ભારતનું નબળું ફાઇટ-બૅક, પંતનો વન મૅન શૉ

મુંબઈ: ભારતને અહીં વાનખેડે સ્ટેડિયમમાં ન્યૂ ઝીલેન્ડ સામે ત્રીજા દિવસે ત્રીજી અને અંતિમ ટેસ્ટ જીતવા માટે 147 રનનો સાવ સાધારણ લક્ષ્યાંક મળ્યો હતો. જોકે ભારતને આ નાનો ટાર્ગેટ પણ મોટો લાગી રહ્યો છે.

રોહિત સહિતનો ટૉપ ઑર્ડર ફરી ફ્લૉપ ગયો હતો, પરંતુ રિષભ પંત (53 નોટઆઉટ, 50 બૉલ, એક સિક્સર, 7 ફોર) હજીયે એકલા હાથે લડી રહ્યો છે. લંચ વખતે ભારતનો સ્કોર છ વિકેટે 92 રન હતો.

પંતની સાથે વોશિંગ્ટન સુંદર છ અને રમી રહ્યો હતો. રવિચંદ્રન અશ્વિન, આકાશ દીપ અને મોહમ્મદ સિરાજ બૅટિંગમાં આવવાના બાકી હતા.

ભારતે પહેલી 7.1 ઓવરમાં ફક્ત 29 રનમાં પાંચ વિકેટ ગુમાવી દીધી હતી, પણ પંત અને રવીન્દ્ર જાડેજા (22 બૉલમાં છ રન ) વચ્ચે છઠ્ઠી વિકેટ માટે 42 રનની ભાગીદારી થઈ હતી જે સોળમી ઓવરમાં તૂટી હતી.

એ પહેલાં, કેપ્ટન રોહિત શર્મા (11 બૉલમાં 11 રન)એ ફરી અસંખ્ય ચાહકોને નિરાશ કર્યા હતા. તે ઇનિંગ્સની ત્રીજી ઓવરમાં આઉટ થઈ ગયો હતો. પેસ બોલર મૅટ હેન્રીના બૉલમાં ગ્લેન ફિલિપ્સે મિડ-વિકેટ પરથી દોડી આવીને તેનો સુંદર કૅચ પકડ્યો હતો.

રોહિત સતતપણે નિષ્ફ્ળ જઈ રહ્યો છે. તે આઉટ થયા બાદ બીજી જ ઓવરમાં શુભમન ગિલ (ચાર બૉલમાં એક રન) વિકેટ ગુમાવી બેઠો હતો. તેને સ્પિનર એજાઝ પટેલે ક્લીન બોલ્ડ કર્યો હતો.

એજાઝ પટેલ ત્યાર પછીની પોતાની ઓવરમાં ફરી ત્રાટક્યો હતો અને તેણે વિરાટ કોહલી (સાત બૉલમાં એક રન)ની વિકેટ લીધી હતી.

ઓપનર યશસ્વી જયસ્વાલ (16 બૉલમાં પાંચ રન) સાતમી ઓવરમાં સ્પિનર ફિલિપ્સના બૉલમાં આઉટ થઈ ગયો હતો. તેની વિદાય બાદ સરફરાઝ ખાન (એક રન) પણ એજાઝના બૉલમાં વિકેટ ગુમાવી બેઠો હતો.

ભારતની છમાંથી ચાર વિકેટ એજાઝ ખાને લીધી હતી.
પહેલી બન્ને ટેસ્ટ ભારતે ખરાબ બૅટિંગને લીધે જ ગુમાવી હતી. જોકે હવે સિરીઝમાં ભારતે 0-3ના વાઈટ-વૉશથી બચવાનું છે.

કિવીઓની ટીમ આજે બીજા દાવમાં 174 રનમાં ઑલઆઉટ થઈ ગઈ હતી. સ્પિનર રવીન્દ્ર જાડેજાએ બીજા દાવમાં પણ પાંચ વિકેટનો તરખાટ બતાવ્યો. પ્રથમ દાવની પાંચ વિકેટ સહિત આખી મૅચમાં તેણે કુલ 10 વિકેટ લઈને પોતાની જવાબદારી સંપૂર્ણપણે નિભાવી હતી.

Also Read – ભારતને 147 રનનો લક્ષ્યાંક પણ મોટો લાગી રહ્યો છે, રોહિત સહિતનો ટૉપ ઑર્ડર ફરી ફ્લૉપ

અશ્વિને કિવીઓના બીજા દાવમાં ત્રણ, વૉશિંગ્ટન સુંદરે એક અને આકાશ દીપે એક વિકેટ લીધી હતી.
વિલ યંગના 51 રન કિવીઓની ટીમમાં હાઈએસ્ટ હતા.
પહેલા દાવમાં ન્યૂ ઝીલેન્ડે 235 રન અને ભારતે 263 રન બનાવ્યા હતા.