ભારતની મૅચોને હજી ચાર મહિના બાકી છે, ટિકિટો અત્યારથી જ `સૉલ્ડ આઉટ’…

મેલબર્નઃ ભારતીય ક્રિકેટરોની ઑસ્ટ્રેલિયા ખાતેની વન-ડે અને ટી-20 ટૂરને હજી ચાર મહિના (Four months)નો સમય બાકી છે, પણ ઑસ્ટ્રેલિયન ક્રિકેટ બોર્ડે આઠ મૅચની 90,000 ટિકિટ (tickets) અત્યારથી વેચી નાખી છે અને એમાં પણ ભારતની સિડની (Sydney) ખાતેની વન-ડેની તેમ જ કૅનબેરા (Canberra) ખાતેની ટી-20 મૅચની તમામ ટિકિટો અત્યારથી વેચાઈ ગઈ છે.

ભારતીય ટીમ આગામી ઑક્ટોબર-નવેમ્બરમાં ઑસ્ટ્રેલિયાના પ્રવાસે જશે જેમાં ત્રણ વન-ડે અને પાંચ ટી-20 મૅચ રમાશે. શ્રેણીમાં સિડનીની મૅચ ત્રીજી અને કૅનબેરાની ટી-20 પ્રથમ હશે. એ ટૂરમાં ભારતીયોની અંતિમ મૅચ આઠમી નવેમ્બરે બ્રિસ્બેનમાં રમાશે.

ક્રિકેટ ઑસ્ટ્રેલિયા (સીએ)એ એક નિવેદનમાં જણાવ્યું છે, ઑસ્ટ્રેલિયા વિરુદ્ધ ભારતની ઑક્ટોબર-નવેમ્બરની સિરીઝોની મૅચોમાં લોકોનો પ્રચંડ પ્રતિસાદ જોવા મળ્યો છે. ખાસ કરીને ભારતીય મૂળના ક્રિકેટપ્રેમીઓ એ મૅચો જોવા માટે ખૂબ ઉત્સાહિત છે. 16 ટકાથી વધુ ટિકિટો ભારતીયોની ફૅન ક્લબોએ ખરીદી છે. સિડની-કૅનબેરા મૅચની તમામ ટિકિટો વેચાઈ ગઈ છે, મેલબર્ન ખાતેની ટી-20 અને ગૅબા ખાતેની ટી-20 માટે પણ બહુ સારો પ્રતિસાદ જોવા મળ્યો છે.’ ક્રિકેટ બોર્ડના જણાવ્યા અનુસાર, ઑસ્ટ્રેલિયા સામેની ટિકિટો ખરીદવામાં ભારત આર્મી સૌથી સક્રિય ફૅન ક્લબોમાંથી એક છે.

આ ક્લબે 2,400 ટિકિટ ખરીદી છે. ફૅન્સ ઇન્ડિયાએ 1,400 ટિકિટ મેળવી છે. અગરવાલ સમુદાયની બ્રિસ્સી બનિયાઝ નામની ક્લબના અમિત ગોયલે ગૅબાની ટી-20 માટેની 880 ટિકિટ ખરીદી છે અને તેઓ એક મૅચની વ્યક્તિગત રીતે સૌથી વધુ ટિકિટ ખરીદનાર ક્રિકેટફૅન બન્યા છે. ભારતીય સમુદાયની જ ગોલ્ડ કોસ્ટ તથા પકકા લૉકલ ક્લબે ગોલ્ડ કોસ્ટ અને મેલબર્નની ટી-20ની 500થી વધુ ટિકિટો ખરીદી છે.’