લખનઊઃ અહીંયા નેધરલેન્ડ અને શ્રીલંકા વચ્ચે રમાયેલી વર્લ્ડ કપની વનડે મેચમાં શ્રીલંકાને સૌથી પહેલી જીત મળી હતી. શ્રીલંકાએ દસ બોલ બાકી હતા ત્યારે પાંચ વિકેટે નેધરલેન્ડને હરાવ્યું હતું. પહેલા દાવમાં નેધરલેન્ડે 262 રન માર્યા હતા, જેના જવાબમાં સદીરા સમરવિક્રમા અને પથુમ નિશંકા, ચરિથ અસાલંકાએ નોંધપાત્ર ઈનિંગ રમતા શ્રીલંકાનો વિજય થયો હતો. વન-ડે વર્લ્ડ કપમાં શ્રીલંકાની આ પહેલી જીત છે.
લખનઊના એકાના સ્પોર્ટસ સિટી ખાતે નેધરલેન્ડ અને શ્રીલંકાની મેચમાં સૌથી પહેલા ટોસ નેધરલેન્ડ જીત્યું હતું. પહેલી બેટિંગ લેતા નેધરલેન્ડવતીથી સાયબ્રાન્ડ એન્જેલબ્રેચે 82 બોલમાં 70, લોગાન વાન બીકે 75 બોલમાં 59 રન તથા કોલિન આકરમાને 31 બોલમાં 29 રન કર્યા હતા, જ્યારે દિલશાન મધુશંકા, કસુન રજિંથા, મહીશ થીકશાનાએ તબક્કાવાર મહત્ત્વની વિકેટ ઝડપી હતી. બીજા દાવમાં શ્રીલંકા 263 રનનો ટાર્ગેટ અચીવ કરવા માટે રમ્યું હતું. શ્રીલંકાવતીથી સદીરા સમરવિક્રમાએ 107 બોલમાં 91 રને નોટ આઉટ રહ્યો હતો, જ્યારે પથુમ નિશંકાએ બાવન બોલમાં 54 રન તથા ચરિથ અસલન્કાએ 66 બોલમાં 44 રન કર્યા હતા.
નેધરલેન્ડ હાર્યું હોવા છતાં સાયબ્રાન્ડ અને લોગાન વેન બીકે વર્લ્ડ કપની વન-ડે મેચમાં નવો રેકોર્ડ નોંધાવ્યો હતો. Sybrand Engelbrecht અને Logan van Beekએ બંનેએ સાથે મળીને કપિલ દેવ અને સૈયદ કિરમાણીના રેકોર્ડને તોડ્યો હતો. બંનેએ સાથે મળીને 1983ના વર્લ્ડ કપ વખતે ઝિમ્બાબ્વે સામે સાતમી વિકેટ માટે 126 રનની નોટઆઉટ રહીને ભાગીદારી નોંધાવી હતી, જ્યારે આજે બંનેએ 130 રનની ભાગીદારી નોંધાવી હતી.
શ્રીલંકાની બીજા દાવમાં પહેલી વિકેટ કુસર પરેરાની પડી હતી, ત્યારબાદ બાવન રને બીજી, 104 રને ત્રીજી વિકેટ પડી હતી. ચોથી વિકેટ 181 રને તથા ડી. સિલ્વાની 257 રને પાંચમી વિકેટ પડી હતી. નેધરલેન્ડે અગાઉ દક્ષિણ આફ્રિકાને હરાવીને વર્લ્ડ કપમાં સૌથી મોટો અપસેટ સર્જયો હતો. આજની મેચમાં શ્રીલંકાએ વિજય મેળવવાને કારણે નવમા ક્રમે શ્રીલંકા રહી છે, જ્યારે નેધરલેન્ડ આઠમાં ક્રમે છે. નેધરલેન્ડના બે પોઈન્ટ તથા શ્રીલંકાના બે પોઈન્ટ થયા છે. બંને ટીમને અત્યાર સુધીમાં ચાર-ચાર મેચ રમી છે, જ્યારે બંનેને એકએક જીત થઈ છે.