ઓસ્ટ્રેલિયન ઓપન: સાત્વિક-ચિરાગ ટાઇટલ જીતવા તૈયાર, લક્ષ્ય-પ્રણય ફોર્મમાં પાછા ફરશે?

સિડનીઃ ઓસ્ટ્રેલિયન ઓપનમાં ભારતના ખેલાડીઓ ફોર્મમાં વાપસી કરવાનો પ્રયાસ કરશે. બધાની નજર ફરી એકવાર ટોચની ક્રમાંકિત પુરુષ ડબલ્સ જોડી સાત્વિકસાઈરાજ રંકીરેડ્ડી અને ચિરાગ શેટ્ટી પર રહેશે, જેઓ આવતીકાલે અહીં શરૂ થઈ રહેલી ઓસ્ટ્રેલિયન ઓપન સુપર 500 બેડમિન્ટન ટુર્નામેન્ટમાં સીઝનનું પોતાનું પ્રથમ ટાઈટલ જીતવાનો પ્રયાસ કરશે.

ભારતીય ખેલાડીઓનું આ સીઝનમાં પ્રદર્શન અપેક્ષાઓ પર ખરું ઉતર્યું નથી, પરંતુ સાત્વિક અને ચિરાગે કેટલીક સ્પર્ધાઓમાં સારું પ્રદર્શન કર્યું. તેઓએ વર્લ્ડ ચેમ્પિયનશિપમાં પોતાનો બીજો બ્રોન્ઝ મેડલ જીત્યો અને હોંગકોંગ સુપર 500 અને ચાઇના માસ્ટર્સ સુપર 750માં રનર્સ-અપ રહ્યા હતા. કોમનવેલ્થ ગેમ્સ ચેમ્પિયન તેમની પ્રથમ મેચમાં ચીની તાઈપેઈના ચાંગ કો-ચી અને પો લી-વેઈનો સામનો કરશે.

આપણ વાચો: યાનિક સિનર સતત બીજી વખત જીત્યો ઓસ્ટ્રેલિયન ઓપન: જર્મનીના એલેકઝાન્ડર ઝવેરેવને હરાવ્યો

ઈજાઓ અને ખરાબ ફોર્મ સાથે સંઘર્ષ કરી રહેલા ભારતીય ખેલાડીઓ લક્ષ્ય સેન અને એચ.એસ. પ્રણય પોતાના પ્રદર્શનને સુધારવાનો પ્રયાસ કરશે. લક્ષ્ય ગયા અઠવાડિયે જાપાન ઓપનની સેમિફાઇનલમાં હારી ગયો હતો.

ઓસ્ટ્રેલિયન ઓપનમાં તેનો પહેલો મુકાબલો ચીની તાઇપેઈના સુ લી યાંગ સામે થશે. પ્રણય ગયા વર્ષે આ ટુર્નામેન્ટમાં બીજા ક્રમે રહ્યો હતો પરંતુ હાલમાં તે પોતાની લય શોધવા માટે સંઘર્ષ કરી રહ્યો છે. જ્યારે તે પહેલા રાઉન્ડમાં કેનેડાના બ્રાયન યાંગ સામે ટકરાશે ત્યારે તે ફરીથી લય મેળવવાનો પ્રયાસ કરશે.

આ વર્ષે મલેશિયા માસ્ટર્સમાં બીજા ક્રમે રહેનાર અનુભવી કિદામ્બી શ્રીકાંતનો સામનો પાંચમા ક્રમાંકિત લિન ચુન-યી સામે થશે, જ્યારે અમેરિકન ઓપન ચેમ્પિયન આયુષ શેટ્ટીનો સામનો મલેશિયાના જસ્ટિન હોહ સામે થશે.

આપણ વાચો: નવા ઓસ્ટ્રેલિયન ઓપન વિજેતાને ઇનામમાં મળી રેકોર્ડ-બ્રેક રકમ! જાણો કેટલી…

અન્ય ખેલાડીઓમાં કિરણ જ્યોર્જનો સામનો છઠ્ઠા ક્રમાંકિત કેન્ટા નિશિમોતો સામે થશે, જ્યારે થારૂન મન્નેપલ્લી ડેન્માર્કની મેગ્નસ જોહાનસન સામેની તેની પહેલી મેચમાં સારું પ્રદર્શન કરવાનો પ્રયાસ કરશે.

મહિલા સિંગલ્સમાં આકર્ષી કશ્યપ ડ્રોમાં સામેલ એકમાત્ર ભારતીય છે, પરંતુ તેને ટોચના ક્રમાંકિત અને ઓલિમ્પિક ચેમ્પિયન એન સે યંગ સામે મુશ્કેલ મુકાબલો કરવો પડશે.ત્રિસા જોલી અને ગાયત્રી ગોપીચંદ પરત ફરી રહ્યા છે.

મહિલા ડબલ્સમાં તેમનો સામનો ચોથી ક્રમાંકિત ચીની તાઇપેઈની યાન ફેઇ ચેન અને લિયાંગ ચિંગ-હસુન સામે થશે. મિક્સ્ડ ડબલ્સમાં મોહિત જગલાન અને લક્ષિતા જગલાનનો સામનો કેનેડાની નાઇલ યાકુરા અને ક્રિસ્ટલ લાઇ સામે થશે.