ટ્રૅવિસ હેડે ઑસ્ટ્રેલિયાને ઐતિહાસિક વિજય અપાવ્યો છતાં સ્ટીવ સ્મિથના નિવેદને સૌને ચોંકાવી દીધા…
પર્થઃ આક્રમક બૅટ્સમૅન ટ્રૅવિસ હેડે શનિવારે પર્થ (Perth)ના ઑપ્ટસ સ્ટેડિયમમાં ઇંગ્લૅન્ડ સામે ઍશિઝ (Ashes) સિરીઝની પ્રથમ ટેસ્ટના બીજા દાવમાં ઓપનિંગમાં મોકલવામાં આવતાં 69 બૉલમાં સેન્ચુરી ફટકારીને ઑસ્ટ્રેલિયાને બીજા જ દિવસે વિજય અપાવી દીધો ત્યાર બાદ કાર્યવાહક સુકાની સ્ટીવ સ્મિથે ટ્રૅવિસ વિશે એક નિવેદન આપીને સૌને ચોંકાવી દીધા હતા. ઍન્કરે પૂછેલા સવાલના જવાબમાં સ્મિથે કહ્યું હતું કે ` ટ્રૅવિસ હેડને હવે પછી પણ ઓપનિંગમાં જ મોકલવામાં આવશે કે કેમ એ વિશે હાલમાં નક્કી કહી ન શકાય.’
આ લૉ-સ્કોરિંગ ટેસ્ટમાં ઇંગ્લૅન્ડના 172 રનના જવાબમાં ઑસ્ટ્રેલિયાએ 132 રન બનાવતાં ઇંગ્લૅન્ડને 40 રનની સરસાઈ મળી હતી. બીજા દાવમાં ઇંગ્લૅન્ડની ટીમ ફક્ત 164 રનમાં ઑલઆઉટ થઈ જતા ઑસ્ટ્રેલિયાને 205 રનનો લક્ષ્યાંક મળ્યો હતો જે એણે માત્ર બે વિકેટના ભોગે મેળવી લીધો હતો. ટ્રૅવિસ હેડ નવા ઓપનર જેક વેધરાલ્ડ સાથે ઓપનિંગમાં રમ્યો હતો. વેધરાલ્ડે 23 રન કર્યા હતા અને બન્ને વચ્ચે 75 રનની ઓપનિંગ પાર્ટનરશિપ થઈ હતી. ત્યાર બાદ ટ્રૅવિસ હેડે માર્નસ લાબુશેન (51 અણનમ) સાથે 117 રનની ભાગીદારી કરી હતી.
આઇપીએલમાં સનરાઇઝર્સ હૈદરાબાદ વતી ઘણી મૅચ-વિનિંગ ઇનિંગ્સ રમી ચૂકેલો ટ્રૅવિસ 83 બૉલમાં ચાર સિક્સર અને સોળ ફોરની મદદથી બનાવેલા 123 રને આઉટ થયો ત્યાં સુધીમાં તેણે ઑસ્ટ્રેલિયાને જીતની લગોલગ લાવી દીધું હતું અને છેલ્લે લાબુશેન તથા સ્ટીવ સ્મિથ (બે અણનમ)ની જોડીએ ટીમને જિતાડી દીધી હતી. આખી મૅચમાં કુલ 10 વિકેટ લેનાર મિચલ સ્ટાર્કને મૅન ઑફ ધ મૅચનો પુરસ્કાર અપાયો હતો, પણ ટ્રૅવિસ હેડ છેલ્લા દિવસનો હીરો હતો. તેણે 10મી ટેસ્ટ સદી ફટકારવાની સાથે અનેક વિક્રમો રચ્યા હતા.
ટ્રૅવિસ હેડ દક્ષિણ એશિયાની બહાર પહેલી વાર ટેસ્ટમાં ઓપનિંગમાં રમ્યો હતો. તે આ જ ટેસ્ટના પ્રથમ દાવમાં પાંચમા નંબરે રમ્યો હતો જેમાં તેણે 21 રન કર્યા હતા. એ ઇનિંગ્સમાં ઓપનિંગમાં નવા ઓપનર જેક વેધરાલ્ડ અને માર્નસ લાબુશેન રમ્યા હતા. સ્મિથ વનડાઉનમાં અને ઉસમાન ખ્વાજા ચોથા નંબરે રમ્યો હતો. ત્યાર પછી ટ્રૅવિસનો નંબર લાગ્યો હતો.
પહેલા દાવમાં લાબુશેનને ઓપનિંગમાં મોકલવામાં આવ્યો હતો જેમાં તે (લાબુશેન) ફક્ત નવ રન કરી શક્યો હતો. બન્યું એવું કે બીજા દાવમાં વેધરાલ્ડ સાથે ઓપનિંગમાં ઉસમાન ખ્વાજાનો જ નંબર લાગવાનો હતો, પરંતુ ખ્વાજા પીઠના દુખાવાને કારણે ઓપનિંગમાં રમી શકે એમ નહોતો. એ બધું જોઈને કાર્યવાહક સ્મિથે (Smith) ટ્રૅવિસને ટેસ્ટના ઓપનિંગમાં પણ ભાગ્ય અજમાવવાની તક આપી હતી અને તે યાદગાર ઇનિંગ્સ રમ્યો હતો.
આ પણ વાંચો…Ashes 2025-26: ટીમની જીત પણ ક્રિકેટ ઓસ્ટ્રેલિયાને ₹17 કરોડથી વધુનો ફટકો, જાણો કેમ
