તમારો સ્માર્ટફોન નકલી (Fake) તો નથી? સરકારી પોર્ટલ પર આ રીતે ચેક કરો IMEI રિપોર્ટ
અત્યારના સમયમાં અવનવી રીતે લોકોને છેતરવામાં આવે છે. ટેકનોલોજી ક્ષેત્રે પણ ઘણી રીતે લોકો ઠગવામાં આવે છે. મોબાઈલની દુનિયામાં સામાન્ય યુક્તિ એ છે કે, જૂના સ્માર્ટફોનના કવર અને બોડીને બદલીને તેમાં નકલી (Fake) ઓપરેટિંગ સિસ્ટમ (OS) ઇન્સ્ટોલ કરી દેવામાં આવે છે, જેથી તે ફોન લેટેસ્ટ દેખાય.
આ રીતે, જૂના અને સસ્તા ફોનને બજારમાં ઊંચા ભાવે વેચીને ગ્રાહકોને છેતરવામાં આવે છે. આ છેતરપિંડી કરનારાઓ ઘણીવાર લોકોને લલચાવવા માટે મોંઘા ફોનને સસ્તા ભાવે વેચવાનો દાવો કરે છે અને પૈસાની સખત જરૂરિયાત હોવાનું બહાનું આપે છે. ઘણા લોકો આ જાળમાં ફસાઈ જાય છે અને પેમેન્ટ કરે છે, પરંતુ ટૂંક સમયમાં જ એ ફોન બગડી જાય છે.
આવી છેતરપિંડીનો શિકાર ન બનવા માટે ભારત સરકારે ‘સંચાર સાથી’ (Sanchar Saathi) નામનું એક પોર્ટલ શરૂ કર્યું છે. આ પોર્ટલની મદદથી યુઝર્સ કોઈ પણ સ્માર્ટફોનનો “રિપોર્ટ કાર્ડ” સરળતાથી ચેક કરી શકે છે. આ રિપોર્ટ કાર્ડમાં ફોન બનાવનાર કંપનીનું નામ, મોડલ નંબર અને અન્ય મહત્વપૂર્ણ વિગતો પણ જોઈ શકાય છે.
તમે સૌથી પહેલા સંચાર સાથી પોર્ટલ પર વિઝિટ કરો, ત્યાર બાદ સ્ક્રોલ કરીને નીચે જાઓ ત્યારે તમે KYM (Know genuineness of your mobile handset) નામનો વિકલ્પ મળશે, તેના પર ક્લિક કરો. જે બાદ આગળ કેપ્ચા કોડ અને તમારો મોબાઈલ નંબર દાખલ કરો. તમારા નંબર પર આવેલો OTP (વન-ટાઇમ પાસવર્ડ) એન્ટર કરો. છેલ્લે તમારે જે હેન્ડસેટની વિગતો જાણવી છે તેનો IMEI નંબર દાખલ કરવો પડશે.
IMEI નંબર શોધવાની સરળ પ્રક્રિયા
IMEI (International Mobile Equipment Identity) નંબર દરેક ફોનની ઓળખ હોય છે અને તે નકલી ફોનની ઓળખ માટે મહત્વપૂર્ણ છે. Android અને iPhone બંને માટે IMEI નંબર શોધવાની પ્રક્રિયા અલગ-અલગ છે.
Android યુઝર્સ: સ્માર્ટફોનના ડાયલપેડને ખોલો અને તેમાં #06#* ડાયલ કરો. આ તરત જ સ્ક્રીન પર બંને IMEI નંબર દર્શાવશે.
iPhone યુઝર્સ: સેટિંગ્સમાં જાઓ પછી ‘General’ અને તે પછી ‘About’ વિકલ્પમાં જઈને સ્ક્રોલ કરવાથી IMEI નંબર મળી જશે.
રિપોર્ટ કાર્ડની વિગતો મેચ કરો
સંચાર સાથી પોર્ટલ પર બધી વિગતો અને IMEI નંબર દાખલ કર્યા પછી, સ્ક્રીન પર તે મોબાઈલનો સંપૂર્ણ રિપોર્ટ કાર્ડ ખુલી જશે. આ રિપોર્ટ કાર્ડમાં મોબાઈલ બનાવતી કંપની, તેનું અસલ મોડેલ નામ અને અન્ય ટેકનિકલ વિગતો દેખાશે. યુઝરે આ દર્શાવેલ વિગતોને તે હેન્ડસેટની વિગતો સાથે મેચ કરી લેવાની રહેશે.
જો પોર્ટલ પર દર્શાવેલ વિગતો અને ફોનની વિગતો અલગ હોય, તો સમજી લેવું કે તમે નકલી ફોન ખરીદી રહ્યા છો. આ રીતે, સરકારી પોર્ટલનો ઉપયોગ કરીને તમે છેતરપિંડીથી સુરક્ષિત રહી શકો છો.
