દેશમાં જાતિ આધારિત વસ્તી ગણતરી મુદ્દે સંઘની સ્પષ્ટતા, કહ્યું ગણતરી રાજકીય રીતે પ્રેરિત ન હોવી જોઈએ…

જબલપુર : દેશમાં કરવામાં આવનારી જાતિ આધારિત વસ્તી ગણતરી મુદ્દે આરએસએસ પોતાનો મત સ્પષ્ટ કર્યો છે. આ અંગે રાષ્ટ્રીય સ્વયંસેવક સંઘના સરકાર્યવાહ દત્તાત્રેય હોસાબલેએ જણાવ્યું કે, સંઘ જાતિ આધારિત વસ્તી ગણતરીનો વિરોધ નથી કરતું પરંતુ તે રાજકીય રીતે પ્રેરિત ન હોવી જોઈએ.

તેનો ઉદ્દેશ્ય સામાજિક અને આર્થિક રીતે પછાત સમુદાયોને ઓળખવાનો અને તેમને પ્રોત્સાહિત કરવાનો છે. તેમણે ત્રણ દિવસની આરએસએસ અખિલ ભારતીય કાર્યકારી બોર્ડની બેઠકના અંતિમ દિવસે પત્રકારો સાથે વાત કરતા જણાવ્યું કે લોકો ઘણીવાર જાતિ અથવા પૈસાના આધારે મતદાન કરે છે અને આવી પ્રથાઓનો અંત લાવવા માટે જાગૃતિની જરૂર છે.

સામાજિક સમરસતાની ભાવના વધારવી જોઈએ

આરએસએસ નેતા હોસાબલે કહ્યું, કે ચૂંટણી દરમિયાન જાતિ આધારિત ટિપ્પણીઓ ફક્ત મત મેળવવા માટે કરવામાં આવે છે. દેશની પ્રગતિ માટે એકતા અને સંવાદિતા જરૂરી છે. જાતિ આધારિત અહંકાર સામાજિક વિખવાદ પેદા કરી રહ્યો છે. સમાજમાં આત્મવિશ્વાસ મજબૂત કરવા માટે, સામાજિક સમરસતાની ભાવના વધારવી જોઈએ.

ડેટા કલ્યાણકારી યોજનાઓ માટે ઉપયોગ કરવાની જરૂર

જાતિ વસ્તી ગણતરી અંગેના પ્રશ્નના જવાબમાં, હોસાબલેએ કહ્યું કે સુપ્રીમ કોર્ટે પહેલાથી જ કહ્યું છે કે જો જરૂરી હોય તો તે હાથ ધરી શકાય છે. તેમણે કહ્યું, આવો ડેટા કલ્યાણકારી યોજનાઓ માટે ઉપયોગ કરવાની જરૂર છે. તેનો ઉપયોગ રાજકીય હેતુઓ માટે ન થવો જોઈએ કારણ કે તે સમાજને વિભાજીત કરશે. કેટલીક જાતિઓ પછાત રહી છે અને તેમને સશક્તિકરણની જરૂર છે. જો સરકારી યોજનાઓના લાભો તેમના સુધી પહોંચાડવા માટે ડેટાની જરૂર હોય, તો તે એકત્રિત કરવો જોઈએ.

આરએસએસ જાતિના આધારે કાર્ય કરતું નથી

આ ઉપરાંત હોસાબલેએ જણાવ્યું હતું કે આરએસએસ જાતિના આધારે કાર્ય કરતું નથી. પરંતુ જ્યાં પણ ડેટા દેશ માટે ઉપયોગી છે ત્યાં તે એકત્રિત કરવો જોઈએ. તેમણે ડ્રગ્સના ફેલાવા પર ચિંતા વ્યક્ત કરતા કહ્યું કે આઈએમએમ અને શાળાઓ જેવી સંસ્થાઓની નજીક પણ ડ્રગ્સ વેચાઈ રહ્યા છે. તેમણે કહ્યું કે યુવાનોને બચાવવા માટે વહીવટી, ધાર્મિક અને સામાજિક સ્તરે પ્રયાસો કરવાની જરૂર છે.

1,000 હિન્દુ પરિષદોનું આયોજન કરવામાં આવશે

હોસાબલેએ જણાવ્યું હતું કે આરએસએસના શતાબ્દી વર્ષની ઉજવણી માટે, પર્યાવરણ, હિન્દુત્વના વિસ્તરણ, કૌટુંબિક જાગૃતિ, સામાજિક સંવાદિતા અને અન્ય સામાજિક મુદ્દાઓ પર દેશભરમાં આશરે 80 થી 1,000 હિન્દુ પરિષદોનું આયોજન કરવામાં આવશે. તેમણે ઉમેર્યું હતું કે સ્વયંસેવકો આ વર્ષે ઘરે ઘરે સંપર્ક અભિયાન પણ ચલાવશે.