શારજાહ: ટી-20 ટ્રાયેન્ગ્યુલર સિરીઝમાં પાકિસ્તાન પહેલી બંને મૅચ જીતી ચૂક્યું છે, પરંતુ એના વિકેટકીપર-બૅટ્સમૅન મોહમ્મદ હારિસ (Mohammed Haris)નો ગુસ્સો સાતમા આસમાને છે અને શનિવારે તેણે એ ક્રોધની ઝલક બતાવી દીધી હતી.
વાત એવી છે કે હારિસે ટી-20 ઇન્ટરનેશનલ કરીઅરમાં મોટા ભાગે એકથી ત્રણ નંબર વચ્ચે જ બૅટિંગ કરી છે. શનિવારે યજમાન યુએઈ (UAE) સામેની મૅચમાં તેને નવા કોચ માઈક હેસને છેક સાતમા નંબરે મોકલ્યો હતો અને તે જ્યારે એક રન બનાવીને આઉટ થયો ત્યારે તેણે ગુસ્સામાં બૅટ (BAT) નીચે પછાડ્યું હતું અને તોડી નાખ્યું હતું. તેના ક્રોધનો શિકાર થયેલા બૅટ અને હૅન્ડલ પળવારમાં એકબીજાથી અલગ થઈ ગયા હતા. પોતે આ બહુ ખોટું કર્યું એવું ભાન થતાં હારિસ બૅટ અને હૅન્ડલ ભેગા કરીને પેવિલિયનમાં પાછો આવ્યો હતો.
He is not finished
— Iqra (@Iqra87685226) August 30, 2025
It's a clear frustrating disappointments for injustice..
How you suddenly changed his number from opener to no.3 now finisher..@CoachHesson , he should be at 3 & Fakhar at 4 …#PAKvUAE #PAKvUAE #Triseries .pic.twitter.com/V5yEdHu7Uj
હારિસનું ફૉર્મ ટીમ માટે ચિંતાજનક
હારિસ થોડા સમયથી બહુ રન નથી કરી શક્યો એટલે હવે નવમી સપ્ટેમ્બરે શરૂ થનારા એશિયા કપ પહેલાં પાકિસ્તાનની ટીમ તેના ફૉર્મ વિશે ચિંતિત છે. 25 મૅચની ટી-20 કારકિર્દીમાં તેની એક સેન્ચુરી છે, પરંતુ એક પણ હાફ સેન્ચુરી નથી.
પાકિસ્તાન કેવી રીતે જીત્યું
14 સપ્ટેમ્બરે એશિયા કપમાં ભારત સાથે ટક્કર લેવાનો મનસૂબો ઘડી રહેલી પાકિસ્તાની ટીમે શનિવારે યએઇ સામે સઈમ અયુબના 69 રન અને હસન નવાઝના 56 રનની મદદથી 20 ઓવરમાં 207 રન કર્યા હતા. યુએઈના જુનૈદ સિદ્દીક અને સગીર ખાને ત્રણ-ત્રણ વિકેટ લીધી હતી.
યુએઈની ટીમ આસિફ ખાનના 77 રન છતાં 20 ઓવરમાં આઠ વિકેટે 176 રન કરી શકી હતી અને પાકિસ્તાનનો 31 રનથી વિજય થયો હતો.
શુક્રવારે શારજાહમાં જ પાકિસ્તાને અફઘાનિસ્તાનને ટ્રાઈ સિરીઝની પ્રથમ મૅચમાં 39 રનથી હરાવ્યું હતું. એમાં પણ મોહમ્મદ હારિસને સાતમા નંબર પર મોકલવામાં આવ્યો હતો અને તે ફક્ત ૧૫ રન કરીને આઉટ થયો હતો.
