શું તમે પણ ક્રેડિટ કાર્ડ દ્વારા બિલની ચૂકવણી કરો છો, તો જાણી લો આ ફેરફાર….
ક્રેડિટ કાર્ડનો ઉપયોગ આજકાલ બહુ સામાન્ય થઇ ગયો છે. ખરીદી કરવામાં, બિલ ભરવામાં દરેક પેમેન્ટમાં લોકો ક્રેડિટ કાર્ડથી ચૂકવણી કરે છે. જો તમે પણ ક્રેડિટ કાર્ડનો ઉપયોગ કરો છો તો તમારા માટે ખાસ આ સમાચાર છે. ક્રેડિટ કાર્ડ પેમેન્ટ્સ સંબંધિત ફેરફારો સાત દિવસ પછી એટલે કે 1 જુલાઈ, 2024થી લાગુ થવા જઈ રહ્યા છે. આ પછી, કેટલાક પેમેન્ટ પ્લેટફોર્મ દ્વારા બિલ પેમેન્ટમાં સમસ્યા આવી શકે છે. આ પ્લેટફોર્મ્સમાં CRED, PhonePe, BillDesk જેવી કેટલીક ફિનટેકનો સમાવેશ થાય છે. ચાલો જાણીએ કે ભારતીય રિઝર્વ બેંક (RBI) દ્વારા શું ફેરફાર કરવામાં આવ્યા છે અને તેની વપરાશકર્તાઓ પર શું અસર પડશે?
ટૂંક સમયમાં જૂન મહિનો પૂરો થશે અને એક અઠવાડિયા પછી જુલાઈ મહિનો શરૂ થશે. દરમિયાન, દર મહિનાની જેમ, આવતા મહિને પણ દેશમાં કેટલાક મોટા ફેરફારો થવા જઈ રહ્યા છે, જેમાં એક મોટો ફેરફાર ક્રેડિટ કાર્ડ દ્વારા કરવામાં આવતી બિલની ચુકવણી સાથે સંબંધિત છે. RBIના નવા નિયમ અનુસાર, 1 જુલાઈથી તમામ ક્રેડિટ કાર્ડ બિલની ચુકવણી ભારત બિલ પેમેન્ટ સિસ્ટમ એટલે કે BBPS દ્વારા થવી જોઈએ. દરેક વ્યક્તિએ ભારત બિલ પેમેન્ટ સિસ્ટમ (BBPS) દ્વારા બિલિંગ કરવાનું રહેશે.
સેન્ટ્રલ બેંક દ્વારા નિર્ધારિત સમયમર્યાદા પછી પણ, હજુ પણ ઘણી મોટી બેંકો છે જેણે નવા ફેરફારો હેઠળ તેમના નિયમોમાં ફેરફાર કર્યો નથી અને તેમાં HDFC બેંક, ICICI બેંક અને એક્સિસ બેંકનો સમાવેશ થાય છે સામેલ છે. RBIના નવા નિયમ મુજબ, લગભગ 8 બેંકોએ જરૂરી પગલાં લીધા છે, જેમાં SBI કાર્ડ, બેંક ઓફ બરોડા કાર્ડ (BoB કાર્ડ), કોટક મહિન્દ્રા બેંક, ફેડરલ બેંક અને ઇન્ડસઇન્ડ બેંકનો સમાવેશ થાય છે.
રિઝર્વ બેંક ઓફ ઈન્ડિયાના આ નવા નિયમનો ઉદ્દેશ્ય ચુકવણી પ્રણાલીને વધુ સુરક્ષિત બનાવવાનો છે. સરકારે BBPS નેશનલ પેમેન્ટ્સ કોર્પોરેશન ઓફ ઈન્ડિયા (NPCI) ના સહયોગથી, વિવિધ ચુકવણી સેવાઓ માટે એક જ પ્લેટફોર્મ બનાવવાનું લક્ષ્ય નક્કી કર્યું છે. હવે તેના અમલીકરણની સમયમર્યાદા નજીક આવી રહી છે અને જો બેંકો નિર્ધારિત સમયમાં તેનું પાલન નહીં કરે, તો તે તેમના માટે તેમજ ક્રેડિટ કાર્ડ પેમેન્ટ્સ પર આધારિત ફિનટેક પ્લેટફોર્મ્સ માટે મુશ્કેલીનું કારણ બની શકે છે.
તમને વિચાર આવશે કે આ BBPS શું છે? BBPS એટલે કે ભારત બિલ પેમેન્ટ સિસ્ટમ. આ બિલ પેમેન્ટની એક સંકલિત સિસ્ટમ છે, જે ગ્રાહકોને ઓનલાઈન બિલ પેમેન્ટ સર્વિસ પૂરી પાડે છે. તે NPCI ની દેખરેખ હેઠળ કામ કરે છે. ભારત બિલ પે એ એક ઇન્ટરફેસ છે જે ફોનપે, ક્રેડ સહિતના અન્ય ફિનટેક પ્લેટફોર્મ પર ઉપલબ્ધ છે અને તેના દ્વારા ક્રેડિટ કાર્ડ બિલની ચૂકવણીના તમામ પ્રકારો અલગ-અલગને બદલે એક જ પ્લેટફોર્મ પર કરી શકાય છે.
