શ્રીનગરઃ જમ્મુ અને કાશ્મીરના શ્રીનગરમાં આવેલી ઐતિહાસિક હઝરતબલ દરગાહને લઈને વિવાદ ચાલી રહ્યો છે. હઝરતબલ દરગાહમાં ગયા અઠવાડિયે બબાલ થઈ હતી. વિવાદ એવો હતો કે, કેટલાક લોકોએ આ દરગાહમાં સ્થાપિત કરેલ અશોક પ્રતીકવાળી તકતીને નુકસાન પહોંચાડીને અશોક ચિન્હને તોડી નાખ્યું હતું. જે પછી આ વિવાદ વધારે ઉગ્ર બન્યો હતો. સોશિયલ મીડિયામાં પણ આ મુદ્દે જ વિવાદ ચાલી રહ્યો છે, પરંતુ શું તમને આ દરગાહના ઇતિહાસ વિશે ખબર છે? ચાલો જાણીએ…
17મી સદી સાથે જોડાયેલો છે ઇતિહાસ
શ્રીનગરમાં આવેલી આ ઐતિહાસિક હઝરતબલ દરગાહનું માત્ર ધાર્મિક મહત્વ જ નથી પરંતુ તેના સાથે સાથે ઐતિહાસિત મહત્વ પણ રહેલું છે. આ દરગાહ વિશે ઘણાં ઓછા લોકોને જાણકારી હશે! ઇતિહાસની વાત કરવામાં આવે તો, આ દરગાહનો ઇતિહાસ 17મી સદી સાથે જોડાયેલો હોવાનું જણાય છે. ઇતિહાસકારોનું કહેવું છે કે, પહેલા અહી ઇશરત મહેલ અને અદભૂત બગીચો હતો અને તેની જગ્યાએ હવે આ દરગાહ બનાવવામાં આવી છે. મુઘલ સમ્રાટ શાહજહાંનો એક સુબેદાર જેનું નામ સાદિક ખાન હતું. તેણે ઈ.સ 1623માં આ ઇશરત મહેલનું નિર્માણ કરાવ્યું હતું. અત્યારે આ દરગાહ મુસ્લિમ ધર્મના લોકો માટે આસ્થાનું કેન્દ્ર છે.
દરગાહનો ઈતિહાસ શું છે?
હઝરતબલ દરગાહ ખાસ એટલા માટે છે, કારણ કે, આ દરગાહમાં પયગમ્બર મોહમ્મદ સાહેબની દાઢીના વાળ (રાઓ-એ-મુબારક) રાખવામાં આવેલા છે, જે અહીં સચવાયેલા છે. તેના કારણે દરગાહનું ઐતિહાસિક મહત્વ વધી ગયું છે. ઇતિહાસકારોના જણાવ્યાં પ્રમાણે આ દરગાહને અસર-એ-શરીફ, દરગાહ શરીફ અને મદીન-ઉસ-સાનીના નામે પણ ઓખળવામાં આવે છે. અહીં મોટી સંખ્યામાં લોકો પણ આવતા હોવાનું જાણવા મળ્યું છે. આ દરગાહનું સંચાલન મુસ્લિમ ઓકાફ ટ્રસ્ટ દ્વારા કરવામાં આવે છે. એટલું જ નહીં પરંતુ મોહમ્મદ અબ્દુલ્લાએ 1968માં આ દરગાહને આધુનિક સ્વરૂપ આપવાનું કાર્ય કર્યું હતું.
સંગેમરમર પથ્થરથી બની છે દરગાહ
ઇતિહાસકારોના મતે ઇસ 1979માં આ દરગાહનું નિર્માણ કાર્ય પૂર્ણ થયું હતું. આ દરગાહ બનાવવા માટે સફેદ સંગેમરમર પથ્થરનો ઉપયોગ કરવામાં આવ્યો હતો. આ દરગાહને સંપૂર્ણ રીતે તૈયાર થતા 11 વર્ષ જેટલો સમય લાગ્યો હતો. દાલ તળાવના કિનારે આવેલી આ દરગાહ ચાંદની રાત્રે ચાંદી જેવી ચમકતી રહે છે તેના કારણે વધુ આકર્ષક લાગે છે. આ દરગાહમાં જુમ્મે કી નમાજ માટે મોટી સંખ્યામાં મુસ્લિમો આવતા હોય છે. મુસ્લિમો સાથે સાથે આખા વર્ષ દરમિયાન મોટી સંખ્યામાં પ્રવાસીઓ પણ આવતા રહે છે.
આ પણ વાંચો…..જમ્મુ અને કાશ્મીરના લોલાબ વિસ્તારમાં ભારે વરસાદ, પૂરની સ્થિતિ સર્જાતા એલર્ટ રહેવા સૂચના
