રામ મંદિરના શિખર પર લહેરાશે 22 ફૂટ લાંબો ધ્વજ: સૂર્ય, ઓમ અને કાંચનાર વૃક્ષ બનશે ધ્વજનું પ્રતિક
અયોધ્યામા રામ મંદિરના શિખર પર ધ્વજ ફરકાવવાની તૈયારીઓએ જોર પકડ્યું છે. આ કાર્યક્રમ મંદિર નિર્માણની પૂર્ણતાનું પ્રતીક બનશે અને પ્રાણ પ્રતિષ્ઠા જેવો જ ભવ્ય સમારોહ હશે. પ્રધાનમંત્રી નરેન્દ્ર મોદી અને આરએસએસ પ્રમુખ મોહન ભાગવત મુખ્ય અતિથિ તરીકે હાજર રહેશે. આ કાર્યક્રમ રાજકીય અને આધ્યાત્મિક રીતે મહત્વપૂર્ણ છે, જેમાં બીજેપીના નવા અભિયાનની શરૂઆત પણ થશે.
25 નવેમ્બરે રામ મંદિરના 161 ફૂટ ઊંચા શિખર પર 22 ફૂટ લાંબો અને 11 ફૂટ પહોળો ભગવો ધ્વજ ફરકાવવામાં આવશે. આ ધ્વજ 42 ફૂટના થાંભલા પર લગાવાશે. કાર્યક્રમમાં વરિષ્ઠ બીજેપી નેતાઓનું મોટું જમાવડો થશે. પ્રધાનમંત્રી વિશ્વના સૌથી મોટા સ્કાઉટ-ગાઇડ જમ્બુરી માટે 35 હજારથી વધુ કેડેટ્સને આમંત્રણ આપશે અને વિકસિત ઉત્તર પ્રદેશ અભિયાનની સમીક્ષા કરશે.
આપણ વાંચો: શ્રદ્ધાળુઓ માટે ખુશખબર; અયોધ્યામાં રામ મંદિરમાં દર્શનનો સમય વધારાયો
આ મામલે શ્રી રામ જન્મભૂમિ તીર્થ ક્ષેત્ર ટ્રસ્ટના કોષાધ્યક્ષ ગોવિંદ દેવ ગિરીએ જણાવ્યું કે ધ્વજમાં વાલ્મીકિ રામાયણમાં વર્ણિત સૂર્ય, ઓમ અને કાંચનારના વૃક્ષો પ્રતીકો હશે. પાંચ દિવસીય સમારોહ 21 નવેમ્બરથી શરૂ થશે અને 25મીએ ધ્વજારોહણ સાથે સમાપ્ત થશે. મંદિર પરિસરમાં શિવ, ગણેશ, સૂર્ય, હનુમાન, ભગવતી અને અન્નપૂર્ણા મંદિરો પર પણ ધ્વજ ફરકાવવામાં આવશે.
આ કાર્યક્રમને લઈ ટ્રસ્ટે મહેમાનોની સંખ્યા 8 હજારથી વધારીને 10 હજાર કરી છે. તમામ આઠ મંદિરોમાં વિશેષ પૂજા, હવન અને અનુષ્ઠાનો થશે. અયોધ્યા અને કાશીના આચાર્યો અનુષ્ઠાન કરાવશે. ધ્વજસ્તંભ 360 ડિગ્રી ફરતા બોલ-બેરિંગ પર આધારિત હશે, જેથી 60 કિમી/કલાકની આંધી-તોફાનમાં પણ ધ્વજ સુરક્ષિત રહે.
ધ્વજના કાપડની આંધી-તોફાન સહન કરવાની ક્ષમતાની તપાસ ચાલી રહી છે. 28 ઓક્ટોબરે ભવન નિર્માણ સમિતિની બેઠકમાં ટેસ્ટ રિપોર્ટ આપવામાં આવશે અને તેના આધારે કાપડનું અંતિમ પસંદગી થશે. આ કાર્યક્રમ રામ મંદિરના નિર્માણના પૂર્ણ થવાની ઉજવણીનું પ્રતીક બનશે.
