વિશ્વવિજેતા બન્યા છતાં ICC તરફથી કેમ ન મળી પ્રાઈઝ મની? જાણો કારણ…
નવી દિલ્હી: ભારતની અંડર-19 ક્રિકેટ ટીમે આયુષ મ્હાત્રેની કેપ્ટનશીપમાં ઈંગ્લેન્ડને હરાવીને છઠ્ઠી વખત વર્લ્ડ કપ જીતીને ઈતિહાસ રચી દીધો છે. 6 ફેબ્રુઆરીના રોજ રમાયેલા આ ફાઈનલના હીરો વૈભવ સૂર્યવંશી રહ્યો હતો, જેણે 175 રનની જોરદાર ઈનિંગ રમી હતી. સામાન્ય રીતે કોઈપણ નાની કે મોટી ટુર્નામેન્ટમાં વિજેતા ટીમને કરોડોની ઈનામી રકમ (Prize Money) મળતી હોય છે, પરંતુ નવાઈની વાત એ છે કે આટલી મોટી સિદ્ધિ બાદ પણ આઈસીસી દ્વારા ટીમ ઈન્ડિયાને કોઈ આર્થિક પુરસ્કાર આપવામાં આવ્યો નથી. આ સાંભળીને ભલે આશ્ચર્ય થાય, પણ તેની પાછળ આઈસીસીનો એક ચોક્કસ નિયમ છે.
શા માટે ઈનામ નથી મળતું?
આઈસીસી (ICC) અંડર-19 વર્લ્ડ કપને વ્યાપારી સ્પર્ધાને બદલે ‘ડેવલપમેન્ટલ ટુર્નામેન્ટ’ (વિકાસલક્ષી ટુર્નામેન્ટ) તરીકે જોવામાં આવે છે. આ ટુર્નામેન્ટનો મુખ્ય હેતુ યુવા પ્રતિભાને પ્લેટફોર્મ પૂરું પાડવાનો અને ક્રિકેટને પ્રોત્સાહન આપવાનો છે. આ માળખા હેઠળ, આઈસીસી તમામ ટીમોને તેના ડેવલપમેન્ટ પ્રોગ્રામ દ્વારા પહેલેથી જ ફંડ પૂરું પાડે છે. આથી, ટુર્નામેન્ટમાં વિજેતા કે રનર-અપ થવા બદલ અલગથી કોઈ રોકડ ઈનામ આપવાની જોગવાઈ આઈસીસીના નિયમોમાં રાખવામાં આવી નથી.
BCCI કરી શકે છે ઈનામનો વરસાદ
આઈસીસી ભલે ઈનામ ન આપે, પરંતુ ભારતીય ક્રિકેટ કંટ્રોલ બોર્ડ (BCCI) પોતાના ખેલાડીઓને ક્યારેય નિરાશ કરતું નથી. ભૂતકાળમાં જ્યારે પણ જૂનિયર ટીમે સફળતા મેળવી છે ત્યારે બીસીસીઆઈએ ઉદાર હાથે ઈનામો આપ્યા છે. વર્ષ 2022માં જ્યારે યશ ધૂલની કેપ્ટનશીપમાં ભારતે વર્લ્ડ કપ જીત્યો હતો, ત્યારે દરેક ખેલાડીને 40 લાખ અને સપોર્ટ સ્ટાફને 25-25 લાખ રૂપિયા આપવામાં આવ્યા હતા. તેવી જ રીતે મહિલા અંડર-19 ટીમને પણ કરોડોના ઈનામો મળ્યા હતા, જે પરંપરા આ વર્ષે પણ જળવાય તેવી પૂરેપૂરી શક્યતા છે.
વર્તમાન ચેમ્પિયન ટીમ માટે બીસીસીઆઈ ટૂંક સમયમાં જંગી ઈનામી રકમની જાહેરાત કરે તેવી પ્રબળ સંભાવના છે. જોકે હજુ સુધી કોઈ સત્તાવાર પુષ્ટિ કરવામાં આવી નથી, પરંતુ સૂત્રોના જણાવ્યા અનુસાર બોર્ડ ખેલાડીઓ અને સ્ટાફ માટે પ્રોત્સાહક રકમ નક્કી કરી રહ્યું છે. આયુષ મ્હાત્રે અને વૈભવ સૂર્યવંશી જેવા સ્ટાર્સની આ ઐતિહાસિક જીતને બોર્ડ યોગ્ય સન્માન આપશે તે નક્કી છે. આમ, ભલે આઈસીસીની પ્રાઈઝ મની ન મળી હોય, પરંતુ ખેલાડીઓને તેમની મહેનતનું પૂરતું વળતર બીસીસીઆઈ દ્વારા મળવાનું નક્કી છે.
આ પણ વાંચો…મોહમ્મદ કૈફથી આયુષ મ્હાત્રે સુધીની સુવર્ણ સફરઃ ભારત છ વખત અન્ડર-19માં વર્લ્ડ ચૅમ્પિયન…
