IND vs SA: રોહિત શર્માએ રચ્યો ઇતિહાસ! શાહિદ આફ્રિદીને પછાડી બન્યો ‘સિક્સર કિંગ’

રાંચી: દક્ષિણ આફ્રિકા સામે ૩ ODI મેચની સિરીઝની પહેલી મેચ રાંચીમાં ચાલી રહી છે, ટોસ જીતીને દક્ષિણ આફ્રિકાએ ભારતને બેટિંગ માટે આમંત્રણ આપ્યું છે. ભારતીય ટીમે શાનદાર શરૂઆત કરી છે, ભારતના દિગ્ગજ બેટર રોહિત શર્માએ 51 બોલમાં 57 રનની ઇનિંગ રમી, આ તેની 60મી ODI ફિફ્ટી હતી. આ દરમિયાન તેણે ODI ક્રિકેટમાં એક મોટો રેકોર્ડ બનાવ્યો.

રોહિત શર્મા ODI ક્રિકેટમાં સૌથી વધુ સિક્સર ફટકારનાર ખેલાડી બન્યો છે. રોહિતે પાકિસ્તાનના ભૂતપૂર્વ કેપ્ટન શાહિદ આફ્રિદીનો રેકોર્ડ તોડ્યો છે.

10 વર્ષથી બાદ રેકોર્ડ તુટ્યો:
રોહિતે 277 ODI મેચની 269 ઇનિંગ્સમાં 352 સિક્સર ફટકારી છે. શાહિદ આફ્રિદીએ 398 ODI મેચની 369 ઇનિંગ્સમાં 351 સિક્સર ફટકારી હતી. છેલ્લા 10 વર્ષથી આ રેકોર્ડ શાહિદ આફ્રિદીના નામે હતો, હવે આ રેકોર્ડ રોહિત શર્માના નામે થઇ ગયો છે.

આજની મેચમાં 15મી ઓવરમાં રોહિતે સતત બે છગ્ગા ફટકારી આફ્રિદીના રેકોર્ડની બરાબરી કરી. ત્યાર બાદ માર્કો યાનસેનની ઓવરમાં ફાઈન લેગ પર સિક્સર ફટકારીને આફ્રીદીનો રેકોર્ડ તોડી નાખ્યો હતો.

રોહિત સિક્સર કિંગ:
નોંધનીય છે, T20I માં સૌથી વધુ છગ્ગા ફટકારવાનો રેકોર્ડ પણ રોહિતના નામે છે, તેણે 151 ઇનિંગ્સમાં 205 સિક્સર ફટકારી છે. ટેસ્ટ ક્રિકેટમાં તેણે 116 ઇનિંગ્સમાં 88 સિક્સર ફટકારી છે, આમ આંતરરાષ્ટ્રીય ક્રિકેટમાં તેણે કુલ 642 સિક્સર ફટકારી છે, જે એક વર્લ્ડ રેકોર્ડ છે.

ODIમાં સૌથી વધુ છગ્ગા:
352 – રોહિત શર્મા
351 – શાહિદ આફ્રિદી
331 – ક્રિસ ગેલ
270 – સનથ જયસૂર્યા
229 – એમએસ ધોની

આપણ વાંચો:  વેસ્ટ ઇન્ડીઝના આ પાવર હીટરે IPLમાંથી નિવૃત્તિ લીધી! IPL 2026માં નવી ભૂમિકામાં જોવા મળશે