉલ્સ આવવા લાગ્યા. મહિલાએ પૈસા અને અન્ય માંગણીઓ કરી, નહીં માને તો એક વીડિયો વાયરલ કરી દેવાની ધમકી આપી. વિપરાજે નંબર બ્લૉક કર્યા પણ બીજા નંબરથી ફરી ત્રાસ શરૂ થયો. આખરે તેણે પોલીસ સ્ટેશનમાં ફરિયાદ નોંધાવી અને માનસિક રીતે હેરાનગતિ તેમ જ બદનામ કરવાના આરોપ લગાવ્યા હતા.
વિપરાજની ફરિયાદના આધારે પોલીસે તાત્કાલિક કેસ નોંધીને તપાસ શરૂ કરી દીધી છે. કૉલ ડિટેઇલ્સ, ડિજિટલ પુરાવા અને કૉલ ક્યાંથી આવ્યા તેની શોધ ચાલુ છે. વિપરાજનો પરિવાર પણ આ ઘટનાથી ભયભીત છે. તેઓ નથી ઇચ્છતા કે તેમનો દીકરો કોઈ વિવાદમાં ફસાય.
વિપરાજ નિગમ 2024થી ઉત્તર પ્રદેશ માટે ક્રિકેટ રમે છે. IPL 2025માં દિલ્હી કેપિટલ્સે તેને 50 લાખ રૂપિયામાં ખરીદ્યો હતો. તેણે 14 મેચમાં 142 રન ફટકાર્યા અને 11 વિકેટ પણ લીધી હતી. આ પ્રદર્શનથી તે રાતોરાત સ્ટાર બન્યો, પણ હવે એ જ સ્ટારડમ તેના માટે મુસીબત બન્યું છે
