સવાછ કરોડના આ બ્રિટિશ ખેલાડીએ બીસીસીઆઇના નવા પ્રતિબંધનું જોખમ વહોરી લીધું

નવી દિલ્હીઃ ઇંગ્લૅન્ડના 26 વર્ષીય રાઇટ-હૅન્ડ બૅટર હૅરી બ્રૂકે અગાઉ આઇપીએલમાં સનરાઇઝર્સ હૈદરાબાદ વતી રમવાનું ગૌરવ મેળવ્યું હતું, પરંતુ આ વખતે તેણે કંઈક એવું કર્યું છે કે જેના કારણે આ ટૂર્નામેન્ટમાં ભાગ લેવા સંબંધમાં તેના પર બે વર્ષનો પ્રતિબંધ લાગુ થઈ શકે એમ છે.

વાત એવી છે કે હૅરી બ્રૂકને દિલ્હી કૅપિટલ્સે નવેમ્બરની હરાજીમાં 6.25 કરોડ રૂપિયામાં ખરીદ્યો હતો. જોકે તેણે સતત બીજી સીઝનમાં પોતાનું નામ પાછું ખેંચી લીધું છે. આ ટૂર્નામેન્ટ શરૂ થાય એ પહેલાં જ તેણે કહી દીધું છે કે હું કરીઅરના સૌથી વ્યસ્ત સમયકાળમાંથી પસાર થયો છું જેને પગલે હું પોતાને રમવા માટે પૂર્ણપણે સક્ષમ બનાવવા માગું છું.'

બીસીસીઆઇનો નવો નિયમ છે કે જો કોઈ વિદેશી ખેલાડી ઑક્શનમાં ખરીદી લેવામાં આવે એ પછી તે કોઈ વાજબી કારણ વિના આઇપીએલની સીઝનમાંથી પોતાનું નામ પાછું ખેંચી લે તો તેના પર બે વર્ષનો (બે સીઝનનો) પ્રતિબંધ લાગુ થઈ શકે.

આપણ વાંચો: આ ટોચનો ફાસ્ટ બોલર આઇપીએલમાં પહેલા બે અઠવાડિયા કદાચ નહીં રમે…

ઉલ્લેખનીય છે કે જૉસ બટલર વન-ડે તથા ટી-20 ફૉર્મેટમાં ઇંગ્લૅન્ડના કૅપ્ટન તરીકે નિષ્ફળ ગયો હોવાથી તેના અનુગામી તરીકે હૅરી બ્રૂકનું નામ બોલાય છે. એ ઉપરાંત, તમામ ફૉર્મેટની ટીમના ખેલાડી તરીકે પણ તેને ફિટ મનાય છે. આઇપીએલમાંથી નામ પાછું ખેંચી લેવા પાછળવર્ક લૉડ મૅનેજમેન્ટ’ પણ એક મહત્ત્વનું પરિબળ ગણાય છે.

હૅરી બ્રૂકે એક્સ' પર લખ્યું છે કેઆગામી આઇપીએલમાંથી મારું નામ પાછું ખેંચી લેવાનો મુશ્કેલ નિર્ણય મારે લેવો પડ્યો છે. હું દિલ્હી કૅપિટલ્સ અને એના સપોર્ટર્સની માફી માગું છું. મને નાનપણથી ક્રિકેટ બેહદ પ્રિય છે અને મને મારા દેશ વતી રમવા મળે એવું મારું સપનું હતું જે સાકાર તો થયું છે, મને આ સર્વોચ્ચ સ્તરે રમવા મળે છે એ બદલ પોતાને ભાગ્યશાળી ગણું છું.

મને જેમના માર્ગદર્શન પર પૂરો ભરોસો છે તેમનું માનીને મેં આઇપીએલ વિશેનો આ નિર્ણય લીધો છે. ઇંગ્લૅન્ડની ક્રિકેટનો અત્યારે અત્યંત મહત્ત્વનો સમય ચાલી રહ્યો છે અને હું આગામી સિરીઝો માટે પૂરેપૂરો તૈયાર રહેવા માગું છું.’

હૅરી બ્રૂકે 24 ટેસ્ટમાં આઠ સદીની મદદથી 2,281 રન બનાવ્યા છે. વન-ડે અને ટી-20 ઇન્ટરનૅશનલમાં તેના નામે કુલ 70 મૅચમાં 1,600થી પણ વધુ રન છે.