સાવધાનઃ મહિલાઓની સાથે હવે પુરુષોમાં પણ વધ્યું બ્રેસ્ટ કેન્સરનું જોખમ, જાણો લક્ષણો?

મહિલાઓમાં બ્રેસ્ટ કેન્સરના કેસનો ધીમે ધીમે વધારો થઈ રહ્યો છે, પરંતુ હવે પુરુષો પણ તેનાથી બાકાત રહ્યા નથી. મીડિયાના એક રિપોર્ટ અનુસાર પુરુષોમાં બ્રેસ્ટ કેન્સરના કેસોમાં ચિંતાજનક વધારો જોવા મળ્યો છે. અગાઉ 100 મહિલામાં એક પુરુષમાં બ્રેસ્ટ કેન્સર થતું હતું, પરંતુ હવે એ આંકડો ચાર થયો છે.

જોકે આ ડેટા રાષ્ટ્રીયસ્તરે પ્રકાશિત થયેલા ડેટા સાથે સંપૂર્ણ રીતે સહમત નથી, પરંતુ ડૉક્ટરો તેમના ક્લિનિકલ અનુભવના આધારે આ વલણની પુષ્ટિ કરી રહ્યા છે. ડૉક્ટરોનું માનવું છે કે હોર્મોનના અસંતુલન, સ્થૂળતા (મેદસ્વીતા), ખરાબ આહાર અને ધૂમ્રપાન વગેરે બાબત સાથે જોડાયેલ છે.

આપણ વાચો: ગુજરાતમાં વધી રહી છે આ જીવલેણ બીમારી, દરરોજ આવી રહ્યા છે 200થી વધુ કેસ

રિપોર્ટ પ્રમાણે ખરાબ જીવનશૈલીના કારણે પુરુષોમાં હોર્મોનનું સંતુલન બગડી રહ્યું છે. પુરુષોમાં મહિલાઓમાં જોવા મળતા એસ્ટ્રોજન હોર્મોનનું સ્તર વધી રહ્યું છે, જેને કારણે તેમની છાતીમાં ગાંઠો થવાની સમસ્યા વધે છે, જે આગળ જતાં કેન્સરનું સ્વરૂપ પણ લઈ શકે છે.

નિષ્ણાંત ડૉક્ટરો પ્રમાણે પુરુષોમાં બ્રેસ્ટ ટીશ્યૂ ઓછા પ્રમાણમાં હોય છે, જેના કારણે કોઈ પણ ગાંઠ કે લક્ષણને વહેલી તકે ઓળખવાનું મુશ્કેલ રહે છે અને કેન્સરની ઓળખમાં વિલંબ થવાથી જોખમ વધી જાય છે.

ચિંતાની વાત એ છે કે, આ સમસ્યા માત્ર પુખ્ત વયના પુરુષોમાં જ નહીં, પરંતુ બાળકોમાં પણ જોવા મળે છે. પુરુષોમાં વધતું વજન પણ આ બીમારીનું એક મોટું કારણ હોઈ શકે છે, કારણ કે મેદસ્વીતા એસ્ટ્રોજનનું સ્તર વધારે છે, જેનાથી કેન્સરનું જોખમ વધે છે.

આપણ વાચો: રાષ્ટ્રીય કેન્સર જાગૃતિ દિવસ: જીવનની આ સાત સરળ આદતો તમને દરેક ક્ષણે કેન્સરના જોખમથી બચાવશે…

ડોક્ટરો ભારપૂર્વક જણાવે છે કે આ હોર્મોનલ ફેરફારોનું મુખ્ય કારણ ખોટો આહાર અને ફાસ્ટ ફૂડનું વધુ પડતું સેવન છે. વર્કિંગ માતા-પિતાના બાળકો અને ઘરથી દૂર રહેતા યુવાનો સ્વાદિષ્ટ, પણ સ્વાસ્થ્ય માટે હાનિકારક એવા ફાસ્ટ ફૂડ પર નિર્ભર રહે છે. બર્ગર, પિઝા અને ચાઇનીઝ વાનગીઓમાં વપરાતા સોસ, ટોપિંગ્સ અને અન્ય ઘટકોમાં ઘણી વાર સ્વાદ વધારવા માટે કેમિકલ્સની ભેળસેળ હોય છે, જે શરીરના હોર્મોનલ સ્તરને ખોરવી નાખે છે.

અત્યારના જમાનામાં ખાસ તો ફળો અને શાકભાજીમાં ખેતી દરમિયાન જ કેમિકલનો ઉપયોગ થાય છે. આ ઉપરાંત, મરઘાંને ઝડપથી મોટા કરવા માટે સ્ટેરોઇડ્સ આપવામાં આવે છે, જે ચિકન ખાનાર વ્યક્તિના શરીરમાં પ્રવેશે છે. આ બધા કેમિકલ્સ મળીને હોર્મોનનું અસંતુલન વધારે છે, જે માત્ર ‘ગાયનેકોમાસ્ટિયા’ જ નહીં, પણ બ્રેસ્ટ કેન્સરનું જોખમ પણ વધારે છે.

આ લક્ષણો પર ધ્યાન આપવું જોઈએ

જોખમ ટાળવા માટે પુરુષોએ તેમના શરીરમાં દેખાતા અમુક ચોક્કસ લક્ષણોને ગંભીરતાથી લેવા અને તાત્કાલિક ડૉક્ટરી સલાહ લેવી આવશ્યક છે. જેમ કે છાતીના ભાગમાં નવી ગાંઠનો અનુભવ થવો, ત્વચામાં ફેરફાર થવો જેમ કે ત્વચાનું લાલ થવું કે ખાડા પડવા, સ્તનાગ્રમાં કોઈ પણ પ્રકારનો ફેરફાર થવો, બગલની નજીક સોજો કે ગાંઠ થવી જેવા લક્ષણોને અવગણવા નહીં.