કેરળ હાઈકોર્ટે સબરીમાલા સોનું ગાયબ થવાના મામલે સુઓ મોટો અરજી દાખલ કરી છે. જેમાં કાર્યવાહી શરૂ કરી છે. કોર્ટે હવે ચિંતા વ્યક્ત કરી છે કે મૂર્તિઓ પર સોનાનો ઢોળ ચઢાવવામાં ગેરરીતી આચરવામાં આવી હતી. તેમજ તે નાણાનો દુરઉપયોગ કરવામાં આવ્યો છે. આ અંગે કોર્ટે નોંધ્યું છે કે ઉન્નીકૃષ્ણન પોટ્ટીએ 2019 માં તેમના લગ્ન માટે બાકી રહેલા સોનાનો ઉપયોગ કરવાની ઇચ્છા વ્યક્ત કરી હતી. કોર્ટે આ મામલે એસઆઈટીની રચના કરવાનો આદેશ આપ્યો છે. કોર્ટે શોધી કાઢ્યું કે નવીનીકરણ પછી પરત કરાયેલી વસ્તુઓનું વજન ફક્ત 38.258 કિલો હતું. આનો અર્થ એ થયો કે 4.541 કિલોગ્રામનો ઘટાડો થયો.
વજન લગભગ 4 કિલો ઓછું હતું
આ અંગે હાઈકોર્ટમાં રજૂ કરાયેલા રિપોર્ટમાં જણાવાયું છે કે દ્વારપાલક મૂર્તિઓ પર લગાવવામાં આવેલ સોનાનો ઢોળ કોઈની જાણ વગર દૂર કરવામાં આવ્યો હતો, અને જ્યારે 2019 માં ફરીથી ઢોળ ચઢાવ્યા પછી મૂર્તિઓ પરત કરવામાં આવી ત્યારે તેનું વજન લગભગ 4 કિલો ઓછું હતું. અધિકારીઓએ જણાવ્યું હતું કે 2019 ના સોનાના ઢોળના પ્રાયોજક ઉન્નીકૃષ્ણન પોટ્ટી હતા. જેઓ પોતે મૂર્તિઓને ચેન્નાઈમાં સ્માર્ટ ક્રિએશન્સ નામની કંપનીમાં સોનાના ઢોળ માટે લઈ ગયા હતા.
સોમવારે, કોર્ટે કહ્યું, જવાબદારી ફક્ત ચેન્નાઈમાં સ્માર્ટ ક્રિએશન્સ પર જ નહીં, પરંતુ ત્રાવણકોર દેવસ્વોમ બોર્ડના કેટલાક અધિકારીઓ પર પણ છે. રેકોર્ડ સ્પષ્ટપણે દર્શાવે છે કે ટીડીબીના અધિકારીઓ આ વ્યવહારો અને સોનાના ગેરકાયદે હેરફેરથી વાકેફ હતા. જે દેવસ્વોમ નિયમોનું ઘોર ઉલ્લંઘન હતું.
ગોલ્ડ પ્લેટિંગ કરેલી મૂર્તિઓ સોંપવામાં આવી હતી.
આ ઉપરાંત કોર્ટે એ પણ નોંધ્યું કે 2019 માં ગોલ્ડ પ્લેટિંગ પછી, પોટ્ટીએ ટીડીબીને મેઇલ દ્વારા જાણ કરી હતી કે તેની પાસે મોટી માત્રામાં સોનું છે અને તે લગ્ન માટે તેનો ઉપયોગ કરવા માંગે છે. કોર્ટે નોંધ્યું કે 2019 માં પોટ્ટીને ગોલ્ડ પ્લેટિંગ માટે સોંપવામાં આવેલી મૂર્તિઓ ફક્ત તાંબાની પ્લેટ નહોતી પરંતુ 1999 માં ગોલ્ડ પ્લેટિંગ કરવામાં આવી હતી.
સોનાનું આવરણ જાણ કર્યા વિના નવીનીકરણ માટે દૂર કરવામાં આવ્યું
આ સમગ્ર મુદ્દો 10 સપ્ટેમ્બરના રોજ પ્રકાશમાં આવ્યો હતો જ્યારે સબરીમાલાના સ્પેશિયલ કમિશનરે કેરળ હાઈકોર્ટને અહેવાલ આપ્યો કે શ્રીકોવિલ (ગર્ભગૃહ) ની બંને બાજુએ લગાવેલા દ્વારપાલકો અને પીડમમાંથી સોનાનું આવરણ તેમને અગાઉથી જાણ કર્યા વિના નવીનીકરણ માટે દૂર કરવામાં આવ્યું હતું. સ્પેશિયલ કમિશનરે કોર્ટને જાણ કરી કે સોનાનું આવરણ 7 સપ્ટેમ્બરના રોજ ચેન્નાઈ સ્થિત એક કંપનીને સમારકામ માટે મોકલવા માટે અલગ કરવામાં આવ્યું હતું.
વર્ષ 1999માં ક્લેડીંગ માટે 1.5 કિલો સોનાનો ઉપયોગ થયો
તેમજ કહ્યું કે, વર્ષ 2019 માં સમાન નવીનીકરણ પછી સોંપવામાં આવેલી વસ્તુઓના વજનમાં વિસંગતતાઓ શોધી કાઢ્યા બાદ હાઇકોર્ટે સુઓ મોટો કાર્યવાહી શરૂ કરી. 6 ઓક્ટોબરના રોજ હાઇકોર્ટે વિગતવાર તપાસની માંગ કરી હતી કારણ કે ટીડીબીએ વર્ષ 2019 માં સમારકામ માટે સોંપવામાં આવેલી વસ્તુઓને ‘તાંબાની પ્લેટો’ તરીકે દસ્તાવેજીકૃત કરી હતી. જેમાં વર્ષ 1999માં ક્લેડીંગ માટે 1.5 કિલો સોનાનો ઉપયોગ થયો હતો તે હકીકત છુપાવી હતી.
ભૂતપૂર્વ ન્યાયાધીશ કેટી શંકરનની પણ નિમણૂક કરી
હાઈકોર્ટે હવે વિસંગતતાઓની તપાસ માટે એસઆઈટીની રચના કરી છે અને એક વ્યાવસાયિકની મદદથી મંદિરમાં રહેલી તમામ કિંમતી વસ્તુઓનું સંપૂર્ણ મૂલ્યાંકન કરવા માટે ભૂતપૂર્વ ન્યાયાધીશ કેટી શંકરનની પણ નિમણૂક કરી છે.
વિજય માલ્યાએ વર્ષ 1998માં સોનાનું દાન કર્યું હતું
યુનાઇટેડ બ્રુઅરીઝ ગ્રુપના ચેરમેન અને ઉદ્યોગપતિ વિજય માલ્યાએ વર્ષ 1998 માં સન્નિધાન ના કેટલાક મુખ્ય ભાગો, જેમાં શ્રીકોવિલ પ્રવેશદ્વાર, છત અને દ્વારપાલકો પર ગોલ્ડ પ્લેટિંગ માટે સોનાનું દાન કર્યું હતું. ચીફ વિજિલન્સ અને સિક્યુરિટી ઓફિસરના તાજેતરના પ્રશ્નના જવાબમાં, યુબી ગ્રુપે સમગ્ર કાર્ય માટે 30.291 કિલો સોનાનો ઉપયોગ કરવાની પુષ્ટિ કરી. આમાંથી, દ્વારપાલકો માટે ક્લેડીંગ માટે 1.564 કિલો સોનાનો ઉપયોગ કરવામાં આવ્યો હતો.
