વેસ્ટ ઇન્ડીઝના આ પાવર હીટરે IPLમાંથી નિવૃત્તિ લીધી! IPL 2026માં નવી ભૂમિકામાં જોવા મળશે

કોલકાતા: વેસ્ટ ઇન્ડીઝના ઓલ રાઉન્ડર આન્દ્રે રસેલે અચાનક ઇન્ડિયન પ્રીમિયર લીગ(IPL)માંથી નિવૃત્તિ લેવાની જાહેરાત કરી છે, IPL 2026માં તે નવી ભૂમિકામાં જેવા મળશે. આન્દ્રે રસેલે જાહેરાત કરી કે IPLની આગામી સિઝનમાં કોલકાતા નાઈટ રાઈડર્સ(KKR) ટીમના પાવર કોચ તરીકે જોડાશે.
ડિસેમ્બર મહિનામાં IPL 2026 માટે મીની-ઓક્શન યોજાવાનું છે, એ પહેલા KKRએ આન્દ્રે રસેલને રિલીઝ કર્યો હતો. રસેલ KKR માટે 12 સીઝન રમ્યો, તે બે બાર ચેમ્પિયન ટીમનો ભાગ રહ્યો. હવે તે KKR તરફથી રમતો નહીં જોવા મળે પણ ટીમને ખેલાડીઓને કોચિંગ આપશે.
એક નિવેદનમાં રસેલે કહ્યું કે તે પોતાને અન્ય ટીમની જર્સીમાં જોઈ શકે એમ નથી, તેનાથી તેની રાતની ઊંઘ હરામ થઈ ગઈ હતી. આથી તેણે IPLમાંથી નિવૃત્તિ લેવાનો નિર્ણય કર્યો.
KKR ફેંસને સંદેશ
રસેલે લખ્યું, “હેલ્લો KKR ફેંસ, આજે હું જણાવવા ઈચ્છું છું કે મેં IPLમાંથી નિવૃત્તિ લેવાનો નિર્ણય લીધો છે. હું હજુ પણ વિશ્વભરની વિવિધ લીગમાં અને અન્ય તમામ KKR ફ્રેન્ચાઇઝી માટે સક્રિય રહીશ. IPLમાં મારો સમય અદ્ભુત રહ્યો. છગ્ગા ફટકારવા, મેચ જીતવી, MVP મેળવવી યાદગાર રહ્યું.”
તેણે જણાવ્યું, “કોલકાતા, હું પાછો આવીશ. હું 2026 માં નવા પાવર કોચ તરીકે KKR સપોર્ટ સ્ટાફનો ભાગ બનીશ.”
રસેલે IPLમાં રમેલી કુલ 140 મેચમાં 174.18 ની સ્ટ્રાઇક-રેટથી 2,651 રન બનાવ્યા. તેમણે 23.28 ની એવરેજથી 123 વિકેટ પણ લીધી.
આપણ વાંચો: આજે મેદાનમાં ઉતરતાની સાથે જ રોહિત-વિરાટની જોડી રચશે ઇતિહાસ! સચિન-દ્રવિડનો આ રેકોર્ડ તૂટશે



