RBI તહેવારોમાં આપશે લોનધારકોને ભેટ? રેપોરેટ ઘટવાની શક્યા છે કે નહીં, જાણો આ અહેવાલમાં
ભારતીય રિઝર્વ બેંકની સોમવારથી મહત્વની મોનેટરી પોલિસી કમિટીની બેઠક શરૂ થઈ છે. આ બેઠક ગવર્નર સંજય મલ્હોત્રાના નેતૃત્વમાં શરૂ કરવામાં આવી છે. આ બેઠકના પરિણામે 6 ઓગસ્ટ, 2025ના રોજ નવી દ્વિમાસિક નાણાકીય નીતિની જાહેરાત થશે. નિષ્ણાતો અને બજારના સંકેતો અનુસાર, આ વખતે RBI રેપો રેટમાં 0.25 ટકાનો કાપ કરી શકે છે. આ નિર્ણય પાછળ નિયંત્રિત ફુગાવો અને આર્થિક પડકારોને પહોંચી વળવાનો હેતુ છે.
RBIની આ બેઠકમાં રેપો રેટ (જે દરે RBI બેંકોને લોન આપે છે)માં 0.25 ટકાનો કાપ થવાની શક્યતા છે. આના બે મુખ્ય કારણો છે: પહેલું, રિટેલ ફુગાવો ઘણા મહિનાઓથી RBIના 4%ના લક્ષ્યથી નીચે રહ્યો છે, ખાસ કરીને શાકભાજી અને ખાદ્ય ચીજોની કિંમતોમાં ઘટાડાથી ફુગાવો 3%ની આસપાસ રહેવાનો અંદાજ છે. બીજું, વૈશ્વિક આર્થિક અનિશ્ચિતતાઓ (ખાસ કરીને અમેરિકાથી) અને દેશમાં લોન વૃદ્ધિની ધીમી ગતિને કારણે આર્થિક ગતિવિધિઓને પ્રોત્સાહન આપવા માટે વ્યાજ દરમાં ઘટાડો જરૂરી માનવામાં આવે છે.
આ વર્ષે ત્રણ વખત ઘટ્યા રેપો રેટ
ચાલુ વર્ષે RBIએ અત્યાર સુધીમાં ત્રણ વખત રેપો રેટમાં ઘટાડો કર્યો છે, જેનાથી રેપો રેટ 6.5%થી ઘટીને 5.5% થયો છે. જો આ બેઠકમાં ચોથી વખત કાપ થશે, તો તે આર્થિક ગતિવિધિઓને વધુ ગતિ આપશે. નિષ્ણાતોનું માનવું છે કે આ કાપથી બેંકોની લોનના દર ઘટશે, જેનો સીધો ફાયદો ગ્રાહકોને મળશે. આ નિર્ણય આર્થિક સ્થિતિને મજબૂત કરવા અને ફુગાવાને નિયંત્રણમાં રાખવામાં મદદ કરશે.
તહેવારોની સિઝન પર અસર
રેપો રેટમાં ઘટાડો થવાથી તહેવારોની સિઝન પહેલા સામાન્ય લોકોને મોટી રાહત મળી શકે છે. ઓછા વ્યાજ દરનો અર્થ એ થયો કે કાર લોન, હોમ લોન અને અન્ય લોનના EMIમાં ઘટાડો થશે. તહેવારો દરમિયાન લોનની માગ વધે છે, અને વ્યાજ દરમાં ઘટાડો થવાથી આ માગમાં વધુ વધારો થઈ શકે છે. આનાથી ગ્રાહકોને ખરીદી અને રોકાણ માટે વધુ સુવિધા મળશે.
સરકાર અને ગવર્નરના સંકેતો
નાણા મંત્રાલયે તાજેતરના અહેવાલમાં જણાવ્યું હતું કે નીચો ફુગાવો વ્યાજ દરમાં વધુ ઘટાડાની શક્યતા ઊભી કરે છે. આરબીઆઈ ગવર્નર મલ્હોત્રાએ અગાઉ પણ સંકેત આપ્યો હતો કે જો ફુગાવો ઓછો રહે છે અથવા આર્થિક વિકાસ દર નબળો પડે છે, તો રેપો રેટમાં ઘટાડો કરી શકાય છે. આ બેઠકમાં કોઈપણ નિર્ણય પહેલાં RBI આર્થિક સ્થિતિ અને ફુગાવાને ધ્યાનમાં રાખીને નીતિગત દરમાં ફેરફાર કરશે. નિષ્ણાતોનું માનવું છે કે આ નિર્ણયથી આર્થિક વૃદ્ધિને પ્રોત્સાહન મળશે અને બજારમાં સકારાત્મક માહોલ બનશે.
આપણ વાંચો: એનડીએની બેઠકમાં ઓપરેશન સિંદૂરની સફળતા માટે પીએમ મોદીનું સન્માન કરાયું
