જયપુર/બેંગલૂરુઃ રોહિત શર્મા અને વિરાટ કોહલી લિસ્ટ-એ તરીકે જાણીતી વન-ડે ફૉર્મેટની વિજય હઝારે ટ્રોફીમાં અનુક્રમે મુંબઈ તથા દિલ્હી વતી બે-બે મૅચ રમીને મુંબઈ પાછા આવી ગયા છે અને વિરાટ હવે છઠ્ઠી જાન્યુઆરીએ વધુ એક મૅચ રમીને 11મી જાન્યુઆરીએ વડોદરામાં ન્યૂ ઝીલૅન્ડ સામે શરૂ થનારી વન-ડે સિરીઝ માટે રોહિત સાથે તૈયારી કરવામાં વ્યસ્ત થઈ જશે, પરંતુ આ બે પીઢ ખેલાડી વિશે ક્રિકેટપ્રેમીઓમાં આતુરતા છે કે આ બે ડોમેસ્ટિક મૅચ રમવાના તેમને કેટલા પૈસા (EARNING) મળ્યા હશે?
કોહલી 15 વર્ષે અને રોહિત સાત વર્ષે ફરી વિજય હઝારે ટ્રોફીમાં રમ્યો. જોકે આ દરમ્યાન તેમણે ભારત વતી તેમ જ આઇપીએલમાં અનુક્રમે બેંગલૂરુ તથા મુંબઈ વતી રમીને તેમ જ જાહેરખબરને લગતા કૉન્ટ્રૅક્ટો દ્વારા કરોડો રૂપિયાની કમાણી કરી છે.
આઇપીએલમાં દર વર્ષે કરોડો રૂપિયા કમાતા આ બે દિગ્ગજે ગયા અઠવાડિયે વિજય હઝારે ટ્રોફીમાં પોતાના ફિટનેસ અને ફૉર્મ બતાવી દીધા હતા. જોકે તેમના ચાહકોના મનમાં સવાલ એ છે કે તેઓ આ બે ડોમેસ્ટિક મૅચ રમીને કેટલું કમાયા?
બીસીસીઆઇના નિયમ મુજબ જે ખેલાડી લિસ્ટ-એ ફૉર્મેટમાં 40થી વધુ મૅચ રમી ચૂક્યો હોય તો તેને નવી એક મૅચ રમવાના 60,000 રૂપિયા મળે. રોહિત (ROHIT)અને વિરાટ (VIRAT) ભૂતકાળમાં લિસ્ટ-એ ફૉર્મેટમાં 40થી વધુ મૅચ રમ્યા હતા એટલે તેમને (દરેકને) ગયા અઠવાડિયાની બે મૅચ રમવાના 1,20,000 રૂપિયા મળ્યા.
આ પણ વાંચો…વિરાટ 5,783 દિવસે રમ્યો વિજય હઝારે ટ્રોફીમાંઃ 16,000 રનનો સચિનનો વિશ્વવિક્રમ તોડ્યો
