નવી દિલ્હી: નેશનલ હેરાલ્ડ અખબાર સાથે જોડાયેલા કથિત મની લોન્ડરિંગ કેસમાં કોંગ્રેસના સાંસદ રાહુલ ગાંધી અને સોનિયા ગાંધીની મુશ્કેલી વધી છે. દિલ્હી પોલીસની ઇકોનોમિક ઓફેન્સીસ વિંગ(EOW)એ ગાંધી પરિવાર સહિત છ લોકો સામે ગુનાહિત કાવતરું ઘડવાનો આરોપ મુક્યો છે.
અહેવાલ મુજબ દાખલ કરવામાં આવેલી FIRમાં ઓવરસીઝ કોંગ્રેસના પ્રમુખ સામ પિત્રોડા અને અન્ય ત્રણ લોકોના પણ નામ છે, આ ઉપરાંત ત્રણ કંપનીઓ એસોસિએટેડ જર્નલ્સ લિમિટેડ (AJL), યંગ ઇન્ડિયન અને ડોટેક્સ મર્ચેન્ડાઇઝ પ્રાઇવેટ લિમિટેડનો પણ ઉલ્લેખ છે.
નેશનલ હેરાલ્ડ અખબારની પેરેન્ટ કંપની એસોસિએટેડ જર્નલ્સ લિમિટેડ (AJL) પર છેતરપિંડીથી મિલકત કબજે કરવા બદલ ગુનાહિત કાવતરું ઘડવાનો આરોપ લાગવવામાં આવ્યો છે.
માત્ર 50 લાખ રૂપિયા આપીને AJL પર કબજો:
અહેવાલ મુજબ કોલકાતા સ્થિત કથિત શેલ કંપની ડોટેક્સ મર્ચેન્ડાઇઝે નોન-પ્રોફિટ કંપની યંગ ઇન્ડિયનને 1 કરોડ રૂપિયા આપ્યા હતાં, યંગ ઇન્ડિયનમાં રાહુલ ગાંધી અને સોનિયા ગાંધીનો 76 ટકા હિસ્સો હતો. એવો આરોપ મુલાવામાં આવ્યો છે, યંગ ઇન્ડિયને કોંગ્રેસને માત્ર 50 લાખ રૂપિયા આપીને AJL પર કબજો મેળવ્યો, જ્યારે AJLની સંપત્તિની કિંમત આશરે 2,000 કરોડ રૂપિયાથી વધુ હતી.
અહેવાલ મુજબ નેશનલ હેરાલ્ડ કેસની તપાસ કરી રહેલી એન્ફોર્સમેન્ટ ડિરેક્ટોરેટ (ED) ની ફરિયાદને આધારે 3 ઓક્ટોબરના રોજ દિલ્હી પોલીસની ઇકોનોમિક ઓફેન્સીસ વિંગ(EOW)એ આ FIR નોંધી હતી. EDએ તેનો તપાસ અહેવાલ દિલ્હી પોલીસને સોંપ્યો હતો.
ગઈ કાલે શનિવારે દિલ્હીની રાઉઝ એવન્યુ કોર્ટે નેશનલ હેરાલ્ડ સાથે જોડાયેલા કથિત મની લોન્ડરિંગ કેસમાં ED ની ચાર્જશીટ પર નોંધ લેવાનો ચુકાદો મુલતવી રાખ્યો હતો. 16 ડિસેમ્બરે ચુકડો જાહેર કરવામાં આવશે.
આપણ વાંચો: શ્રીલંકામાં 150નાં જીવ લીધા બાદ ‘દિતવાહ’ વાવાઝોડું તમિલનાડુ-પુડુચેરી પર ત્રાટકશે, તંત્ર હાઈ એલર્ટ પર
