દિલ્લીની પ્રતિષ્ઠિત ક્લબની ચૂંટણીમાં ભાજપના દિગ્ગજ નેતાની કારમી હાર, ભાજપના જ ક્યા નેતા જીત્યા ?
નવી દિલ્હી: થોડા દિવસ અગાઉ કોન્સ્ટિટ્યૂશન ક્લબમાં ચૂંટણી યોજાઈ હતી. જેના પરિણામ 12 ઓગસ્ટની મધરાતે જાહેર કરવામાં આવ્યા હતા. ચૂટણી પરિણામો બાદ ઉજવણીનો માહોલ છવાયો હતો. ભાજપના નેતા રાજીવ પ્રતાપ રૂડીએ સચિવ (એડમિનિસ્ટ્રેશન) પદે 100થી વધુ મતની સરસાઈથી જીત મેળવી. આ ચૂંટણી અન્ય વર્ષોની તુલનામાં રોમાંચક રહી, કારણ કે રૂડીને પોતાની જ પાર્ટીના સંજીવ બલયાન તરફથી પડકાર મળ્યો હતો. આ ચૂંટણીએ સાંસદો અને રાજકીય નેતાઓનું ધ્યાન ખેંચ્યું, જેમાં અમિત શાહ અને સોનિયા ગાંધી જેવા મોટા નેતાઓએ પણ મતદાન કર્યું હતું.
આ વખતે કોન્સ્ટિટ્યૂશન ક્લબની ચૂંટણીમાં ભાજપની અંદરોની ટક્કર જોવા મળી હતી. રાજીવ પ્રતાપ રૂડી, જેઓ છેલ્લા ૨૫ વર્ષથી આ પદે લગભગ બિનહરીફ જીતતા આવ્યા છે, તેમને સંજીવ બલયાને પડકાર્યા હતા. કુલ 1295 મતદારોમાંથી 707 મતો પડ્યા, જેમાં રૂડીએ 391 મતો મેળવીને બલયાનના 291 મતો સામે વિજય મેળવ્યો. રૂડીની ટીમમાં કોંગ્રેસ, સપા, ટીએમસી અને અપક્ષ સાંસદોનો સમાવેશ હતો, જેના કારણે તેમને વિજય મળ્યો. બલયાનને ભાજપના કેટલાક નેતાઓ, ખાસ કરીને નિશિકાંત દુબેનું સમર્થન હતું.
આ ચૂંટણીમાં ભાજપના અમિત શાહ, જેપી નડ્ડા, પિયૂષ ગોયલ, કિરેન રિજિજુ જેવા દિગ્ગજ નેતાઓએ મતદાન કર્યું, જ્યારે વિપક્ષમાંથી સોનિયા ગાંધી અને મલ્લિકાર્જુન ખડગે પણ સામેલ થયા. કોંગ્રેસ અને સમાજવાદી પાર્ટીએ રૂડીને ટેકો આપ્યો હોવાની ચર્ચા હતી. રૂડીએ પોતાના બે દાયકાના કાર્યકાળમાં ક્લબમાં આધુનિક સુવિધાઓ ઉમેરવાનો દાવો કર્યો, જ્યારે બલયાને પરિવર્તનની જરૂરિયાત દર્શાવી. કોન્સ્ટિટ્યૂશન ક્લબના અન્ય પદો જેમ કે સચિવ (સ્પોર્ટ્સ) માટે કોંગ્રેસના રાજીવ શુક્લા અને સચિવ (કલ્ચર) માટે ડીએમકેના તિરુચિ સિવા બિનહરીફ ચૂંટાયા છે.
રાજીવ પ્રતાપ રૂડી, બિહારના સરનથી પાંચ વખતના લોકસભા સાંસદ અને પૂર્વ કેન્દ્રીય મંત્રી, એક કોમર્શિયલ પાઈલટ તરીકેની શૈલી અને રાજકીય કુશળતા માટે જાણીતા છે. તેમણે સરનમાં રાબડી દેવી અને રોહિણી આચાર્ય જેવા નેતાઓને હરાવ્યા છે. બીજી તરફ, સંજીવ બલયાન, પશ્ચિમ ઉત્તર પ્રદેશના ગ્રામીણ પ્રતિનિધિ અને બે વખતના પૂર્વ સાંસદ, સાદગી અને ગ્રાસરૂટ રાજકારણ માટે ઓળખાય છે. જોકે, 2024ની લોકસભા ચૂંટણીમાં તેઓ મુઝફ્ફરનગરથી હારી ગયા હતા. આ ચૂંટણીમાં જાતિય ગણતરીઓએ પણ ભૂમિકા ભજવી, જ્યાં રૂડી ઠાકુર અને બલયાન જાટ સમુદાયના પ્રતિનિધિ હતા.
કોન્સ્ટિટ્યૂશન ક્લબનો ઇતિહાસ
કોન્સ્ટિટ્યૂશન ક્લબની સ્થાપના 1947માં સંસદના સભ્યો માટે અનૌપચારિક મેળાવડાના સ્થળ તરીકે થઈ હતી. નવી દિલ્હીના રફી માર્ગ પર, રિઝર્વ બેંક ઓફ ઈન્ડિયાની પાછળ આવેલું આ ક્લબ 1965માં તત્કાલીન રાષ્ટ્રપતિ એસ. રાધાકૃષ્ણન દ્વારા વર્તમાન સ્થળે ઉદ્ઘાટન થયું. ક્લબમાં કોન્ફરન્સ રૂમ, કોફી ક્લબ, આઉટડોર કાફે, બિલિયર્ડ્સ રૂમ, જિમ, યુનિસેક્સ સલૂન અને સ્વિમિંગ પૂલ જેવી સુવિધાઓ છે. લોકસભાના અધ્યક્ષ ક્લબના પદેના અધ્યક્ષ હોય છે, જ્યારે સચિવ તેના વહીવટી કાર્યોની જવાબદારી સંભાળે છે.
