નવી દિલ્હીઃ મહિલાઓની વન-ડે (ODI) ફૉર્મેટમાં ઑસ્ટ્રેલિયા (AUSTRALIA) વર્લ્ડ નંબર-વન અને ભારત (INDIA) નંબર-ટૂ છે અને શનિવારે (બપોરે 1.30 વાગ્યાથી) ટોચની આ બે ટીમ વચ્ચે જે મુકાબલો છે એ ભારત માટે ઐતિહાસિક બની શકે એમ છે, કારણકે વન-ડે સિરીઝ 1-1થી બરાબરીમાં રહ્યા બાદ હવે શનિવારે ભારત જીતશે તો પહેલી જ વખત ઑસ્ટ્રેલિયા સામે ભારતે વન-ડે શ્રેણીની ટ્રોફી જીતી કહેવાશે.
વર્લ્ડ ચૅમ્પિયન ઑસ્ટ્રેલિયા સામે ભારતની મહિલા ક્રિકેટરો ક્યારેય દ્વિપક્ષી શ્રેણી નથી જીતી શકી. હરમનપ્રીત કૌરની કૅપ્ટન્સીમાં ભારત આ મૅચ અને સિરીઝ જીતશે તો 30મી સપ્ટેમ્બરે ઘરઆંગણે (અને શ્રીલંકામાં) શરૂ થનારા વન-ડેના વર્લ્ડ કપ ભારતીય ટીમ ખૂબ પ્રોત્સાહિત થશે.
ઑસ્ટ્રેલિયા જેવી ધરખમ ટીમ સામે પહેલી વાર સિરીઝ જીતવી આસાન કામ તો નથી, પરંતુ બે દિવસ પહેલાં આ જ ટીમ સામે 102 રનના વિક્રમજનક માર્જિનથી ભારતીય ટીમે વિજય મેળવીને અલીઝા હિલીની ટીમને સંકેત આપી દીધો હતો કે હવે તેમને સિરીઝ જીતતાં કોઈ નહીં રોકી શકે. મહિલા વન-ડેમાં ઑસ્ટ્રેલિયા આ પહેલાં વન-ડેના ઇતિહાસમાં ક્યારેય આટલા તોતિંગ માર્જિનથી નહોતું હાર્યું.
ભારતીય બૅટર્સમાં ખાસ કરીને વાઇસ-કૅપ્ટન સ્મૃતિ મંધાના, ઓપનર પ્રતીકા રાવલ અને વિકેટકીપર રિચા ઘોષ બહુ સારા ફૉર્મમાં છે, જ્યારે બોલિંગમાં પેસ બોલર ક્રાંતિ ગૌડ અને સ્પિનર દીપ્તિ શર્મા ઑસ્ટ્રેલિયન બૅટર્સને ભારે પડી શકે.
