બોલો, રેલવેના કર્મચારીઓ બાખડતા રાજધાની ટ્રેન મોડી પડી

મુંબઈ: મધ્ય રેલવેના ભુસાવળ ડિવિઝનમાં વરિષ્ઠ રેલવે અધિકારી અને મુંબઈ વિભાગના એક ટીસી વચ્ચે સીટને લઈને વિવાદ સર્જાતા રાજધાની જેવી પ્રીમિય ટ્રેન મોડી પડી હતી. આ વિવાદ વધતાં આ અધિકારીએ ટીસીને ધમકી આપી તેના પર નશો કરીને ડ્યૂટી પર હાજર થયા હોવાનો આરોપ મૂક્યો હતો.

બે રેલવે અધિકારીઓ વચ્ચે થયેલા વિવાદને કારણે મુંબઈ-દિલ્હી રાજધાની એક્સ્પ્રેસમાં પ્રવાસ કરવામાં ત્રાસ ભોગવવો પડ્યો હતો. આ વિવાદને કારણે મુંબઈ-દિલ્હી રાજધાની એક્સ્પ્રેસ જળગાંવ સ્ટેશનથી 13 મિનિટ મોડેથી રવાના કરવાની નોબત આવી હતી.

મધ્ય રેલવેના ભુસાવળ વિભાગના એક વરિષ્ઠ અધિકારી શુક્રવારે નાશિક રોડ રેલવે સ્ટેશન નજીક રાઉન્ડ પર નીકળ્યા હતા. આ સ્ટેશન પર રાજધાની ટ્રેન આવતા વરિષ્ઠ અધિકારી આ ટ્રેનના એચ-૧ ડબ્બામાં બેસ્યા હતા, પણ તેમનો પીએનઆર તૈયાર કર્યો નહોતો.

ત્યારબાદ આ ટ્રેન નાશિક રોડ સ્ટેશનથી રવાના થઈ હતી. ટ્રેનના એચ-વન કોચમાં હાઈ કોર્ટના ન્યાયાધીશ પણ હતા. આ ટ્રેનમાં આવેલા ટીસી એ સ્વચ્છતાના કારણને લીધે અધિકારીને ‘એ’ ડબ્બામાં જવા કહ્યું હતું. આ ડબ્બામાં ન્યાયાધીશ પણ પ્રવાસ કરતાં હોવાથી તેમનો કોચ સ્વચ્છ કરવા માટે કર્મચારી મોકલવામાં આવ્યા હતાં. આ વાત પરથી વરિષ્ઠ અધિકારીને ગુસ્સો આવતા તેમણે ટ્રેનમાં હંગામો કરતાં ટ્રેન ૧૩ મિનિટ મોડેથી રવાના થઈ હતી. હવે આ મામલે તપાસ કરવામાં આવશે એવું એક અધિકારીએ જણાવ્યું હતું