મધ્ય પ્રદેશના સીએમના પુત્રએ સમૂહલગ્નમાં લગ્ન કરીને સમાજ માટે એક પ્રેરણાદાયી દાખલો બેસાડ્યો, જાણો કોણે કરી પ્રશંસા?
ઉજ્જૈન: મધ્ય પ્રદેશના મુખ્ય પ્રધાન મોહન યાદવના નાના દીકરા ડૉ. અભિમન્યુ યાદવે આજે ઉજ્જૈનમાં સાદગીવાળા લગ્નનો અનોખો દાખલો બેસાડ્યો છે. મોહન યાદવે પોતાના દીકરાના લગ્ન માટે કરોડોનો ધુમાડો નહીં, પરંતુ સામાન્ય જોડાની સાથે સમૂહલગ્નના સમારોહમાં લગ્ન કરાવ્યા હતા, જેનો વીડિયો પણ સોશિયલ મીડિયા પર વાયરલ થયો હતો.
ડો. અભિમન્યુ યાદવના લગ્ન ડૉ. ઈશિતા પટેલ સાથે થયા હતા. જોકે, સમૂહ લગ્નમાં દીકરાના લગ્ન કરાવીને સીએમ મોહન યાદવે પણ સમાજને એક મજબૂત સંદેશ આપ્યો હતો કે લગ્ન સાદગીથી પણ કરી શકાય છે. અહીંના સમૂહલગ્નમાં રાજ્યપાલ મંગુ ભાઈ પટેલ, યોગ ગુરુ બાબા રામદેવ અને બાગેશ્વર ધામના આચાર્ય ધીરેન્દ્ર કૃષ્ણ શાસ્ત્રી સહિત અનેક મહાનુભાવો ઉપસ્થિત રહ્યા હતા.
આપણ વાચો: રાજકોટમાં યોજાયેલા સમૂહલગ્નમાં 555 નવવધૂને નકલી દાગીના આપ્યા! નોંધાઈ પોલીસ ફરિયાદ
મુખ્ય પ્રધાનના પગલાને ધીરેન્દ્ર કૃષ્ણ શાસ્ત્રીએ પ્રશંસનીય ગણાવ્યું
આ વિશેષ અવસર પર ઉપસ્થિત મહાનુભાવોએ વર-વધૂને આશીર્વાદ આપવાની સાથે મુખ્ય પ્રધાનના આ નિર્ણયની પ્રશંસા કરી હતી. બાગેશ્વર ધામ સરકારના ધીરેન્દ્ર કૃષ્ણ શાસ્ત્રીએ મુખ્યમંત્રીના આ પગલાને ‘પ્રશંસનીય’ ગણાવ્યું હતું. તેમણે કહ્યું હતું કે, જ્યાં એક તરફ સામાન્ય માણસના લગ્ન થઈ રહ્યા છે, ત્યાં બીજી તરફ મધ્ય પ્રદેશનું નેતૃત્વ કરનારના પુત્રના પણ લગ્ન થઈ રહ્યા છે.
પોતાના ‘ભેદભાવ કી કરો વિદાઈ, હમ સબ હિંદુ ભાઈ ભાઈ’ સૂત્રને મુખ્યમંત્રીએ વ્યવહારિક રીતે સાબિત કર્યું હોવાનું જણાવ્યું હતું. યોગ ગુરુ બાબા રામદેવે આ લગ્ન સમાજના લોકો માટે ઉત્તમ ઉદાહરણ ગણાવ્યું હતું. બાકીના મુખ્ય પ્રધાન, નેતાઓ અને ઉદ્યોગપતિઓએ પણ મોંઘા લગ્નમાં થતા ખર્ચને ઘટાડવાની પ્રેરણા લેવી જોઈએ. હવે આપણે ‘ડેસ્ટિનેશન વેડિંગ’ નહીં, પણ ‘ડિવાઇન વેડિંગ’ તરફ આગળ વધવું જોઈએ.”
આપણ વાચો: “લૂંટેરા સમૂહલગ્ન”: અમદાવાદમાં લગ્નની કંકોત્રી છાપીને કરી 24 લાખની છેતરપિંડી….
આ સામૂહિક લગ્ન સમારોહમાં વર-વધૂને આશીર્વાદની સાથે જ નાણાકીય રીતે પ્રોત્સાહન પણ મળ્યું છે. અખાડા પરિષદ દ્વારા દરેક દંપતીને એક-એક લાખ રૂપિયાની ભેટ પણ આપવાની જાહેરાત કરવામાં હતી. આ ઉપરાંત, યોગ ગુરુ બાબા રામદેવે પણ પોતાની પતંજલિ યોગપીઠ તરફથી દરેક દંપતીને એક-એક લાખ રૂપિયા આપવાની ઘોષણા કરી છે. આ સમારોહમાં 22 જોડાએ સમૂહલગ્ન કર્યાં હતાં.
સીએમ મોહન યાદવે પોતાના નાના પુત્રના લગ્ન સામૂહિક વિવાહ સંમેલનમાં કરાવીને સમાજને સ્પષ્ટ સંદેશ આપ્યો છે. તેમણે બતાવી દીધું છે કે વૈભવી અને ખર્ચાળ લગ્ન સમારોહ પાછળ પૈસા વેડફવાને બદલે, સાદગી અને સામૂહિકતાનું મહત્વ સમજવું જોઈએ.
આ પગલું સમાજના એવા લોકોને પ્રેરણા આપશે જેઓ લગ્નના દેખાદેખીના ખર્ચાઓને કારણે મુશ્કેલીમાં મુકાય છે. મુખ્યમંત્રીએ ‘સામાન્ય માણસના પુત્રથી લઈને મુખ્યમંત્રીના પુત્ર’ સુધીના જોડાઓને એક જ મંડપ નીચે લાવીને ખરેખર એક મોટી સામાજિક સમાનતા અને સાદગીનો સંદેશો આપ્યો છે.
