`લૉર્ડ્સની લડાઇ’ ભારતીય પુરુષો ન જીતી શક્યા, પણ મહિલાઓને જીતવાનો સુવર્ણ મોકો

લંડનઃ ક્રિકેટના મક્કા તરીકે જગમશહૂર લૉર્ડ્સમાં સોમવારે ભારતની મેન્સ ટીમના ખેલાડીઓ (ખાસ કરીને રવીન્દ્ર જાડેજા, જસપ્રીત બુમરાહ, મોહમ્મદ સિરાજ) યજમાન ઇંગ્લૅન્ડ સામે સિરીઝની ત્રીજી ટેસ્ટ ન જીતી શક્યા અને સિરીઝમાં 1-2થી પાછળ રહી ગયા, પરંતુ ભારતની મહિલા ટીમ વન-ડે શ્રેણીની પ્રથમ મૅચ જીતીને 1-0ની સરસાઈ સાથે લૉર્ડ્સ (Lord’s)માં આવી છે અને શનિવાર, 19મી જુલાઈએ (બપોરે 3.30 વાગ્યાથી) ઇંગ્લૅન્ડ સામેની બીજી વન-ડે છે. શ્રેણી ત્રણ જ મૅચની છે આ બીજી મૅચ પણ જીતીને હરમનપ્રીત કૌરની ટીમ 2-0થી સિરીઝ (Series)નો વિજય મેળવી શકશે.

ભારતીય મહિલા ટીમે સાઉધમ્પ્ટનની પ્રથમ વન-ડે ચાર વિકેટે જીતી લીધી હતી. આ વર્ષે વન-ડે (One -Day)નો વર્લ્ડ કપ ભારતમાં રમાવાનો છે અને એ પહેલાં ભારતીય મહિલા ટીમ એક પછી એક વન-ડે જીતીને વિશ્વ કપ માટે બહુ સારી પૂર્વતૈયારી કરી રહી છે. ભારતીય ટીમ 2022થી માંડીને અત્યાર સુધીમાં ઇંગ્લૅન્ડની ધરતી પર સતત ચાર વન-ડે જીતી છે અને શનિવારે પાંચમી જીતવાનો મોકો છે.

ભૂતપૂર્વ ક્રિકેટર અમોલ મુઝુમદાર ભારતની મહિલા ટીમનો કોચ છે અને તેના કોચિંગમાં હરમનપ્રીત ઍન્ડ કંપનીએ તાજેતરમાં ઇંગ્લૅન્ડ સામેની ટી-20 સિરીઝ 3-2થી જીતી લીધી અને હવે વન-ડે શ્રેણીમાં પણ વિજય મેળવવાની તૈયારી થઈ રહી છે.

મુખ્ય ફાસ્ટ બોલર રેણુકા સિંહ ઠાકુર તથા પૂજા વસ્ત્રાકરની ગેરહાજરીમાં પણ ભારતીય ટીમ ઇંગ્લૅન્ડની મુશ્કેલ પિચો પર જીતી રહી છે એ મોટી સિદ્ધિ કહેવાય. વાઇસ-કૅપ્ટન સ્મૃતિ મંધાનાએ શુક્રવારે 29મો જન્મદિન ઉજવ્યો હતો. તે ઇંગ્લૅન્ડ સામેની ટી-20 સિરીઝમાં સર્વોત્તમ રમી હતી. હવે શનિવારે તેણે મૅચ-વિનિંગ પર્ફોર્મ કરીને આ બર્થ-ડેને યાદગાર બનાવવાનો જરૂર નિર્ધાર કર્યો હશે.