‘મન કી બાત’માં પીએમ મોદીએ કર્યા ‘Gen-Z’ના વખાણ: ‘વોકલ ફોર લોકલ’ની અપાવી યાદ

નવી દિલ્હી: વડા પ્રધાન નરેન્દ્ર મોદી દર મહિનાના છેલ્લા રવિવારે રેડિયો કાર્યક્રમ ‘મન કી બાત’ દ્વારા રાષ્ટ્રનું સંબોધન કરે છે. આજે આ કાર્યક્રમના 128માં એપિસોડનું પ્રસારણ કરવામાં આવ્યું હતું, જેમાં વડા પ્રધાન નરેન્દ્ર મોદીએ નવેમ્બર મહિનાને અનેક પ્રેરણાઓ લઈને આવનાર મહિનો ગણાવ્યો હતો અને દેશની સાંસ્કૃતિક, કૃષિ અને ટેકનોલોજીકલ સિદ્ધિઓ પર પ્રકાશ પાડ્યો હતો.

નવેમ્બરમાં થયા અનેક મહત્ત્વના કાર્યક્રમ

વડા પ્રધાન નરેન્દ્ર મોદીએ પોતાના સંબોધનમાં છેલ્લા કેટલાક દિવસોમાં બનેલી મહત્વપૂર્ણ ઘટનાઓને યાદ કરી હતી. વડા પ્રધાને પોતાના સંબોધનમાં જણાવ્યું હતું કે, ‘વંદે માતરમ’ની 150 વર્ષ પૂરા થવા નિમિત્તના રાષ્ટ્રવ્યાપી કાર્યક્રમોનું આયોજન કરવામાં આવ્યું હતું. 25 નવેમ્બરે અયોધ્યાના રામ મંદિરમાં ધ્વજારોહણ અને કુરુક્ષેત્રના જ્યોતિસર ખાતે પંચજન્ય સ્મારકનું ઉદ્ઘાટન કરવામાં આવ્યું હતું, જ્યારે 26 નવેમ્બરે સેન્ટ્રલ હોલમાં બંધારણ દિવસની ઉજવણી કરવામાં આવી હતી.

આ ઉપરાંત હૈદરાબાદમાં વિશ્વની સૌથી મોટી MRO (Maintenance, Repair, and Overhaul) સુવિધાનું ઉદ્ઘાટન અને મુંબઈમાં INS Mahe ભારતીય નૌકાદળમાં સામેલ કરવામાં આવ્યું હતું. આ ઉપરાંત, સ્કાયરૂટના ઇન્ફિનિટી કેમ્પસ દ્વારા અવકાશ ક્ષેત્રે ભારતની ક્ષમતા વધી હતી.

દેશના ખેડૂતોની મહેનતને બિરદાવતા પીએમ મોદીએ જણાવ્યું હતું કે ભારતે ખાદ્યાન્ન ઉત્પાદનમાં 357 મિલિયન ટન સાથે નવો ઐતિહાસિક રેકોર્ડ બનાવ્યો છે. ઉલ્લેખનીય છે કે, છેલ્લા 10 વર્ષમાં ભારતના અનાજ ઉત્પાદનમાં 10 કરોડ ટનનો જંગી વધારો થયો છે.

ડ્રોન ચેલેન્જ અને Gen-Zની પ્રશંસા

ઈસરો (ISRO) દ્વારા આયોજિત એક અનોખી ડ્રોન સ્પર્ધાનો ઉલ્લેખ કરતા વડા પ્રધાન નરેન્દ્ર મોદીએ ભારતના Gen-Zની પ્રશંસા કરી હતી. આ સ્પર્ધામાં યુવાનોએ મંગળ ગ્રહ જેવી સ્થિતિમાં GPS વગર ડ્રોન ઉડાડવાના હતા. કેમેરા અને સોફ્ટવેરની મદદથી ડ્રોનને જાતે જ દિશા શોધવાની હતી, જેમાં ઘણા ડ્રોન નિષ્ફળ ગયા હતા. જોકે, પુણેની એક યુવા ટીમે હાર માન્યા વગર સતત પ્રયાસો કર્યા અને અંતે મંગળ જેવી જટિલ પરિસ્થિતિમાં ડ્રોન ઉડાડવામાં સફળતા મેળવી હતી.

મહિલા બ્લાઈન્ડ ક્રિકેટ ટીમની સિદ્ધિ

વડા પ્રધાન નરેન્દ્ર મોદીએ ભારતીય મહિલા બ્લાઈન્ડ ક્રિકેટ ટીમની સિદ્ધિને રમતગમતના ઇતિહાસની સૌથી મોટી જીત ગણાવી હતી. પીએમ મોદીએ કહ્યું હતું કે, “આપણી મહિલા ટીમે એક પણ મેચ હાર્યા વિના વર્લ્ડ કપ જીતીને દેશનું ગૌરવ વધાર્યું છે.” પ્રધાનમંત્રીએ ટીમના ખેલાડીઓ સાથેના તેમના મુલાકાતના અનુભવો પણ શેર કર્યા હતા.
પ્રધાનમંત્રીએ ‘વોકલ ફોર લોકલ’ મંત્રનો પુનરોચ્ચાર કર્યો હતો. તેમણે જણાવ્યું કે G-20 સમિટમાં વિશ્વના નેતાઓને આપવામાં આવેલી ભેટોમાં પણ આ જ ભાવના પ્રતિબિંબિત થઈ હતી. આ ઉપરાંત, ભારતને કોમનવેલ્થ ગેમ્સના યજમાન તરીકે જાહેર કરવામાં આવ્યું છે, જે દેશ માટે ગૌરવની વાત છે.

આપણ વાંચો:  ચૂંટણી પંચે SIR પ્રક્રિયા માટેની તારીખ લંબાવી! હવે આ તારીખ સુધી ફોર્મ ભરી શકાશે