સુપ્રીમ કોર્ટમાં મામલાની તાત્કાલિક સુનાવણી માટેના નિયમો મોટા ફેરફાર! વરિષ્ઠ વકીલોને થશે અસર

નવી દિલ્હી: સુપ્રીમ કોર્ટે કેસની લિસ્ટિંગની પ્રક્રિયામાં ફેરફાર કરવામાં આવ્યા છે. હવે વરિષ્ઠ વકીલો કોર્ટની કોઈ પણ બેંચ સમક્ષ તાત્કાલિક સુનાવણી માટે કેસનો મૌખિક રીતે ઉલ્લેખ નહીં કરી શકે. જેના પર ખાસ ધ્યાન આપવાની જરૂર હોય એવા મામલા કોર્ટના બે કાર્યકારી દિવસોમાં આપમેળે સુનાવણી લિસ્ટ કરવામાં આવશે.

સુપ્રીમ કોર્ટમાં કેસની તાત્કાલિક સુનાવણી કરવા અને કોઈ કેસ મુલતવી રાખવા માટેના નિયમોમાં કેટલાક ફેરફાર કરવામાં આવ્યા છે, નવા નિયમો 1 ડિસેમ્બરથી લાગુ થશે.

વરિષ્ઠ વકીલને અસર થશે:
કેસની તાત્કાલિક સુનાવણી અને કેસ મુલતવી રાખવા માટેની સત્તાવાર પ્રક્રિયા માટે કોર્ટે પરિપત્ર જાહેર કર્યો છે. હવે, વરિષ્ઠ વકીલો કોઈપણ બેન્ચ સમક્ષ કોઈપણ કેસનો મૌખિક ઉલ્લેખ નહીં કરી શકે. તાજેતરના મહિનાઓમાં આ પ્રથા બિનઔપચારિક રીતે ચાલી રહી હતી, હવે પ્રથાને ઔપચારિક બનાવવામાં આવી છે.

કોર્ટના પરિપત્ર મુજબ તાત્કાલિક સુનાવણી માટેના નવા કેસોને બે કાર્યકારી દિવસોમાં આપમેળે સુનાવણી માટે લિસ્ટ કરવામાં આવશે. કોઈપણ વરિષ્ઠ વકીલને કોઈપણ બેંચ સમક્ષ કેસનો મૌખિક ઉલ્લેખ કરવાની મંજૂરી આપવામાં આવશે નહીં, યુવા જુનિયર વકીલને મૌખિક ઉલ્લેખ કરવા માટે છૂટ આપવામાં આવીશ શકે છે.

અત્યંત જરૂરી કેસ માટે નિયમ:
જામીન આપવા/રદ કરવા, મૃત્યુદંડ, હેબિયસ કોર્પસ, એવીક્શન, ડીમોલીશન અથવા તાત્કાલિક વચગાળાની રાહત જેવા રાહ ન જોઈ શકાય તેવા કેસોમાં, પક્ષકારોએ મેન્શનીંગ પ્રોફોર્મા અને કારણ સમજાવતો પત્ર અગાઉના કાર્યકારી દિવસે બપોરે 3 વાગ્યા સુધીમાં અથવા શનિવારે સવારે 11.30 વાગ્યા સુધીમાં મેન્શનીંગ ઓફિસરને સબમિટ કરવાનો રહેશે

એક પરિપત્રમાં કહેવામાં આવ્યું છે કે વકીલો અથવા પક્ષકારોના પરિવારમાં મૃત્યું અથવા તબીબી કટોકટી કેસ મુલતવી રાખવાનું એકમાત્ર કારણ હશે. આ ઉપરાંત કોર્ટ દ્વારા સ્વીકારવામાં આવેલા અન્ય કેટલાક વાસ્તવિક કારણોને ધ્યાનમાં લેવામાં આવી શકે છે.

શનિવારે સુપ્રીમ કોર્ટની રજિસ્ટ્રીના જણાવ્યા મુજબ આ ફેરફારો બેન્ચ સમક્ષ કેસનો બિનજરૂરી ઉલ્લેખ ઘટાડવા અને કેસનું લિસ્ટિંગ ઝડપી બનાવવા કરવામાં આવ્યા છે.

આપણ વાંચો:  UPના વરરાજાએ રૂ. 31 લાખનું દહેજ ઠુકરાવીને જીત્યા દિલ! કહ્યું, “આ પ્રથા હવે અટકવી જ જોઈએ”