ધાણાના બીજ કે પાવડર: કોલેસ્ટ્રોલને કંટ્રોલ કરવા માટે કોણ વધુ ફાયદાકારક?

Bad cholesterol Control Tips: ભારતના દરેક રસોડાના મસાલાના ડબ્બામાં ધાણા અચૂકપણે જોવા મળે છે. ધાણા ખોરાકનો સ્વાદ તો વધારે જ છે, સાથોસાથ તે ઔષધીય ગુણધર્મો પણ ધરાવે છે. ખાસ કરીને પાચનતંત્રને મજબૂત બનાવવા અને બેડ કોલેસ્ટ્રોલને ઘટાડવા માટે ધાણાને ઉત્તમ ગણવામાં આવે છે.

પરંતુ ધાણાનો ઉપયોગ કેવી રીતે કરવો આ સવાલ ઘણા લોકોના મનમાં થતો હોય છે. કારણ કે ધાણાને બીજ તરીકે પણ ખાઈ શકાય છે તથા તેનો પાવડર બનાવીને પણ ઉપયોગમાં લઈ શકાય છે. અસરકારક પરિણામ માટે શેનો ઉપયોગ કરવો જોઈએ, આવો જાણીએ.

ધાણાના બીજ અને પાવડરની ખાસિયત

ધાણામાં રહેલું લિનાલૂલ (Linalool) નામનું તેલ ગેસ ઘટાડવા અને પેટને શાંત કરવામાં મદદ કરે છે, જ્યારે દ્રાવ્ય ફાઇબર (Soluble Fiber) કોલેસ્ટ્રોલ દૂર કરે છે. ધાણાના બીજ ગેસ, પેટનું ફૂલવું કે અચાનક અપચાથી તાત્કાલિક રાહત આપે છે.

બીજ ચાવવાથી અથવા ચામાં ઉકાળવાથી તેલ ઝડપથી છૂટૂં પડે છે, જે પેટને શાંત કરે છે. જ્યારે ધાણા પાવડર પાચનતંત્રમાં નિયમિત સુધારો લાવે છે. ધાણાનો પાવડર સરળતાથી મળી રહે છે અને સરળતાથી તેનો ઉપયોગ પણ કરી શકાય છે.

કોલેસ્ટ્રોલ કંટ્રોલ કરવા માટે બંને અસરકારક

ધાણાના બીજ અને તેનો પાવડર બંને કોલેસ્ટ્રોલ ઘટાડવાનો શ્રેષ્ઠ ઉપાય છે. બંને શરીર પર ધીમે ધીમે અસર બતાવે છે. ધાણા શરીરમાંથી પિત્ત એસિડ (Bile Acids) બનાવીને બેડ કોલેસ્ટ્રોલ (LDL)ને દૂર કરવામાં મદદ કરે છે. ધાણાના બંને સ્વરૂપોમાં દ્રાવ્ય ફાઇબર હોય છે, જે આંતરડામાં કોલેસ્ટ્રોલને શોષાતું અટકાવે છે.

ધાણામાં રહેલા ફાયટોકેમિકલ્સ (Phytochemicals) એન્ટીઑકિસડન્ટ તરીકે કાર્ય કરીને શરીરને ટોક્સિક તત્વો સામે પણ રક્ષણ આપે છે. જો તમને તાત્કાલિક રાહતની જરૂર હોય, તો બીજ શ્રેષ્ઠ છે. જો તમને દરરોજ પાચન અને કોલેસ્ટ્રોલને ટેકો આપવાની જરૂર હોય, તો પાવડર સારો વિકલ્પ છે.

ઉલ્લેખનીય છે કે, ડાએટિશિયન ભારપૂર્વક જણાવે છે કે ધાણા ફક્ત બેડ કોલેસ્ટ્રોલને દૂર કરવામાં મદદ કરે છે, પરંતુ તે દવાઓનો વિકલ્પ નથી. તેને સ્વસ્થ આહારના ભાગ રૂપે સામેલ કરવો સૌથી વધુ ફાયદાકારક છે.