શું છે પરિવર્તિની એકાદશીનું મહત્ત્વ? જાણો શુભ મુહૂર્ત અને પૂજા વિધિ…

ભાદરવા માસના શુક્લ પક્ષની એકાદશી, જેને પરિવર્તિની, પદ્મા અથવા જયંતી એકાદશી તરીકે ઓળખવામાં આવે છે, એક પવિત્ર દિવસ છે. આ દિવસે વ્રત અને પૂજા કરવાથી પાપોનો નાશ થાય છે અને જીવનમાં સુખ-સમૃદ્ધિ આવે છે.

આ વ્રતથી આર્થિક સ્થિતિ મજબૂત થાય છે અને મોક્ષની પ્રાપ્તિ થાય છે. આ વર્ષે આ વ્રત 3 સપ્ટેમ્બરે, બુધવારે ઉજવવામાં આવશે, જે ભક્તો માટે અત્યંત લાભદાયી ગણાય છે.

શુભ મુહૂર્ત અને પારણનો સમય
પંચાંગ અનુસાર, પરિવર્તિની એકાદશીની તિથિ 3 સપ્ટેમ્બરે સવારે 3:53 વાગ્યે શરૂ થશે અને 4 સપ્ટેમ્બરે સવારે 4:21 વાગ્યે સમાપ્ત થશે.

આ વ્રતના પારણા 4 સપ્ટેમ્બરે બપોર 1:36 થી સાંજ 4:07 વાગ્યા દરમિયાન કરવામાં આવશે. આ સમય દરમિયાન ભક્તોએ પૂજા અને દાન-પુણ્યનું ખાસ ધ્યાન રાખવું જોઈએ.

આ દિવસે સવારે વહેલા નાહીને સૂર્ય દેવને જળ અર્પણ કરો. પીળા વસ્ત્રો પહેરીને ભગવાન વિષ્ણુ અને ગણેશજીની પૂજા કરો. ભગવાન વિષ્ણુને પીળા ફૂલ, પંચામૃત અને તુલસી પત્ર ચઢાવો, જ્યારે ગણેશજીને મોદક અને દૂર્વા અર્પણ કરો.

પહેલા ગણેશજીના મંત્રો અને પછી વિષ્ણુ ભગવાનના મંત્રોનો જાપ કરો. આ દિવસે અન્ન ટાળીને ફળાહાર કે જલાહાર ગ્રહણ કરો અને જરૂરિયાતમંદને પાણી, ભોજન, વસ્ત્રો કે છત્રીનું દાન કરવું જોઈએ.

પરિવર્તિની એકાદશીનું મહત્વ
પરિવર્તિની એકાદશી ગણેશ ચતુર્થીની નજીક આવે છે, તેથી આ દિવસે ભગવાન ગણેશ અને વિષ્ણુની સાથે પૂજા કરવામાં આવે છે. આ દિવસે ભગવાન વિષ્ણુના વામન અવતારની પૂજા ખાસ કરવામાં આવે છે.

જે પરિવારમાં શાંતિ, સમૃદ્ધિ અને સંતાન સુખ આપે છે. જે લોકોને સંતાન પ્રાપ્તિ કે આર્થિક મુશ્કેલીઓનો સામનો કરવો પડે છે, તેમના માટે આ વ્રત અત્યંત ફળદાયી નીવડે છે.

આ વ્રત દ્વારા ભક્તોની મનોકામનાઓ પૂર્ણ થાય છે અને જીવનની તમામ અડચણો દૂર થાય છે. ભગવાન વિષ્ણુ અને ગણેશજીની આરાધના દ્વારા આધ્યાત્મિક શાંતિ અને સકારાત્મક ઉર્જા પ્રાપ્ત થાય છે. આ દિવસે દાન-પુણ્ય અને ઉપવાસથી જીવનમાં સકારાત્મક પરિવર્તન આવે છે, જે ભક્તોને મોક્ષની દિશામાં આગળ વધવામાં મદદ કરે છે.

આ પણ વાંચો…ચિંતન: આનંદ – નંદન – નંદ