રેવંત રેડ્ડીએ નિભાવ્યું વચન, તેલંગાણાની મહિલાઓ આજથી બસમાં મફત મુસાફરી કરી શકશે
હૈદરાબાદઃ તેલંગાણામાં હવે કોંગ્રેસની સરકાર છે. રેવંત રેડ્ડી મુખ્ય પ્રધાન છે અને સીએમ બનતાની સાથે જ તેમણે તેલંગાણાના લોકોને આપવામાં આવેલી 6 ગેરંટીમાંથી 2 પૂરી કરી છે. સીએમ તરીકે શપથ લેતાની સાથે જ રેવંત રેડ્ડીએ કેબિનેટની પ્રથમ બેઠક બોલાવી હતી અને બંને ગેરંટી પૂરી કરવાની જાહેરાત કરી હતી. જાહેરાત અનુસાર, આજથી તેલંગાણાની મહિલાઓ બસમાં મફત મુસાફરી કરી શકશે. બીજી તરફ, રાજીવ આરોગ્યશ્રી સ્વાસ્થ્ય વીમા યોજના હેઠળ 10 લાખ રૂપિયા સુધીનો દાવો વધારવાની ગેરંટી પણ આજથી શરૂ થઈ ગઈ છે, કારણ કે આજે કોંગ્રેસના દિગ્ગજ નેતા સોનિયા ગાંધીનો જન્મદિવસ છે, તેથી તેમના વતી તેલંગાણાની કોંગ્રેસ સરકારે આજે મહિલાઓને આ 2 ભેટ આપી છે. મહિલાઓ આઈડી બતાવીને યોજનાનો લાભ મેળવી શકે છે.
તેલંગાણા સ્ટેટ રોડ ટ્રાન્સપોર્ટ કોર્પોરેશન (TSRTC)ના મેનેજિંગ ડાયરેક્ટર વીસી સજ્જનારે જણાવ્યું કે મહિલાઓ, છોકરીઓ, વિદ્યાર્થીઓ અને થર્ડ જેન્ડર કેટેગરીના લોકોને પણ મફત બસ મુસાફરીની સુવિધા મળશે. આજે મુખ્ય પ્રધાન રેવંત રેડ્ડીએ પોતે આ યોજનાની શરૂઆત કરી હતી. આ પહેલા મુખ્ય પ્રધાન રેવંત રેડ્ડીએ મુખ્ય પ્રધાનપદ સંભાળતાની સાથે જ વિકલાંગ યુવતીને આપેલું વચન પૂરું કર્યું હતું. તેમણે નામપલ્લીની વિકલાંગ વ્યક્તિ રજનીને વચન આપ્યું હતું કે જો કોંગ્રેસ સરકાર બનાવશે, તો તેઓ સૌથી પહેલા રજનીને નોકરી આપશે. આ વચન સીએમે પૂરું કર્યું છે. પોસ્ટ ગ્રેજ્યુએશનની વિદ્યાર્થિની રજનીને નોકરી આપવામાં આવી છે. તેમણે શપથ લેતાની સાથે જ 2 ફાઇલો પર હસ્તાક્ષર કર્યા હતા. પ્રથમ ફાઇલ 6 ચૂંટણી બાંયધરીનો અમલ કરવાની હતી અને બીજી ફાઇલ દિવ્યાંગ રજનીને નોકરી આપવાની હતી.
કોંગ્રેસે તેલંગાણા વિધાનસભા ચૂંટણી 2023 માટે જાહેર કરેલા તેના વચનોમાં મહાલક્ષ્મી, રિથુ ભરોસા, ગૃહ જ્યોતિ, ઈન્દિરમ્મા ઈન્ડલુ, યુવા વિકાસ અને ચેયુથાની 6 ગેરંટી જાહેર કરી હતી. મહાલક્ષ્મી ગેરંટી હેઠળ મહિલાઓને દર મહિને 2500 રૂપિયા, ગેસ સિલિન્ડર 500 રૂપિયામાં અને બસમાં મફત મુસાફરીની સુવિધા આપવામાં આવવાની છે. રાયથુ ભરોસા ગેરંટી હેઠળ ભાડૂત ખેડૂતોને દર વર્ષે એકર દીઠ રૂ. 15 હજાર અને કૃષિ કામદારોને પ્રતિ એકર રૂ. 12 હજાર અને ડાંગરના પાક માટે દર વર્ષે રૂ. 500 પ્રતિ એકર બોનસ મળશે. ગ્રહ જ્યોતિ યોજના હેઠળ 200 યુનિટ મફત વીજળી મળશે. ઈન્દિરમ્મા ઈન્ડલુ હેઠળ સ્વાતંત્ર્ય સેનાનીઓને 250 ચોરસ યાર્ડ જમીન મળશે. જેમની પાસે પોતાનું ઘર નથી તેમને જમીન અને 5 લાખ રૂપિયાની આર્થિક મદદ મળશે. યુવા વિકાસ અંતર્ગત વિદ્યાર્થીઓને 5 લાખ રૂપિયાની આર્થિક સહાય સાથે વિદ્યા ભરોસા કાર્ડ મળશે. તેલંગાણા ઇન્ટરનેશનલ સ્કૂલો બનાવવામાં આવશે. ચેયુથા હેઠળ વરિષ્ઠ નાગરિકોને દર મહિને રૂ. 4,000 અને રાજીવ આરોગ્યશ્રી વીમા હેઠળ રૂ. 10 લાખનું પેન્શન મળશે.
