IND vs ENG 3rd T20I: શમી અંગે સસ્પેન્સ, ભારતની સંભવિત પ્લેઇંગ-11
રાજકોટ: ભારત અને ઇંગ્લેન્ડ વચ્ચે 5 T20I મેચની સિરીઝની ત્રીજી મેચ આજે 28 જાન્યુઆરી 2025 ના રોજ રાજકોટના નિરંજન શાહ સ્ટેડિયમ ખાતે સાંજે 7 વાગ્યાથી (IND vs ENG 3rd T20I, Rajkot) રમાશે. આ સિરીઝમાં ભારતીય ટીમ 2-0થી આગળ છે. આજની મેચ જીતીને ભારતીય ટીમ સિરીઝ જીતવાના ઈરાદે મેદાને ઉતરશે. ઇંગ્લેન્ડે રાજકોટ T20 માટે ગઈ કાલે 27 જાન્યુઆરીના રોજ જ પ્લેઇંગ-11 જાહેરાત કરી દીધી હતી. ભારતની પ્લેઇંગ-11 અંગે ઘણી અટકળો (Indian team Playing-11) લાગી રહી છે, કેપ્ટન સૂર્ય અને હેડ કોચ ગંભીર ફેરફાર પણ કરી શકે છે.
સુર્યા ફોર્મમાં આવશે:
આ મેચમાં, બધાની નજર ભારતીય ટીમના કેપ્ટન સૂર્યકુમાર યાદવ પર રહેશે, સુર્યા સિરીઝની બંને મેચમાં ખાસ પ્રદર્શન કરી શક્યો નથી. 2024માં સુર્યાએ ભારતીય T20 ટીમની કેપ્ટનશીપ સંભાળી ત્યારથી, ભારતીય ટીમે સારું પ્રદર્શન કર્યું છે, પરંતુ સુર્યા તેના અંદાજમાં રન નથી બનાવી શક્યો. કેપ્ટનશીપ સંભાળ્યા બાદ સૂર્યકુમારે 17 ઇનિંગ્સમાં 26.81 ની સરેરાશથી 429 રન બનાવ્યા હતાં. ખરાબ ફોર્મને કારણે સૂર્યકુમારને ચેમ્પિયન્સ ટ્રોફી માટે ભારતીય ટીમમાં પણ પસંદ કરવામાં આવ્યો ન હતો. ઈંગ્લેન્ડ સામેની બાકીની T20 મેચમાં તેણે પોતાને સાબિત કરવો પડશે.
શમી સંપૂર્ણપણે ફિટ પણ….
ગઈ કાલે, ભારતના બેટિંગ કોચ સિતાંશુ કોટકે કહ્યું હતું કે ફાસ્ટ બોલર મોહમ્મદ શમીની ફિટનેસ અંગે ચિંતા કરવાની કોઈ જરૂર નથી, પરંતુ ઇંગ્લેન્ડ સામેની બાકીની T20 મેચોમાં તેના રમવાનો નિર્ણય કેપ્ટન સૂર્યકુમાર યાદવ અને હેડ કોચ ગૌતમ ગંભીર દ્વારા લેવામાં આવશે.
સીતાશુ કોટકના નિવેદન પરથી અંદાજ લગાવી શકાય છે કે ટીમ મેનેજમેન્ટ શમી અંગે કોઈપણ પ્રકારની ઉતાવળ કરવા નથી ઇચ્છતું. આવી સ્થિતિમાં, ત્રીજી T20 મેચમાં પ્લેઇંગ ઇલેવનમાં શમીને સ્થાન મળે એવી શક્યતા ઓછી છે.
શિવમ દુબે અને રમનદીપ સિંહની એન્ટ્રી:
ઓલરાઉન્ડર શિવમ દુબે અને રમનદીપ સિંહ ભારતીય ટીમમાં જોડાયા છે. નીતિશ કુમાર રેડ્ડી સાઈડ સ્ટ્રેનને કારણે આ સિરીઝ બહાર થઇ ગયો છે, તેને કારણે શિવમને ટીમમાં સામેલ કરવામાં આવ્યો છે. જ્યારે રમનદીપને ઇગગ્રસ્ત રિંકુ સિંહને બદલે ટીમમાં સ્થાન મળ્યું છે.
2024 ના T20 વર્લ્ડ કપ દરમિયાન, શિવમ દુબેને મિડલ ઓવરોમાં સ્પિનર્સ સામે આક્રમક બેટિંગ કરવાની જવાબદારી સોંપવામાં આવી હતી. તે આદિલ રશીદના લેગ-સ્પિન સામે અસરકારક સાબિત થઈ શકે છે. રમનદીપ સિંહ પણ મોટા શોટ લગાવી શકે છે. શિવમની જેમ તે બોલિંગમાં પણ અસરકારક સાબિત થઈ શકે છે. શિવમે ભારત માટે 33 ટી20 મેચ રમી છે, જેમાં તેણે 448 રન અને 11 વિકેટ ઝડપી છે. રમનદીપે 2 T20I માં 15 રન બનાવ્યા છે અને એક વિકેટ પણ લીધી છે.
આ પણ વાંચો…હાર્દિક પંડ્યા માટે સંજય માંજરેકરે આપ્યું મહત્ત્વનું નિવેદન, ડોમેસ્ટિક ક્રિકેટ અંગે કરી વાત
ભારતની સંભવિત પ્લેઇંગ ઇલેવન:
સંજુ સેમસન (વિકેટકીપર), અભિષેક શર્મા, તિલક વર્મા, સૂર્યકુમાર યાદવ (કેપ્ટન), હાર્દિક પંડ્યા, અક્ષર પટેલ, વોશિંગ્ટન સુંદર, રમનદીપ સિંહ/શિવમ દુબે, અર્શદીપ સિંહ, રવિ બિશ્નોઈ, વરુણ ચક્રવર્તી.
ઇંગ્લેન્ડની પ્લેઇંગ ઇલેવન:
બેન ડકેટ, ફિલ સોલ્ટ (વિકેટકીપર), જોસ બટલર (કેપ્ટન), હેરી બ્રુક, લિયામ લિવિંગસ્ટોન, જેમી સ્મિથ, જેમી ઓવરટન, ગુસ એટકિન્સન, જોફ્રા આર્ચર, આદિલ રશીદ, માર્ક વુડ.