મની લોન્ડરિંગ કેસમાં રોબર્ટ વાડ્રા સામે EDએ ચાર્જશીટ દાખલ કરી…
2 કંપની પાસેથી ગેરકાયદે 58 કરોડ કમાવવાનો આરોપ, કોર્ટમાં હાજર થવું પડશે
નવી દિલ્હીઃ એન્ફોર્સમેન્ટ ડિરેક્ટોરેટ (ઈડી)એ કોંગ્રેસનાં નેતા પ્રિયંકા ગાંધીના પતિ રોબર્ટ વાડ્રા વિરુદ્ધ મની લોન્ડરિંગ કેસમાં ચાર્જશીટ દાખલ કરી છે. આ કેસમાં વાડ્રાએ 58 કરોડ રૂપિયાની અનિયમિત આવક મેળવી હોવાનો આરોપ છે.
જેનો ઉપયોગ તેમણે અલગ અલગ ક્ષેત્રોમાં કર્યો છે. આ કાર્યવાહીથી વાડ્રાની કાયદાકીય મુશ્કેલીઓ વધી છે અને તેમને કોર્ટમાં હાજર થવાનું કહેવામાં આવ્યું છે.
ઈડીએ તેની ચાર્જશીટમાં જણાવ્યું છે કે રોબર્ટ વાડ્રાએ બે કંપનીઓ દ્વારા 58 કરોડ રૂપિયાની અનિયમિત આવક મેળવી છે, જે અપરાધિક પ્રવૃત્તિઓ સાથે જોડાયેલી છે. આ રકમનો ઉપયોગ તેમણે અચલ સંપત્તિ ખરીદવા, રોકાણ કરવા, લોન આપવા અને તેમની વિવિધ કંપનીઓના કર્જા ચૂકવવા માટે કર્યો છે. તપાસમાં આ અનિયમિત આવકનું સ્પષ્ટ આંકડાકીય વિશ્લેષણ કરવામાં આવ્યું છે.
ચાર્જશીટ અનુસાર આ અનિયમિત રકમ બે માર્ગોથી આવી છે. તેમાંથી 5 કરોડ રૂપિયા બ્લુ બ્રીઝ ટ્રેડિંગ પ્રાઈવેટ લિમિટેડ (BBTPL) દ્વારા અને 53 કરોડ રૂપિયા સ્કાય લાઈટ હોસ્પિટાલિટી પ્રાઈવેટ લિમિટેડ (SLHPL) દ્વારા ટ્રાન્સફર કરવામાં આવ્યા હતા.
પ્રાથમિક તપાસમાં આ કંપનીઓની અપરાધિક પ્રવૃત્તિઓ સાથેની જોડાણને ઉજાગર કરવામાં આવ્યું છે, જે વાડ્રાના વ્યાવસાયિક વ્યવહારોને પ્રશ્નાર્થ કરે છે.
જમીન કૌભાંડમાં કોર્ટની કાર્યવાહી
આ ઉપરાંત, ગુરુગ્રામના શિકોહપુરમાં 2008ના જમીન વ્યવહાર સાથે જોડાયેલા મની લોન્ડરિંગ કેસમાં પણ વાડ્રાની મુશ્કેલીઓ વધી છે. રાઉઝ એવન્યુ કોર્ટના વિશેષ ઈડી જજ સુશાંત ચગોતરાએ ચાર્જશીટ પર નોટિસ જારી કરી છે અને વાડ્રાને 28 ઓગસ્ટે હાજર થઈને પોતાનો પક્ષ રજૂ કરવા તેમજ ઈડીના તર્કો પર ચર્ચા કરવા કહ્યું છે.
આ પણ વાંચો…શિકોહપુર લેન્ડ ડીલ કેસ: EDની મોટી કાર્યવાહીઃ રોબર્ટ વાડ્રા સામે ચાર્જશીટ અને 43 સંપત્તિ જપ્ત…
