બે વર્ષમાં ભારતના 30 ખેલાડી ટેસ્ટ ક્રિકેટ રમ્યા! ટીમના પતન બદલ આગરકર અને ગંભીરને બીસીસીઆઈનું તેડું

મુંબઈ: ભારતીય ક્રિકેટરો ફેબ્રુઆરી 2013થી ઑક્ટોબર 2024 દરમ્યાન લાગલગાટ 12 વર્ષ સુધી ઘરઆંગણે કુલ 18 ટેસ્ટ સિરીઝમાં અપરાજિત રહ્યા હતા, પરંતુ છેલ્લા 12 મહિનામાં ત્રણમાંથી બે હોમ સિરીઝમાં ભારતનો વાઇટવૉશ (Whitewash) થયો અને હોમગ્રાઉન્ડ પર છેલ્લી સાતમાંથી પાંચ ટેસ્ટ ભારત હાર્યું એને લીધે ટીમનું તેમ જ દેશનું નામ બગડવાને પગલે બીસીસીઆઈ (BCCI)એ ચીફ સિલેક્ટર અજિત આગરકર (AGARKAR) અને હેડ-કોચ ગૌતમ ગંભીર GAMBHIR)ને ચર્ચા માટે બોલાવ્યા હોવાનું જાણવા મળ્યું છે.

ગયા નવેમ્બરમાં ઘરઆંગણે ન્યૂ ઝીલૅન્ડ સામે 0-3થી અને આ નવેમ્બરમાં સાઉથ આફ્રિકા સામે 0-2થી નામોશી થતાં કરોડો ક્રિકેટપ્રેમીઓ ભારતીય ટેસ્ટ ખેલાડીઓ પર ગુસ્સે છે. છેલ્લા બે વર્ષમાં કુલ મળીને લગભગ 30 ખેલાડીઓ ટેસ્ટ ક્રિકેટ રમ્યા છે જેમાં અનુભવીઓ અને નવા ખેલાડીઓનો સમાવેશ છે.

જોકે 24 મહિનાના ટૂંકા ગાળામાં આટલા બધા ખેલાડીઓને કેમ અજમાવવામાં આવ્યા અને કેમ એક મજબૂત ટીમ ડેવલપ ન કરી શક્યા એવા સવાલના જવાબ આગરકર અને ગંભીર પાસે માંગવામાં આવશે એવું એક અહેવાલ પરથી જાણવા મળ્યું છે.

ગંભીર, રિષભે દોષ પોતાના પર લીધો છે

છેલ્લા એક વર્ષમાં ટેસ્ટ ક્રિકેટમાં ભારતીય ટીમની થયેલી નિષ્ફળતાનો દોષ ગંભીરે પોતાના શિરે લીધો છે, જ્યારે સાઉથ આફ્રિકા સામેની 0-2ની હાર બદલ કાર્યવાહક સુકાની રિષભ પંતે ફેન્સની માફી માંગી છે.

આગરકર કેમ ડોમેસ્ટિક મૅચો જોવા નથી જતો

આ બધું તો ઠીક છે, પરંતુ આગરકરની બાબતમાં એક મોટો મુદ્દો એ છે કે તે ડોમેસ્ટિક ક્રિકેટની મૅચો ખૂબ ઓછી અટેન્ડ કરે છે અને ઇન્ટરનેશનલ મૅચો વખતે મેદાન પર જોવા મળતો હોય છે. રણજી ટ્રોફીની મૅચમાં ચીફ સિલેકટર તરીકે આગરકરની હાજરી મર્યાદિત હોવાને કારણે સિલેક્શન કમિટી અને ડોમેસ્ટિક ક્રિકેટમાં પર્ફોર્મ કરતાં ખેલાડીઓ વચ્ચેનું અંતર વધ્યું છે. ભૂતપૂર્વ ક્રિકેટર નવજોત સિંહ સિધુએ એક મહિના પહેલાં કહ્યું હતું કે આગરકર અને ગંભીરને ક્રિકેટ બોર્ડે તેમના હોદ્દા પરથી દૂર કરવા જોઈએ.

સરફરાઝ અને અભિમન્યુની અવગણના

બીજું, આંતરરાષ્ટ્રીય ટીમમાં સામેલ કરવા માટેના માપદંડ તરીકે રણજી ટ્રોફી સહિતની ડોમેસ્ટિક મૅચોમાં સારું રમતા સરફરાઝ ખાન, અભિમન્યુ ઈશ્વરન અને કરુણ નાયર જેવા ખેલાડીઓને બદલે સાધારણ પર્ફોર્મ કરતાં સાઈ સુદર્શન અને નીતીશ કુમાર રેડ્ડીને વધુ પસંદ કરવામાં આવે છે.

બીસીસીઆઈના એક અધિકારીએ એવું કહ્યું હોવાનું મનાય છે કે સિલેક્ટરો ડોમેસ્ટિક મૅચો જોવા માટે સ્ટેડિયમમાં જવાને બદલે મોટાભાગે ડિજિટલ સ્કોર અપડેટ કરવા પર જ ધ્યાન આપે છે.

વિદેશી પ્રવાસોમાં આગરકરની હાજરી શા માટે?

અજિત આગરકરની બાબતમાં એવું છે કે ઇંગ્લૅન્ડ સામેની સિરીઝ વખતે તેણે સરફરાઝ ખાન, ધ્રુવ જુરેલ અને અભિમન્યુ ઈશ્વરન જેવા યુવાન ખેલાડીઓને સપોર્ટ કર્યો હતો, પરંતુ છેલ્લા થોડા મહિનાઓમાં ઈશ્વરન અને સરફરાઝને ભૂલી જવામાં આવ્યા છે. સામાન્ય રીતે ચીફ સિલેકટરનું કામ ટીમ સિલેક્ટ કરવાનું હોય છે, પણ આગરકર છેલ્લા થોડા મહિનાઓ દરમ્યાન ઑસ્ટ્રેલિયા અને ઇંગ્લૅન્ડના પ્રવાસે ભારતીય ટીમ સાથે જોવા મળ્યો હતો. જોકે તેણે રણજી મૅચ સ્ટેડિયમમાં જઈને જોઈ હોય એવું છેલ્લે 2024ની સાલમાં બન્યું હતું.

ગૌતમ સામે કયા ગંભીર સવાલો આવી શકે

હેડ-કોચ ગૌતમ ગંભીરને એવા સવાલ પણ કરવામાં આવશે કે ઘરઆંગણે આપણા બૅટ્સમેનો કેમ વિદેશી સ્પિનર્સ સામે સારું નથી રમી શકતા? આનો ઉકેલ છેલ્લા એક વર્ષમાં કેમ નથી લાવવામાં આવ્યો?