ક્રિકેટમાં ઇંગ્લૅન્ડ સામે ભારતની એક જ દિવસમાં બે ટક્કર, પહેલાં ક્વાલાલમ્પુરમાં અને પછી પુણેમાં

પુણે/ક્વાલાલમ્પુરઃ ભારતીય પુરુષ ક્રિકેટરોના ઘરઆંગણે ઇંગ્લૅન્ડ સામે ટી-20 મુકાબલા ચાલી રહ્યા છે અને ત્યાર બાદ વન-ડેમાં પણ ટક્કર થશે એ જોતાં હજી મહિના સુધી ક્રિકેટ જગતમાં ભારત-ઇંગ્લૅન્ડ વચ્ચેનો ક્રિકેટ-રોમાંચ છવાયેલો રહેશે. આટલું જાણે પૂરતું ન હોય એમ મહિલા ક્રિકેટમાં પણ ભારત-ઇંગ્લૅન્ડની ટક્કર થવા જઈ રહી છે. આ મુકાબલામાં ભારતની ગર્લ્સ ટીમ વિજય મેળવવા માટે ફેવરિટ ગણાય છે.

વાત એમ છે કે આવતી કાલે (શુક્રવારે) એક તરફ પુણેમાં સૂર્યકુમાર યાદવના સુકાનમાં ટીમ ઇન્ડિયાની જૉસ બટલરની બ્રિટિશ ટીમ સામે ચોથી ટી-20 રમાશે. ભારતીય ટીમ પાંચ મૅચની શ્રેણીમાં 2-1થી આગળ છે અને હવે પુણેમાં પણ વિજય મળી જશે તો સિરીઝની ટ્રોફી ભારતના કબજામાં આવી જશે. આ મૅચ સાંજે 7.00 વાગ્યે શરૂ થશે.

એ પહેલાં, બપોરે 12.00 વાગ્યે મલયેશિયાના ક્વાલાલમ્પુરમાં ભારતની ગર્લ્સ અન્ડર-19 ટીમ ટીમનો ટી-20 વર્લ્ડ કપમાં ઇંગ્લૅન્ડ સામે મુકાબલો શરૂ થશે. આ મુકાબલો જેવો તેવો નહીં, પણ સેમિ ફાઇનલનો છે. નિકી પ્રસાદના સુકાનમાં ભારતની વિમેન્સ ટીમ સુપર-સિક્સ રાઉન્ડની તમામ ચારેય મૅચ જીતીને સેમિ ફાઇનલમાં પહોંચી છે, જ્યારે ઇંગ્લૅન્ડે ચારમાંથી બે મૅચ જીતી હતી, પરંતુ એની બે મૅચ વરસાદને લીધે અનિર્ણીત રહી હતી.

સુપર-સિક્સ રાઉન્ડની તમામ 12 ટીમમાં ભારત આઠ પૉઇન્ટ સાથે મોખરે રહ્યું છે. 2023માં પહેલી વાર ગર્લ્સ અન્ડર-19 ટી-20 વર્લ્ડ કપ રમાયો એમાં શેફાલી વર્માના સુકાનમાં ભારતીય ટીમ ચૅમ્પિયન બની હતી અને ડિફેન્ડિંગ ચૅમ્પિયન તરીકે આ સ્પર્ધામાં ભારત રમી રહ્યું છે.

ભારતીય ટીમે અત્યાર સુધીમાં આ ટૂર્નામેન્ટની બધી મૅચોમાં હરીફ ટીમને કચડીને વિજય પ્રાપ્ત કર્યો છે, જ્યારે ઇંગ્લૅન્ડની ટીમ બે મૅચ માંડ-માંડ જીતી હતી.

આ પણ વાંચો : અફઘાનિસ્તાનની મહિલા ક્રિકેટરો દેશમાંથી ભાગી ગયા બાદ પહેલી જ વાર મૅચ રમી!

ગ્રૂપ-સ્ટેજમાં ભારતે વેસ્ટ ઇન્ડિઝ, મલયેશિયા અને શ્રીલંકાને હરાવ્યું હતું, જ્યારે સુપર-સિક્સમાં બાંગ્લાદેશ અને સ્કૉટલૅન્ડ સામે આસાન વિજય મેળવ્યો હતો.

ભારતની ટીમમાં ઐતિહાસિક સેન્ચુરી નોંધાવી ચૂકેલી ઓપનર જી. તૃષા, બીજી ઓપનર જી. કમલિની તેમ જ અન્ય બૅટર્સ સનિકા ચળકે તેમ જ બોલિંગમાં વૈષ્ણવી શર્મા, વી. જે. જોશિથા, આયુષી શુક્લા, શબનમ શકીલ, પારુણિકા સિસોદિયા, સોનમ યાદવ, અને મિથિલા વિનોદનો સમાવેશ છે.

ગર્લ્સ અન્ડર-19 ટી-20 વર્લ્ડ કપની આવતી કાલની પ્રથમ સેમિ ફાઇનલ ઑસ્ટ્રેલિયા અને સાઉથ આફ્રિકા વચ્ચે (ભારતીય મુજબ સવારે 8.00 વાગ્યાથી) રમાશે અને ત્યાર બાદ ભારત-ઇંગ્લૅન્ડ વચ્ચે બપોરે 12.00 વાગ્યે બીજી સેમિ ફાઇનલ શરૂ થશે.