પૂર્વ કોચ શાસ્ત્રીએ વિરાટ અને રોહિત માટે આપ્યું સૌથી મોટું નિવેદન, ફોર્મ અને ફિટનેસ મહત્ત્વપૂર્ણ પરિબળ….

સિડનીઃ ભૂતપૂર્વ ભારતીય મુખ્ય કોચ રવિ શાસ્ત્રીનું કહેવું છે કે રોહિત શર્મા અને વિરાટ કોહલીનું વન-ડે ક્રિકેટમાં ભવિષ્ય અનિશ્ચિત છે. શાસ્ત્રીએ કહ્યું હતું કે ઓસ્ટ્રેલિયા સામેની વન-ડે સીરિઝ મહત્વપૂર્ણ રહેશે કારણ કે તે નક્કી કરશે કે આ બંને બેટ્સમેન 2027 વન-ડે વર્લ્ડ કપ સુધી રમવાનું ચાલુ રાખી શકશે કે નહીં. શાસ્ત્રીએ રોહિત અને કોહલીના અનુભવ પર ભાર મૂક્યો હતો પરંતુ એમ પણ કહ્યું હતું કે ફોર્મ, ફિટનેસ અને ક્રિકેટની ભૂખ મહત્વપૂર્ણ પરિબળો હશે.

શાસ્ત્રીએ કહ્યું હતું કે ઓસ્ટ્રેલિયા સામેની સીરિઝ રોહિત અને કોહલી માટે બેન્ચમાર્ક તરીકે કામ કરશે. રોહિત અને કોહલીને 19 ઓક્ટોબરથી શરૂ થતી ઓસ્ટ્રેલિયા સામેની ત્રણ મેચની વન-ડે સીરિઝ માટે ભારતીય ટીમમાં સામેલ કરવામાં આવ્યા છે.

આ સીરિઝમાં ગિલ રોહિતનું સ્થાન લેશે. શાસ્ત્રીએ કહ્યું હતું કે, “તેથી જ તેઓ અહીં છે (ઓસ્ટ્રેલિયા સામે વન-ડે સીરિઝમાં રમી રહ્યા છે). તેઓ આ ટીમ કોમ્બિનેશનનો ભાગ છે. તે તેમની ફિટનેસ, જુસ્સો અને ફોર્મ પર આધાર રાખે છે. મને લાગે છે કે આ શ્રેણી તેમના પ્રદર્શનનું મૂલ્યાંકન કરવા માટે ખૂબ જ મહત્વપૂર્ણ છે.” આ શ્રેણીના અંતે તેઓ જાણશે કે તેઓ કેવું અનુભવે છે અને પછી તે તેમનો નિર્ણય કરશે.

રોહિત અને કોહલી હવે ફક્ત વન-ડે ફોર્મેટમાં જ આંતરરાષ્ટ્રીય સ્તરે રમે છે. તે જોવાનું બાકી છે કે તેઓ ભારતની લાંબા ગાળાની યોજનાઓમાં ફિટ બેસે છે કે નહીં કારણ કે આગામી વન-ડે વર્લ્ડ કપ હજુ બે વર્ષ દૂર છે.

તે સમયે રોહિત શર્મા 40 વર્ષનો અને કોહલી 38 વર્ષનો હશે. રોહિત અને કોહલી ફેબ્રુઆરીમાં ચેમ્પિયન્સ ટ્રોફીમાં રમ્યા હતા. જેમાં ટીમ ઈન્ડિયા ચેમ્પિયન બની હતી. રોહિતને ફાઇનલમાં પ્લેયર ઓફ ધ મેચ જાહેર કરવામાં આવ્યો હતો જ્યારે કોહલીએ સમગ્ર ટુર્નામેન્ટ દરમિયાન ભારતની જીતમાં મુખ્ય ભૂમિકા ભજવી હતી અને ટોચના પાંચ બેટ્સમેનોમાં સ્થાન મેળવ્યું હતું.

શાસ્ત્રીએ કહ્યું હતું કે ઓસ્ટ્રેલિયાના દૃષ્ટિકોણથી માર્ચમાં વન-ડે ક્રિકેટમાંથી નિવૃત્તિ લેનારા સ્ટીવ સ્મિથ માટે પણ આ જ વાત લાગુ પડે છે. તમારે રમતનો આનંદ માણવો પડશે અને હજુ પણ જુસ્સો રાખવો પડશે, પરંતુ જ્યારે મોટી મેચોની વાત આવે છે, ત્યારે અનુભવનો કોઈ વિકલ્પ નથી. આપણે ચેમ્પિયન્સ ટ્રોફીમાં આ જોયું છે, જ્યારે મોટી મેચ આવે છે, ત્યારે ફક્ત મોટા ખેલાડીઓ જ આગળ આવે છે.

આ પણ વાંચો…મહિલા વર્લ્ડ કપ: યજમાન ભારત અને નંબર વન ઑસ્ટ્રેલિયા વચ્ચે રવિવારે ટક્કર…